Actress Meena: விக்ரமுடன் ஜோடி சேர்ந்த 'காதலிசம்' இசை ஆல்பம் - ‘நீ போதும்’ பாடல் வெளியீட்டில் மீனா பகிர்வு

சமீப காலமாக தனிப்பட்ட ஆல்பம் பாடல்களும், சினிமா பாடல்களுக்கும் இணையான வரவேற்பை பெற்று வருகின்றன. அந்த வகையில் விடியோ ஆல்பம் மூலம் சினிமாவில் நுழைந்து தங்களுக்கான தனியொரு இடத்தை அடைபவர்களின் எண்ணிக்கை நாளுக்கு நாள் அதிகரித்தே வருகிறது.

இதையடுத்து பிரபல இசை நிறுவனமான லஹரி சார்பில் 'நீ போதும்' என்ற இசை ஆல்பம் உருவாகியுள்ளது.

பெண்களின் தன்னம்பிக்கையை மையப்படுத்தி உருவாகியுள்ள இந்த ஆல்பத்தில் நிரஞ்சனினா அசோகன் நாயகியாக நடித்துள்ளார். வம்சி குருகுரி இந்த ஆல்பத்தை இயக்கியுள்ளார். ஒளிப்பதிவு, படத்தொகுப்பு பணிகளையும் இவரே மேற்கொண்டுள்ளார்.

சுரேந்திரன் ஜோ எழுதியுள்ள பாடலை வரிகளுக்கு, ரஷாந்த் அர்வின் இசையமைக்க, சிந்தூரி விஷால் பாடலை பாடியுள்ளார்.

'நீ போதும்' ஆல்பத்தை நடிகை குஷ்பு, நடிகர் ஆர்யா ஆகியோர் இணைந்து ஆன்லைனில் வெளியிட்டனர். இதைத்தொடர்ந்து ஆல்பம் வெளியீட்டு விழா சென்னை சாலிகிராமம் பிரசாத் லேபில் நடைபெற்றது. இதில் சிறப்பு விருந்தினர்களாக கலந்துகொண்ட நடிகை மீனா, நடிகர்கள் ஷாம், பரத், இயக்குநர்கள் பரத், அரவிந்த் ஸ்ரீதர் ஆகியோர் ஆல்பத்தை அதிகாரப்பூர்வமாக வெளியிட்டனர்.

இந்த நிகழ்வில் ஆல்பத்தின் இயக்குநர் வம்சி குருகுரி பேசும்போது, “எனக்கு தமிழ் மொழி அவ்வளவாக தெரியாததால் தடுமாற்றம் ஏற்பட்டது. அப்போது நிரஞ்சனி அசோகன் தான் ஒவ்வொரு வார்த்தைக்கு அர்த்தம் சொல்லி தந்து உதவினார்.

இந்த பாடல் படப்பிடிப்பின்போது அழும் காட்சிகளுக்காக கிளிசரின் எடுத்து வர சொன்னார் நிரஞ்சனி. ஆனால் நான் அதை மறந்து விட்டேன். கிளிசரின் இல்லாமல் நிஜமாகவே அழுது நடிக்க முடியுமா என்ற அவரிடம் கேட்டேன். அதற்கு எந்த சிரமமும் அடையாமல் அவரும் அருமையாக செய்தார்" என்றார்.

பாடலாசிரியர் சுரேந்திரன் ஜோ பேசும்போது, "பெண்களுக்கென ஒரு பவர் இருக்கிறது என நான் உறுதியாக நம்புகிறேன். அதை மையக்கருத்தாக வைத்தே இந்த பாடலை எழுதினேன்” என்றார்.

நாயகி நிரஞ்சனி அசோகன் பேசும்போது, "இந்த கான்செப்ட் சொல்லும்போதே என் இதயத்தை தொட்டது. இந்த மொத்த புராஜெக்ட்டும் எனக்கு ஒரு மேஜிக் போல் இருந்தது. பல பிரச்னைகளை சந்தித்து அதையெல்லாம் கடந்து இன்று இந்த ஆல்பம் ரிலீசாகியுள்ளது.

தன்னம்பிக்கை பெண்ணின் கதையாக உருவாகியுள்ள இந்த ஆல்பத்தை நடிகை மீனா வெளியிட்டால் பொருத்தமாக இருக்கும் என நினைத்து அவரிடம் கேட்டோம். அவரும் உடனே ஒப்புக்கொண்டு இந்த நிகழ்வில் கலந்துகொண்டதில் மகிழ்ச்சி" என்று கூறினார்.

