மாநாட்டு மேடையில் தளபதி! ஆர்ப்பரிக்கும் தொண்டர்கள்! தவெக முதல் மாநாடு!

நடிகர் விஜய் அரசியலுக்கு வருவார் என பல ஆண்டுகளாக அவரது ரசிகர்களும் தந்தை எஸ்.ஏ.சந்திரசேகரும் கூறி வந்த நிலையில், சில நாட்களுக்கு முன் தனது அரசியல் வருகையை உறுதி செய்தார் விஜய். தனது ரசிகர் மன்ற உறுப்பினர்களை அழைத்து ஆலோசித்து, தமிழக வெற்றிக் கழகம் எனும் கட்சியையும், அதன் கொடி, பாடலையும் மக்களிடம் அறிமுகப்படுத்தி, அதனை தேர்தல் ஆணையத்திலும் பதிவு செய்தார்.

முழு நேர அரசியல்

இந்த அறிவிப்பைத் தொடர்ந்து, தான் சினிமாவில் இருந்து முழுவதுமாக விலகி முழுநேர அரசியலில் ஈடுபட உள்ளதாகவும் அறிவித்தார். இதற்கிடையே பல கட்ட ஆலோசனைகளுக்குப் பின் வரும் 2026ம் ஆண்டு நடைபெறவுள்ள சட்டப்பேரவைத் தேர்தலை மைய இலக்காக வைத்து செயல்படுவதாக அறிவித்த அவர், ஒவ்வொரு வார்டிலும் தமது கட்சி குறித்து மக்களிடம் எடுத்துரைக்கும் பணிகளில் தீவிரம் காட்டி வந்தார்.

தவெக முதல் மாநாடு

இதற்கிடையில், இன்று விக்கிரவாண்டி வி.சாலையில் தமது கட்சியின் முதல் மாநாட்டையும் நடத்துவதாக அறிவித்திருந்தார். இந்த மாநாட்டை நடத்துவதற்குள் பல சவால்களையும் இடர்களையும் கடந்து வந்தார் விஜய்.

பின், பல்வேறு கட்டுப்பாடுகளுடன் மாநாடு நடத்த அனுமதி வழங்கப்பட்டது. இதையடுத்து மாநாட்டின் பணிகள் மும்மரமாக நடந்து வந்த நிலையில், இன்று மாலை 6 மணிக்கு விஜய் அவரின் ரசிகர்கள் தொண்டர்கள் முன்னிலையில் உரையாற்ற உள்ளார்.

தயார் நிலையில் மாநாடு

இதற்காக 85 ஏக்கர் பரப்பளவில் மாநாடு நடக்கும் இடத்தில் ஏற்பாடுகள் நிறைவு பெற்றுள்ளது. மாநாட்டுக்காக 60 அடி அகலம், 170 அடி நீளத்துக்கு மேற்கூரையுடன் மேடை அமைக்கப்பட்டதுடன், மேடையில் இருந்து 800 மீட்டர் தொலைவுக்கு விஜய் நடந்து சென்று ரசிகர்களை சந்திக்கும் வகையில் ரேம்ப் அமைக்கப்பட்டுள்ளது.

தமிழக வெற்றி கழகத்தின் முதல் மாநாடு இன்று விழுப்புரம் மாவட்டத்தில் விக்கிரவாண்டில் நடைபெற்றுக் கொண்டிருக்கிறது. இந்நிலையில் தற்போது கட்சியின் தலைவர் விஜய் மாநாட்டு மேடைக்கு வந்தார். கட்சி கொடியை ஏற்றி வைத்து தொண்டர்களின் ஆர்ப்பரிக்கும் கூட்டத்திற்கு நடுவில் மகிழ்ச்சியுடன் உள்ளார். மேலும் இன்று ஏற்றப்பட்ட தவெக கொடி 100 வருடத்திற்கு பறக்க உள்ளது.