Top 10 Cinema News : விபத்தில் சிக்கிய நடிகர் ஜீவா, பாடகர் மனோ மகன்கள் மீது வழக்கு.. இன்றைய டாப் 10 சினிமா செய்திகள்!

ஹைவேயில் நடந்த விபத்து..பொறுமை இழந்து திட்டிய ஜீவா!

சேலத்தில் இருந்து சென்னைக்கு மனைவியுடன் காரில் சென்றபோது ஹைவேயில் நடிகர் ஜீவா விபத்தில் சிக்கியுள்ளார். விபத்தை ஏற்படுத்த காரணமாக இருந்த வாகன ஓட்டி மீது ஜீவா புகார் அளித்துள்ளார். விபத்தின் நடத்த இடத்தில் பொறுமை இழந்த நடிகர் ஜீவா ஒருவரை திட்டிய விடியோ வெளியாகியுள்ளது.

ஹீரோவாக அருண் விஜய்..முக்கிய கேரக்டரில் தனுஷ்!

பவர் பாண்டி என்ற படம் மூலம் இயக்குநராக அறிமுகமான நடிகர் தனுஷ், அதன் பின்னர் இரண்டாவதாக ராயன் படத்தை இயக்கினார். தான் இயக்கிய முதல் இரண்டு படங்களிலும் அவரே முன்னணி கதாபாத்திரத்தில் நடித்திருந்தார். இதைத்தொடர்ந்து மூன்றாவது படமாக தனுஷ் இயக்கி வரும் நிலவுக்கு என் மேல் என்னடி கோபம் படத்தில் ப்ரியா பிரகாஷ் வாரியர். அனிகா சுரேந்திரன், மேத்யூ தாமஸ் என இளம் நடிகர்கள் நடிக்கிறார்கள். ரெமான்டிக் காமெடி பாணியில் உருவாகும் இந்த படத்தை தனது உண்டர்பார் நிறுவனம் மூலம் தனுஷ் தயாரிக்கிறார். இந்த படத்தை தொடர்ந்து அவர் இயக்க இருக்கும் நான்காவது படத்தில் அருண் விஜய் கதையின் நாயகனாக நடிக்கிறார். முதல் முறையாக இன்னொரு ஹீரோவை இயக்க இருக்கும் தனுஷ், இந்த படத்தை முக்கிய கேரக்டரில் நடிக்க இருப்பதாக படக்குழுவுக்கு நெருக்கமானவர்கள் தெரிவித்துள்ளனர்.

ஹிப் ஆப் ஆதியின் கடைசி உலகப் போர்

ஹிப் ஆப் தமிழா ஆதி முதல் முறையாக தனது சொந்த தயாரிப்பு நிறுவனமான ஹிப் ஆப் தமிழா எண்டெர்டெயின்மெண்ட் நிறுவனத்தின் தயாரிப்பில் எழுதி, இயக்கி நடித்துள்ள படம் கடைசி உலகப்போர். இதன் பிரீ ரிலீஸ் நிகழ்ச்சி, சென்னை திருவேற்காடு அடுத்த நூம்பலில் நடைபெற்றது.இதில், திரைப்படத்தின் கதாநாயகி அனகா, நட்டி நடராஜன், சிங்கம்புலி, அழகன் பெருமாள், தலைவாசல் விஜய், ஹரிஷ் உத்தமன், கல்யான் மாஸ்டர் உட்பட பலர் கலந்து கொண்டனர். இதில் சிறப்பு விருந்தினராக இயக்குநர் சுந்தர் சி கலந்து கொண்டு திரைப்படத்தின் ஃப்ரி ரிலிஸை வெளியிட்டார்.

