TN CM Stalin: உலக அளவில் TREND ஆன தமிழக முதல்வர் பிறந்த நாள் ஹேஷ்டேக்!

தமிழக முதல்வர் மு.க.ஸ்டாலினுக்கு இன்று 70வது பிறந்த நாள்.

இவரது பிறந்த நாளை திமுகவினர் மகிழ்ச்சியுடன் கொண்டாடி வருகின்றனர்.

சமூக வலைத்தளங்களிலும் முதல்வர் ஸ்டாலினின் பிறந்தநாளையொட்டி #HBDMKStalin70 என்ற ஹேஷ்டேக் பிரபலமானது.

முதல்வர் ஸ்டாலினின் மகனும், தமிழக விளையாட்டுத் துறை அமைச்சருமான உதயநிதி ஸ்டாலின் டுவிட்டரில் இந்த ஹேஷ்டேக்கை சேர்த்து பதிவு வெளியிட்டார்.

அந்தப் பதிவில், "தமிழ்நாட்டிற்கான விடியலாய் திராவிட மாடல் ஆட்சியை நடத்திவரும் மாண்புமிகு முதலமைச்சர்

@mkstalin அவர்களின் 70-வது பிறந்தநாளில், பேரறிஞர் அண்ணா-முத்தமிழறிஞர் நினைவிடங்கள், பெரியார் திடலிலுள்ள தந்தை பெரியார் நினைவிடத்திலும் முதலமைச்சர் மற்றும் சக அமைச்சர்களுடன் மரியாதை செய்தோம். #HBDMKStalin70" என்று குறிப்பிட்டிருந்தார்.

இதேபோன்று பள்ளிக் கல்வித் துறை அமைச்சர் அன்பில் மகேஸ் பொய்யாமொழி வெளியிட்ட டுவிட்டர் பதிவில், "ஏற்றமிகு தமிழ்நாட்டை உருவாக்க அயராது உழைத்துக்கொண்டிருக்கும் எனது அரசியல் ஆசான் @mkstalin அவர்களுக்கு அவரின் மாணவனாக பிறந்தநாள் வாழ்த்துகளை தெரிவித்தேன். #HBDMKStalin70" என்று குறிப்பிட்டுள்ளார்.

இவரும் இந்த ஹேஷ்டேக்கை பயன்படுத்தி வாழ்த்தை பதிவிட்டார்.

தெலங்கானா ஆளுநர் தமிழிசை சவுந்தரராஜன் டுவிட்டரில் வாழ்த்துச் செய்தியை பகிர்ந்தார்.

அதில், "மாண்புமிகு தமிழக முதலமைச்சர் அண்ணன் திரு.மு.க.ஸ்டாலின் அவர்களுக்கு எனது மனமார்ந்த பிறந்த நாள் வாழ்த்துக்கள்... மக்களுக்கு

"தி"னமும்

"மு"ழு உடல் நலத்துடன்

"க"டமையாற்ற பிரார்த்தித்து வாழ்த்துகிறேன்...." என குறிப்பிட்டிருந்தார். அத்துடன் ஹேஷ்டேக்கையும் சேர்த்தே பதிவிட்டிருந்தார்.

நடிகை சிம்ரன் டுவிட்டரில் வெளியிட்ட வாழ்த்துச் செய்தியுடன் #HBDMKStalin70 இந்த ஹேஷ்டேக்கையும் சேர்த்து பதிவிட்டிருந்தார்.

இதுபோன்று அரசியல், திரைத்துறையினர், திமுகவினர் என பலதரப்பட்டவர்களும் #HBDMKStalin70 இந்த ஹேஷ்டேக்கை டிரெண்டாக்கியிருக்கின்றனர்.

திமுக தகவல் தொழில் நுட்ப அணியின் வெற்றியாகவும் இது கருதப்படுகிறது.