Trichy Surya Vs Annamalai:’தமிழக பாஜகவில் பிராமணர், கவுண்டர், நாடார் லாபி?’ அண்ணாமலையை குறிவைக்கும் திருச்சி சூர்யா!

Jun 24, 2024, 02:19 PM IST

Trichy Surya Vs Annamalai: இதற்கெல்லாம் ஆரம்ப புள்ளியாக இருந்து கட்சியில் ரௌடிகள் இருக்கிறார்கள் என்றும், அதிமுகவுடனான கூட்டணியை கெடுத்து வெற்றியை தடுத்து விட்டார் என்றும் மாநிலத் தலைவரின் செயல்பாட்டையும் விமர்சனம் செய்த தமிழிசை மேல் நடவடிக்கை ஏன் இல்லை? நாடார் என்பதாலா? என திருச்சி சூர்யா கேள்வி

எங்களை பின் தொடரலாம்

’பாஜகவில் சாதி படிநிலை அடிப்படையில்தான் நடவடிக்கை பாயுமா?’ என அண்ணாமலை, தமிழிசை, எஸ்.வி.சேகர் ஆகியோரின் சாதிகளை குறிப்பிட்டு பாஜக உறுப்பினர் திருச்சி சூர்யா கேள்வி எழுப்பி உள்ளார்.

திருச்சி சூர்யா

நாடாளுமன்றத் தேர்தல் முடிவுகளுக்கு பிறகு பாஜக மாநிலத்தலைவர் அண்ணாமலையின் தீவிர ஆதரவாளராக இருந்த திருச்சி சூர்யா, பாஜக ஓபிசி அணியின் மாநில பொதுச்செயலாளராக பதவி வகித்த நிலையில், கடந்த ஜூன் 19ஆம் தேதி அன்று பாஜகவின் அனைத்து பொறுப்புகளில் இருந்து நீக்கப்பட்டார். கட்சி விவகாரங்கள் குறித்து பொதுவெளியில் கருத்து கூறியதால், இந்த நடவடிக்கை எடுக்கப்பட்டதாக கூறப்பட்டது.

கட்சித் தலைமையை விமர்சனம் செய்து ட்வீட்!

தற்போது பாஜகவின் அடிப்படை உறுப்பினராக மட்டும் இருக்கும், திருச்சி சூர்யா சிவா தனது ’எக்ஸ்’ சமூகவலைத்தளத்தில் இட்டுள்ள பதிவில், ”பாஜக மையக் குழுவில் கட்சி தலைமையும் தலைவர்களையும் விமர்சித்தவர்கள் யாராக இருந்தாலும் நடவடிக்கை எடுக்க வேண்டும் என்ற கோரிக்கையை ஏற்று என்னையும் கல்யாண ராம அவர்களையும் நீக்கினீர்கள் நியாயம் ஏற்றுக் கொள்கிறேன்.

நாடார் என்பதால் நடவடிக்கை இல்லையா?

இதற்கெல்லாம் ஆரம்ப புள்ளியாக இருந்து கட்சியில் ரௌடிகள் இருக்கிறார்கள் என்றும், அதிமுகவுடனான கூட்டணியை கெடுத்து வெற்றியை தடுத்து விட்டார் என்றும் மாநிலத் தலைவரின் செயல்பாட்டையும் விமர்சனம் செய்த தமிழிசை மேல் நடவடிக்கை ஏன் இல்லை? நாடார் என்பதாலா?

கவுண்டர் லாபியா?

தமிழிசை சொன்னதை உண்மை என்று இந்திய தேசிய பாஜக தலைமை கருதி இருந்தால் அண்ணாமலை மீது நடவடிக்கை எடுத்திருக்க வேண்டும். அதற்கு தடையாக இருந்தது எது கவுண்டர் லாபியா?

எஸ்.வி.சேகர் மீது நடவடிக்கை எடுக்காதது ஏன்?

தமிழ்நாட்டில் பாஜக நாற்பது இடங்களில் தோற்றதிற்கு வீட்டு வாசலில் வெடி வெடித்து கொண்டாடிய, திமுகவின் கலைஞர் 100 நிகழ்ச்சியில் மேடை ஏறி உரையாற்றிய SVe.சேகர் இன்னும் பாஜக உறுப்பினராக இருக்கிறார் ஏன் அவர் மீது நடவடிக்கை இல்லை?

பிராமணர் என்பதாலா? சாதி படிநிலை அடிப்படையில்தான் நடவடிக்கை பாயுமா?

எல்லோரும் இந்து என்று மேடையில் ஒப்புக்கு சொல்லிவிட்டு, சாதி லாபிகளுக்கு அடிபணிந்து Social Engineering அப்பட்டமாக அம்பலப்பட்டிருக்கிறது.” என விமர்சனம் செய்து உள்ளார்.

திருச்சி சூர்யா நீக்கம் - நடந்தது என்ன?

நாடாளுமன்றத் தேர்தல் முடிவுகள் வெளியான நிலையில், தமிழ்நாட்டில் பாஜக கூட்டணி சார்பில் போட்டியிட்ட வேட்பாளர்கள் அனைவரும் தோல்வி அடைந்தனர்.

