Indian 2 Trimmed: எதிர்மறை விமர்சனங்கள்..! இந்தியன் 2 படக்குழு அதிரடி முடிவு - பாக்ஸ் ஆபிஸ் வசூலில் புத்துயிர் முயற்சி

கடந்த வாரம் பெரும் எதிர்பார்ப்புக்கு மத்தியில் வெளியானது இந்தியன் 2 திரைப்படம். உலகநாயகன் கமல்ஹாசன் - இயக்குநர் ஷங்கர் என பிரம்மாண்ட கூட்டணியில் உருவாகியிருந்த இந்த படம் ரசிகர்களை பெரிதாக கவரவில்லை.

முதல் நாளில் இருந்த படத்துக்கு தொடர்ந்து எதிர்மறையான விமர்சனங்கள் வெளியாகி வருகின்றன. இருப்பினும் படம் ரூ. 100 கோடிக்கு மேல் வசூலித்திருப்பதாக கூறப்படுகிறது.

12 நிமிடங்கள் ட்ரிம்

இந்தியன் 2 படத்தின் மிக பெரிய குறையாக, படத்தின் நீளம் கூறப்படுகிறது. படம் வெளியான போது 3 மணி நேரம் வரை இருந்துள்ளது. இதையடுத்து தொடர்ந்து வெளியாகும் விமர்சனங்கள் காரணமாக படத்தின் நீளத்தை 11 நிமிடங்கள் 51 விநாடிகள் வரை படக்குழுவினர் குறைத்துள்ளனர்.

இதையடுத்து படத்தின் ட்ரிம் செய்யப்பட்ட பதிப்பு இன்று முதல் திரையிடப்பட்டு வருகிறது. இந்த தகவலை படத்தயாரிப்பாளர்கள் போஸ்டருடன் அறிவித்துள்ளனர்.

மீண்டும் சேனாபதியாக கமல்

இந்தியன் முதல் பாகத்தில் சுதந்திர போராட்ட தியாகி, லஞ்சம் வாங்குபவர்கள் குத்தி கொலை செய்யும் முதியவராக சேனாபதி என்ற கதாபாத்திரத்தில் கமல்ஹாசன் நடித்திருப்பார். அதில் இந்தியாவின் பண்டைய தற்காப்பு கலையாக திகழும் வர்மக்கலை வெளிப்படுத்தி கொலை செய்வதும், தப்பிப்பதும் என தூள் கிளப்பியிருப்பார்.

இதைத்தொடர்ந்து 28 ஆண்டுகளுக்கு பிறகு வெளியாகியிருக்கும் இந்தியன் 2 படத்தில் சேனாபதி கதாபாத்திரத்தை உயிர்பித்துள்ளனர். படத்தில் அவர் 106 வயது முதியவராக தோன்றியுள்ளார். இந்த பாகத்தில் வித்தியாசமான கெட்டப்புகளுடன், வர்மகலை தொடர்பான காட்சிகளிலும் கமல் மிரட்டியுள்ளார்

கமலின் சேனாபதி கதாபாத்திரமும், அதுதொடர்பான சில காட்சிகளும் ரசிகர்களை கவர்ந்திருந்தபோதிலும், ஒட்டு மொத்தமாக படத்தின் திரைக்கதை அழுத்தமாக இல்லை என ரசிகர்கள் கருத்துகளை வெளிப்படுத்தியுள்ளனர்.

இந்தியன் 2 படத்தில் கமலுடன், நடிகர்கள் சித்தார்த், பாபி சிம்ஹா, ரகுல் ப்ரீத் சிங், பிரியா பவானி ஷங்கர் மற்றும் மறைந்த நடிகர்களான விவேக், மாரிமுத்து உள்பட பலரும் நடித்துள்ளார்கள்.

அனிருத் இசையமைப்பில் படத்தின் பாடல்கள் வரவேற்பை பெற்றிருந்தாலும், பின்னணி இசை பெரிதாக பேசப்படவில்லை.

ரசிகர்களை கவர்ந்த இந்தியன் 3 ட்ரெய்லர்

இந்தியன் 2 படத்தின் இறுதிக்காட்சியில் இந்தியன் 3 படத்தின் ட்ரெய்லர் காண்பிக்கப்படும். இதில் சேனாபதியாக தந்தையாக வீரசேகரன் என்ற கதாபாத்திரத்தில் கமல்ஹாசனும், அவரது தாயார் கதாபாத்திரத்தில் காஜல் அகர்வாலும் தோன்றியிருப்பார்கள். இந்த பாகத்தில் இவர்கள் இருவருக்கும் இடையிலான காட்சிகள் அதிகமாக இருக்கும் என்றே தெரிகிறது. 

ப்ரீயட் மற்றும் போர் காட்சிகளுடன் இந்தியன் 3 படம் இருக்கும் என கூறப்பட்ட நிலையில், அதற்கு ஏற்றார் போல் குதிரையுடன் சண்டை மற்றும் போர் காட்சிகளும் ட்ரெயலரில் இடம்பிடித்துள்ளது. எனவே இந்தியாவுக்கு சுதந்திரபோரட்ட தீ பற்ற வைத்த பின்னணியை காட்டும் விதமாக படம் இருக்கும் என தெரிகிறது.

இந்தியன் 2 படத்தை காட்டிலும் இந்தியன் 3 படத்துக்கு தற்போதே எதிர்பார்ப்பு அதிகமாகியுள்ளது. மூன்றாம் பாகத்தை அடுத்த ஆறு மாதத்தில் வெளியிட திட்டமிட்டிருப்பதாக படக்குழுவினர் தெரிவித்துள்ளனர். 

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews 

Facebook" https://www.facebook.com/HTTamilNews 

You Tube: https://www.youtube.com/@httamil 

Google News: https://tamil.hindustantimes.com/