ராகுல் பதவி பறிப்பு.. ரயிலை மறித்து போராட்டம் - காங்கிரஸ் கட்சியினர் கைது

ராகுலின் எம்.பி பதவி பறிக்கப்பட்டதற்கு காங்கிரஸ் மற்றும் கூட்டணி கட்சித் தலைவர்கள் எதிர்ப்பு தெரிவித்தனர். இது தொடர்பாக மத்திய அரசைக் கண்டித்து காங்கிரஸ் கட்சியினரும் பல்வேறு பகுதிகளில் பல்வேறு முறைகளில் தொடர் போராட்டங்களை நடத்தி வருகின்றனர். இந்நிலையில் ராகுல் காந்தியின் தகுதி நீக்கத்திற்கு கண்டனம் தெரிவிக்கும் வகையில், தமிழகம் முழுவதும் காங்கிரஸ் கட்சி சார்பில் இன்று (ஏப்ரல் 15) ரயில் மறியல் போராட்டம் நடைபெறுகிறது.

ராகுல் காந்தியின் எம்.பி. பதவி பறிக்கப்பட்டதை கண்டித்து, சென்னை குரோம்பேட்டையில் புறநகர் ரயிலை மறித்து போராட்டத்தில் ஈடுபட்ட காங்கிரஸ் கட்சியை சேர்ந்த 60 பேரை போலீசார் கைது செய்தனர். சென்னை கடற்கரை - தாம்பரம் புறநகர் ரயிலை மறித்து மறியலில் ஈடுபட்ட காங்கிரஸ் கட்சியினரை போலீசார் குண்டுகட்டாக கைது செய்து அழைத்து சென்றனர். இதனால் அங்கு சிறிது நேரம் பரபரப்பு ஏற்பட்டது. புதுக்கோட்டையில் ரயில் மறியல் போராட்டத்தில் ஈடுபட்ட காங்கிரஸ் கட்சியை சேர்ந்த 200 பேர் கைது செய்யப்பட்டுள்ளனர். 

சேலம் ரயில் நிலையத்தில் கோவை எக்ஸ்பிரஸ் ரயில் முன்பு அமர்ந்து மறியலில் ஈடுபட்ட 150க்கும் மேற்பட்ட காங்கிரஸ் கட்சியினரை போலீசார் கைது செய்தனர். ராகுல் காந்தியின் எம்.பி. பதவி பறிக்கப்பட்டதை கண்டித்து தமிழ்நாடு முழுவதும் காங்கிரஸ் கட்சியினர் ரயில் மறியல் போராட்டத்தில் ஈடுபட்டு வருகின்றனர்.

சென்னை எழும்பூர் ரயில் நிலையத்தில் நடைபெறும் போராட்டத்தில் தமிழக காங்கிரஸ் கமிட்டி தலைவர் கே.எஸ். அழகிரி பங்கேற்கிறார். தமிழகம் முழுவதும் 76 இடங்களில் ரயில் மறியல் போராட்டம் நடைபெறுகிறது. முக்கிய ரயில் நிலையங்களில் ரயில் ம றியல் போராட்டத்தில் காங்கிரஸ் கட்சியின் நிர்வாகிகள் ஈடுபட உள்ளனர். காங்கிரஸ் கட்சி அறிவித்துள்ள மறியல் போராட்டத்தால் ரயில் நிலையங்களில் கூடுதல் பாதுகாப்பு போடப்பட்டுள்ளது.