Uthukuli: லஞ்சம் வாங்கிய அ.தி.மு.க. ஊராட்சி மன்ற தலைவர்.. கையும் களவுமாக பிடித்து கைது

லஞ்சம் வாங்கிய அ.தி.மு.க. ஊராட்சி மன்ற தலைவரை லஞ்ச ஒழிப்பு போலீசார் கையும் களவுமாக பிடித்து கைது செய்தனர்.

திருப்பூர் மாவட்டம் ஊத்துக்குளி ஊராட்சி ஒன்றியத்திற்கு உட்பட்ட சுண்டக்காம்பாளையம் ஊராட்சியில் அ.தி.மு.க. வை சேர்ந்த ஆனந்த் (எ) லோகநாதன் என்பவர் ஊராட்சி மன்ற தலைவராக உள்ளார். அதே பகுதியை சேர்ந்த ராதாகிருஷ்ணன் என்பவர் மக்காச்சோளம் அறைக்கும் ஆலை நடத்தி வருகிறார். இவர் தனது ஆலை விரிவாக்கப்பணிக்காக சுண்டக்காம்பாளையம் ஊராட்சி மன்றத்தில் அனுமதி கோரி விண்ணப்பித்துள்ளார்.

இதையடுத்து ஆலை விரிவாக்கப் பணி அனுமதிக்காக மன்ற தலைவர் அதிமுக வை சேர்ந்த ஆனந்த் (எ) லோகநாதன், ராதாகிருஷ்ணனிடம் ஆறு லட்சம் ரூபாய் லஞ்சம் கேட்டுள்ளார். அதில் ஒரு பகுதியாக ஒரு லட்சம் ரூபாய் முன்னதாகவே கொடுக்கப்பட்டதாக கூறப்படுகிறது. இந்நிலையில் மீதி லஞ்ச பணத்தை ஆனந்த் தொடர்ந்து கேட்டு வந்ததால், திருப்பூர் மாவட்ட லஞ்ச ஒழிப்பு போலீசாரிடம் ராதாகிருஷ்ணன் புகார் அளித்துள்ளார்.

இதையடுத்து திட்டமிட்ட லஞ்ச ஒழிப்பு போலீசார், இரசாயன பொடி தடவப்பட்ட ரூபாய் நோட்டுகள் இரண்டு லட்சத்து முப்பதாயிரம் ரூபாயை ராதாகிருஷ்ணன் மூலமாக நேற்று கொடுத்துள்ளனர். அந்த பணத்தை ராதாகிருஷ்ணனிடமிருந்து ஊராட்சி மன்ற அலுவலகத்தில் வைத்து ஆனந்த் பெற்றுள்ளார். அப்போது அங்கு மக்களோடு மக்களாக மறைந்திருந்த திருப்பூர் மாவட்ட லஞ்ச ஒழிப்பு துறை ஆய்வாளர் கெளசல்யா தலைமையிலான லஞ்ச ஒழிப்பு போலீசார் கையும் களவுமாக இரசாயன பொடி தடவிய ரூபாய் நோட்டுகளுடன் ஊராட்சி மன்ற தலைவர் ஆனந்த் (எ) லோகநாதனை கைது செய்தனர்.

இதையடுத்து மன்ற அலுவலகத்தில் வைத்து சோதனை மேற்கொண்டு தீவிர விசாரணை நடைபெற்று வருகிறது. ஊராட்சி மன்ற தலைவர் லஞ்சம் பெறும் போது கையும் களவுமாக பிடிபட்டு கைது செய்யப்பட்டது அப்பகுதியில் பெரும் பரபரப்பை ஏற்படுத்தியுள்ளது. அப்பகுதியில் போலீசார் பாதுகாப்பு பணியில் ஈடுபடுத்தப்பட்டுள்ளனர்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9 

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.