96 படத்தின் 2ஆம் பாகம்

பிரேம் குமார் இயக்கத்தில் விஜய் சேதுபதி, திரிஷா இணைந்து நடித்து வெளியான திரைப்படம் 96. 2018 ஆம் ஆண்டு வெளியான இந்த திரைப்படம் ரசிகர்கள் மத்தியில் நல்ல வரவேற்பை பெற்றது. நேர்காணல் ஒன்றில் பங்கேற்ற பிரேம் குமார் 96 படத்தின் 2 ஆம் பாகம் குறித்த முக்கிய அப்டேட் ஒன்றை கொடுத்துள்ளார். அவர் கூறும் போது, தற்போது 5 ஸ்க்ரிப்டுகள் கைவசம் உள்ளதாகவும், அதில் ஒன்று 96 படத்தின் 2 ஆம் பாகம் என்று கூறினார். இந்த படத்தின் திரைக்கதை ஏறக்குறைய முடிந்துவிட்டதாகவும் கூறினார். முதல் பாகத்தை போலவே 2 ஆம் பாகத்திலும் விஜய் சேதுபதி, திரிஷா மீண்டும் சேர்ந்து நடிப்பார்கள் என்று கூறினார்.

பாக்கியலட்சுமி சீரியலில் இருந்து வெளியேறியதற்கு இதுதான் காரணம் - நடிகை ரித்திகா!

திருமணத்திற்கு பிறகு பாக்கியலட்சுமி சீரியலில் இருந்து விலகியதற்கான காரணத்தை முதன் முறையை கூறியுள்ளார் நடிகை ரித்திகா. நேர்காணல் ஒன்றில் சமீபத்தில் பேசிய ரித்திகா திருமணத்திற்கு பிறகு நான் நடிக்க வேண்டும் என்றுதான் இருந்தேன், என்னை யாரும் தடுக்கவும் இல்லை. ஆனால், என் உடல்நிலையில் சில பிரச்சினைகள் இருந்தது அதனால்தான் நடிப்பை விட்டு விலகினேன். குழந்தை பிறந்த பிறகு மீண்டும் நடிக்க வருவேன் என்று கூறினார்.

பாடகர் மனோவின் 2 மகன்கள் மீது 4 பிரிவுகளில் வழக்குப் பதிவு!

தமிழ் சினிமாவின் பிரபல பின்னணி பாடகராக இருக்கும் மனோ தற்போது சின்னத்திரையில் ரியாலிட்டி ஷோக்களில் நடுவராக பங்கேற்று வரும் நிலையில், இவரது மகன், குடிபோதையில் சிறுவர்களை தாக்கியதாக கூறி 3 பிரிவுகளில் அவர் மீது வழக்கு பதிவு செய்யப்பட்டுள்ளதாக தகவல் வெளியாகியுள்ளது. இதனிடையே பாடகர் மனோவின் இரு மகன்களும் தலைமறைவாக இருக்கும் நிலையில், அவரது நண்பர்கள் கைது செய்யப்பட்டுள்ளதாக தகவல் வெளியாகியுள்ளது.

சீதாராம் யெச்சூரி மறைவுக்கு தவெக தலைவர் விஜய் இரங்கல்!

மார்க்சிஸ்ட் கம்யூனிஸ்ட் கட்சியின் மூத்த தலைவர்களில் ஒருவரும், அக்கட்சியின் பொதுச் செயலாளருமான சீதாராம் யெச்சூரி (வயது 72) நிமோனியா காய்ச்சலால் பாதிக்கப்பட்டு டெல்லி எய்ம்ஸ் மருத்துவமனையில் கடந்த சில வாரங்களாக சிகிச்சை பெற்று வந்தார். இந்நிலையில் நேற்று பிற்பகல் 03:05 மணிக்கு சிகிச்சை பலனின்றி அவர் காலமானார். நடிகரும் தமிழக வெற்றிக் கழகத் தலைவருமான விஜய், சீதாராம் யெச்சூரியின் மறைவுக்கு இரங்கல் தெரிவித்துள்ளார். இது தொடர்பான த.வெ.க. கட்சியின் எக்ஸ் தளப் பதிவில், “மார்க்சிஸ்ட் கம்யூனிஸ்ட் கட்சியின் பொதுச் செயலாளர் தோழர் சீதாராம் யெச்சூரின் மறைவு செய்தி கேட்டு வருத்தமடைந்தேன். முற்போக்கு அரசியலில் அவர் ஆற்றிய பங்களிப்பு எப்போதும் நினைவுகூரப்படும். அவரது குடும்பத்தினருக்கும், ஆதரவாளர்களுக்கும் எனது ஆழ்ந்த அனுதாபங்கள்” என்று குறிப்பிடப்பட்டுள்ளது.