அண்ணாமலையை விமர்சித்த தமிழிசை

இந்த நிலையில் தேர்தல் முடிவுகளுக்கு பின்னர் செய்தியாளர்களை சந்தித்து பேசிய பாஜக முன்னாள் மாநிலத் தலைவர் தமிழிசை சவுந்தராஜன், அதிமுக உடன் கூட்டணி வைத்து இருந்தால், திமுகவுக்கு இத்தனை இடங்கள் கிடைத்து இருக்காது என்பது கணக்கு ரீதியாக உண்மை. அதிமுக, பாஜக கூட்டணி எடுத்த வாக்குகளை கூட்டினால் திமுகவை விட அதிகமாக வந்து இருக்கும்.

கூட்டணி என்பது ஒரு அரசியல் வியூகம்தான், முழுமையாக கூட்டணியை தவிர்க்க வேண்டும் என்ற கருத்து அல்ல, தமிழ்நாட்டில் கூட்டணி குறித்து அகில பாரத தலைமைதான் முடிவு எடுக்க முடியும் என கூறி இருந்தார்.

மேலும், தனியார் ஊடகம் ஒன்றுக்கு பேட்டி அளித்து இருந்த தமிழிசை சவுந்தராஜன், “நான் கட்சியில் இருக்கும் போது சில அளவுகோலை வைத்து இருந்தேன். சமூகவிரோதிகள் போல் இருந்தால் அவர்களை ஊக்குவிக்கமாட்டேன். சமீபகாலத்தில் சமூகத்தில் நிறைய குற்றம்சாட்டப்பட்டவர்கள் இருக்கிறார்கள். அதை தவிர்த்து கட்சியில் கடுமையாக உழைக்க கூடிய தொண்டர்களுக்கு அதிகாரம் கொடுப்பேன்” என்றும் கூறி இருந்தார்.

ஊடகங்களில் பதிவிடுவது சரியா?

இந்த நிலையில் பாஜக முன்னாள் மாநிலத் தலைவர் தமிழிசை சவுந்தராஜன் கருத்துகளுக்கு எதிராக பாஜக மாநிலத் தலைவர் அண்ணாமலையின் தீவிர ஆதரவாளர் திருச்சி சூர்யா எதிர்ப்பு தெரிவித்து இருந்தார். இது தொடர்பாக ’எக்ஸ்’ சமூகவலைத்தளத்தில்ட்வீட் செய்து இருந்த அவர், தேசியத்திற்கு கட்டுப்பட்டு நடக்க வேண்டும் என்ற பாடம் எடுக்கக்கூடிய தாங்கள் ஒரு முன்னாள் மாநிலத் தலைவர் பொது ஊடகங்களில் இப்படி கருத்து பதிவிடுவது சரியா?

குற்ற பின்னணி உள்ளவர்கள் பாரதிய ஜனதா கட்சியில் சேர்க்கப்பட்டது என்பது தங்களுடைய பரிந்துரையில் மாநிலத் தலைவர் ஆக்கப்பட்ட எல்.முருகன் காலகட்டத்தில்தான் வேண்டுமென்றால் நான் பட்டியல் தருகிறேன்.

நீங்கள் இருந்தபோது கட்சியில் சேர ஆட்கள் வரவில்லை

கட்சியின் வளர்ச்சியையும் தனி நபருக்கு கிடைக்கும் புகழையும் ஏற்றுக்கொள்ள முடியாமல் இப்படி புலம்புகிறீர்கள் என்பது அப்பட்டமாக தெரிகிறது தாங்கள் மாநில தலைவராக இருந்தபோது கட்சியில் சேர்வதற்கு கூட ஆட்கள் முன்வரவில்லை என்பதே நிதர்சனம்.

அதிமுக கூட்டணி இருந்திருந்தால் அதிகம் இடங்கள் ஜெயித்திருக்கும் என்று தேசியத்தின் முடிவுக்கு எதிரான உங்கள் கருத்து கட்சி கட்டுப்பாடா?

பாஜகவுக்குள் தேர்தல் நிதிகள் சரியாக போய் சேரவில்லை என்ற பொதுத்தளத்தில் நீங்கள் பேசிய பிறகுதான் இன்று தமிழ்நாடு முழுவதும் அது பேசும் பொருளாக ஆகியது இது கட்சி கட்டுப்பாடா?

நடவடிக்கைகளை சந்திக்க தயார்

இப்படி எல்லாம் கட்டுப்படாத முன்னால் மாநிலத் தலைவரின் கருத்திற்கு அமைதி காக்கும் தேசியம் அதற்கு எதிர் வினையாற்றும் எங்கள் மேல் நடவடிக்கை எடுக்கும் பட்சத்தில் அதை சந்திக்க தயாராக உள்ளோம். பதவிக்காக நாங்கள் இந்த கட்சியில் இல்லை அண்ணனின் அன்புக்காக மட்டுமே உள்ளோம் என பதிவிட்டு இருந்தார்.

இந்த நிலையில் கட்சியின் கட்டுப்பாட்டை மீறி செயல்பட்டதாக பாஜக ஓபிசி மாநில பொதுச்செயலாளர் உட்பட அனைத்து பொறுப்புகளில் இருந்தும் திருச்சி சூர்யாவை விடுவிப்பதாக பாஜக தலைமை அறிக்கை வெளியிட்டது குறிப்பிடத்தக்கது.