Indian 2 Box office: மியாவ்.. கதறும் இந்தியன் 2 தாத்தா.. ஷங்கரை வச்சு செய்யும் நெட்டிசன்கள்; வசூல் எவ்வளவு தெரியுமா?

இயக்குநர் ஷங்கர் இயக்கத்தில், நடிகர் கமல் நடிப்பில் அண்மையில் வெளியான இந்தியன் 2 திரைப்படம், வசூலில் சரிவை கண்டு இருக்கிறது. Sacnilk.com வெளியிட்டு இருக்கும் தகவலின் படி, இப்படம் இதுவரை 42 கோடிக்கு மேல் வசூலித்துள்ளது என்பது தெரியவந்திருக்கிறது. 

இந்தியாவில்  ‘இந்தியன் 2’ எவ்வளவு வசூல்? 

Sacnilk.com வெளியிட்டு இருக்கும் தகவலின் படி, இந்தியன் 2 திரைப்படம் வெளியான அன்றைய தினம் அந்தப்படம், தமிழில் 16.5 கோடி ரூபாயும், இந்தியில் 1.2 கோடி ரூபாயும்,தெலுங்கில் 7.9 கோடியும் வசூல் செய்திருக்கிறது. இரண்டாவது நாளில், தமிழில் 13.5  கோடி ரூபாயும், இந்தியில் 1.2 கோடி ரூபாயும், தெலுங்கில் 2.5 கோடி ரூபாயும் வசூல் செய்திருக்கிறது. மொத்தமாக பார்க்கும் போது, இரண்டு நாட்களில் இந்தியன் 2 திரைப்படம், தமிழில் 29.3 கோடி ரூபாயும், ஹிந்தியில் 2.4 கோடி ரூபாயும், தெலுங்கில் 10.4 கோடி ரூபாயும் வசூல் செய்திருக்கிறது. ஆக மொத்தத்தில், இந்தியன் 2 திரைப்படம் 2 நாளில் வெறும் 42.3 கோடி ரூபாய் மட்டுமே வசூல் செய்திருக்கிறது. 

படம் எப்படி இருந்தது?

Indian 2 Review: இயக்குநர் ஷங்கர் இயக்கத்தில், நடிகர்கள் கமல், சித்தார்த், ரகுல் ப்ரீத் சிங், விவேக், பிரியா பவானி ஷங்கர், மனோபாலா உள்ளிட்ட பலரது நடிப்பில், இன்று வெளியாகி இருக்கும் திரைப்படம் இந்தியன் 2. இந்தியன் முதல் பாகத்தின் ஏகோபித்த வெற்றி, இந்த படத்தின் மீதான எதிர்பார்ப்பை கூட்டி இருந்த நிலையில், இன்று இந்த திரைப்படம் வெளியாகி இருக்கிறது. இந்த படம் எப்படி இருந்தது என்பதை பார்க்கலாம்.

கதையின் கரு

இந்தியன் முதல் பாகத்தில், லஞ்சம் வாங்கிக்கொண்டு மக்களுக்கு எதிராக செயல்படும் அதிகாரிகளையும், அரசியல் வாதிகளையும், இந்தியன் தாத்தா கொல்வதை மைய கருவாக வைத்து கதை சொல்லி இருந்தார் இயக்குநர் ஷங்கர். தற்போது வெளியாகி இருக்கும் இரண்டாம் பாகத்திலும், அதுதான் மையக்கரு. ஒரே வித்தியாசம், தற்போதைய தலைமுறையில் லஞ்சத்தால் ஏற்படும் பிரச்சினைகளை கருவாக எடுத்து காட்சிகளை வடிவமைத்து இருக்கிறார் அவ்வளவுதான்.

அந்த பிரச்சினை சம்பந்தமான காட்சிகளை சித்தார்த்தையும், அவர் நடத்தி வரும் யூ- டியூப் சேனல் மூலமாகவும் நகர்த்தி இருக்கும் ஷங்கர், அதன் மூலமாக, பல்லாண்டுகளுக்கு முன்னதாக தாய்பேய்க்கு சென்ற இந்தியன் தாத்தாவிற்கு, சோசியல் மீடியா வழியாக அழைப்பு விடுகிறார்.