நடிகர் பரத் பேசும்போது, "யாக்கை திரி படத்தில் நடித்ததன் மூலம் நிரஞ்சனி அசோகன் எனக்கு அறிமுகமானார். ரொம்பவும் துணிச்சலான பெண். இயற்கையான நடிப்பை வெளிபடுத்துபவர். தன்னம்பிக்கை கொண்ட பாடல் வரிகளுடன் கூடிய இந்த ஆல்பத்துக்கு பொருத்தமானவர்" என்றார்.

நடிகை மீனா பேசும்போது, "இந்த பாடலை வெளியிடும் அளவுக்கு நான் சரியான ஆளா என்று தெரியாது. ஆனால் இதை வெளியிடுவதில் எனக்கு மகிழ்ச்சி.

புதியவர்களின் வருகையை எப்போதும் ஊக்குவிக்க நான் தயங்கியதே இல்லை. அதில் சொல்ல முடியாத ஒரு சந்தோஷம், திருப்தி கிடைக்கிறது. பல வருடங்களுக்கு முன்னால் நானும் சியான் விக்ரமும் காதலிசம் என்கிற ஆல்பத்தில் இணைந்து நடித்தோம். அந்த சூழலில் ஆங்கிலம் மற்றும் இந்தி ஆல்பங்கள் வரவேற்பை பெற்று வந்தாலும் தமிழில் எங்கள் ஆல்பத்தை எப்படி வெளியிடுவது, மக்களிடம் எப்படி கொண்டுபோய் சேர்ப்பது என்கிற வழிவகை தெரியாததால் அது ரிலீசாகமலேயே போய்விட்டது.

ஆனால் இந்த ஜெனரேஷனில் ஆல்பம் பாடல் குறித்து எல்லோருக்குமே தெரிந்துள்ளது. என்னால் செய்ய முடியாததை இன்னொருத்தர் செய்யும்போது அதை வெளியே தெரியப்படுத்த தான் இந்த நிகழ்வில் கலந்து கொண்டேன்" என்று கூறினார்.

நடிகர் ஷாம் பேசும்போது, "நல்ல படைப்பு வர வேண்டுமானால் நல்ல டீம் அமைய வேண்டும். அந்த வகையில் 'நீ போதும்' ஆல்பத்துக்கு நல்ல டீம் அமைந்துவிட்டது.

ஆல்பத்தில் ஒவ்வொருத்தரின் வேலையும் தனித்தனியாக தெரிகிறது. ஒரு ஆல்பம் பாடலுக்காக இவ்வளவு பெரிய டீமை அமெரிக்கா அழைத்து சென்று படப்பிடிப்பு நடத்தியுள்ளார்கள் என்றால் பிரமிப்பாக இருக்கிறது.

சுரேந்தர் ஜோ எனக்கு நல்ல நண்பர். என்னிடம் பல கதைகள் கூறியுள்ளார். ஆனால் அவருக்குள் இப்படி ஒரு பாடலாசிரியர் இருக்கிறார் என்பதை அவர் அப்போது வெளிப்படுத்தவே இல்லை.

'நீ போதும்' என டைட்டில் வைக்கப்பட்டுள்ள இந்த பாடலை பார்க்கும்போது, என் வீட்டினர், குறிப்பாக என் மனைவி அடிக்கடி சொல்லும் நீ தேவையில்லை என்கிற வார்த்தை தான் ஞாபகத்துக்கு வருகிறது.

அந்த அளவுக்கு பெண்கள் இன்று தனியே நின்று சாதிப்பவர்களாக மாறிவிட்டார்கள். இந்த ஆல்பத்துக்கு இரண்டம் பக்கம் உருவாக்கினால் 'நீ தேவையில்லை' என்கிற வார்த்தையையே டைட்டிலாக வையுங்கள்

இந்த ஆல்பத்தில் நடித்துள்ள நிரஞ்சனி அசோகன் தைரியமான பெண்ணாக இருக்கிறார். நடிப்பில் உடல்மொழி, ஸ்டைல், எமோஷன் என அனைத்தையும் வெளிப்படுத்தி உள்ளார்.

இந்த விழாவுக்கு மீனா வருகிறார் என்றதுமே நானும் கலந்துகொள்ள வேண்டும் என முடிவுசெய்து விட்டேன். அவருடன் படங்களில் இணைந்து நக்டிகும் வாய்ப்பு கிடைக்கவில்லை. ஆனால் டான்ஸ் ஷோ ஒன்றுக்காக அவருடன் ஆறு மாதம் இணைந்து பயணித்திருக்கிறேன்.

அப்போது விளையாட்டாக நான் ஒரு விஷயம் சொல்ல, அதற்காக கோபப்பட்ட மீனா இதுபோல நடந்துகொள்ள கூடாது, புரபஷனலாக நடந்து கொள்ளுங்கள் என அட்வைஸ் செய்தார். இந்த ஆல்பத்தை ரிலீஸ் செய்வதற்கு சரியான நபர் அவர் தான்" என்றார்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9