திரையரங்குகளில் இடைவேளையை நீக்க வேண்டும - சீனு ராமசாமி

சீனு ராமசாமி இயக்கத்தில் உருவாகி இருக்கும் திரைப்படம் கோழிப்பண்ணை செல்லதுரை. இப்படத்தில் ஏகன், யோகி பாபு, பிரிகிடா, சத்யா, குட்டி புலி தினேஷ், லியோ சிவகுமார், ஐஸ்வர்யா தத்தா, பவா செல்லதுரை, மானஸி கொட்டாச்சி உள்ளிட்ட பலர் நடித்திருக்கிறார்கள். படத்தின் இசை வெளியீட்டு விழா நடைபெற்றது. இதில் படக்குழுவினருடன் விஜய் சேதுபதியும் கலந்து கொண்டார். இந்நிகழ்வில் சீனு ராமசாமி பேசுகையில் சினிமா உண்மையிலேயே ஒரு மாற்றத்தை சந்திக்க வேண்டும் என்றால் இடைவேளை என்ற ஒரு விஷயத்தை நீக்கிவிட வேண்டும். இது மிக முக்கியமான கருத்து.‌ உடனடியாக திரையரங்குகளில் பாப்கார்ன் உள்ளிட்ட பொருட்களை விற்பனை செய்பவர்கள் என் மீது கோபம் கொள்ளக்கூடாது. ஏனெனில் பாப்கார்ன் சாப்பிடுபவர்கள் எப்போது வேண்டுமானாலும் அதனை சாப்பிடுவார்கள். அந்தக் காலத்தில் நாடகத் துறையில் இருந்து சினிமா வந்தது. சம்பூர்ண ராமாயணம் - மூன்றரை மணி நேரம் திரைப்படமாக வந்தது. அதனை ஒரே தருணத்தில் தொடர்ச்சியாக திரையிட முடியாது என்பதற்காக இரண்டு முறை இடைவேளைகள் அளிக்கப்பட்டன.‌ இது நாளடைவில் ஒரு இடைவேளையாக மாற்றம் பெற்றிருக்கிறது.

ஜப்பானில் ரிலீசாகும் ஜவான்

கடந்த ஆண்டு அட்லீ இயக்கத்தில் ஷாருக்கான், நயன்தாரா, தீபிகா படுகோன், விஜய் சேதுபதி மற்றும் பலர் நடித்து வெளியான திரைப்படம் ஜவான். இத்திரைப்படத்தில் ஷாருக்கான் தந்தை மற்றும் மகன் என இரு வேடங்களில் நடித்து கலக்கிருப்பார். இப்படம் மக்களிடையே நல்ல வரவேற்பை பெற்று மாபெரும் வசூல் செய்தது. இதுவரை திரைப்படம் 1000 கோடி ரூபாய்க்கு மேல் வசூலித்துள்ளது. இந்நிலையில் ஜவான் திரைப்படம் ஜப்பானில் வெளியிடப்போவதாக படக்குழு தெரிவித்துள்ளனர். ஜப்பானில் வரும் நவம்பர் 29 ஆம் தேதி வெளியாகும் என அறிவித்து புது போஸ்டர் ஒன்றை வெளியிட்டுள்ளனர்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9 

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, வேலைவாய்ப்பு, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.