இந்தியா வரும் இந்தியன் தாத்தா

இதனையடுத்து இந்தியா வரும் இந்தியன் தாத்தா என்ன செய்தார்? இந்த முறை லஞ்சத்தை ஒழிக்க அவர் கையில் எடுத்த ஆயுதம் என்ன?... லஞ்சத்தை ஒழிக்க அவர் கூற வரும் தீர்வு என்ன? என்பதே படத்தின் கதை.

மிரட்டலான நடிப்பில் கமல் ஹாசன்

வழக்கம் போல கெட்டப்பிலும், நடிப்பிலும் கமல் ஹாசன் மிரட்டுகிறார். இந்தியன் தாத்தாவிற்கே உரித்தான கிடுக்கிலும், மிடுக்கிலும் அரட்டுகிறார். அவரை சுற்றியே பெரும்பான்மையான கதை நகர்வதால், இதர கதாபாத்திரங்கள் பெரிதாக கவனம் பெறவில்லை. ஆனாலும் கொடுத்த கதாபாத்திரத்துக்கு நடிகர்கள் நியாயம் செய்து இருக்கிறார்கள். ஆக்ஷன் காட்சிகளில் கமல் ஹாசன் பயன்படுத்தும் வர்ம முறைகள் ரசிக்க வைக்கின்றன. வசனங்களும் கவனம் ஈர்க்கின்றன.

இசை

ஏ. ஆர் ரஹ்மான் அளவிற்கு இல்லையென்றாலும், தன்னால் முடிந்த அளவு இசை கொடுத்து, படத்தை தூக்கி நிறுத்தி இருக்கிறார்அனிருத். திரைக்கதையின் வேகத்திற்கு ரவி வர்மாவின் கேமரா கண்கள் நகரும் விதம் அற்புதம்.

பெட்டர் லக் நெக்ஸ்ட் டைம்

முந்தைய பாகத்தில் இடம் பெற்ற காட்சிகளின் அழுத்தம், இந்த பாகத்தில் இல்லாத காரணத்தால் இந்தியன் தாத்தா ஒரு கட்டத்துக்கு மேல் சோதிக்க ஆரம்பித்து விடுகிறார். காதல், ரொமான்ஸ், கருத்து, ஆக்ஷன், காமெடி கலந்து கட்டி அடிக்கும் ஷங்கர், இதில் கருத்து ஒன்றை மட்டுமே பிரமாண்டத்தின் வாயிலாக கடத்த முயன்று இருந்தது படத்தின் பெரும் பலவீனம்.

மக்கள் தொகையில் சோசியல் மீடியாவில் இருப்பவர்கள் சொற்பமானவர்களே. அப்படி இருக்கும் போது, அதை வைத்தே பெரும் சாதனை புரிவது போன்ற காட்சிகளை வைத்திருப்பது அபத்தம். இளைஞர்களிடத்தில் மாற்றத்தை ஏற்படுத்துவதான் ஒரே வழி என்ற கருத்து உண்மை என்றாலும், அது தொடர்பான காட்சிகளில் அழுத்தமும், தாக்கமும் இல்லாமல் போனது ஏனோ? கருத்து கந்த சாமியோடு சேர்ந்த ஷங்கரின் ரெகுலரான கலவையும் படத்தில் இருந்த்திருந்தால் இந்தியன் 2 இன்னும் நன்றாக ரசித்திருக்கலாம். பெட்டர் லக் நெக்ஸ்ட் டைம் இயக்குநர் ஷங்கர்.

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, வேலைவாய்ப்பு, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.

சமூக வலைத்தளங்களில் எங்களை பின்தொடலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews

https://www.facebook.com/HTTamilNews

https://www.youtube.com/@httamil

Google News: https://bit.ly/3onGqm9