Actress Gowthami: அதிமுகவில் இணைந்தார் நடிகை கெளதமி! - காரணம் என்ன தெரியுமா?

அனைத்திந்திய அண்ணா திராவிட முன்னேற்ற கழப் பொதுச் செயலாளரும், சட்டமன்ற எதிர்கட்சித் தலைவரும், தமிழ்நாடு முன்னாள் முதலமைச்சருமான எடப்பாடி கே. பழனிசாமியை, பசுமை வழிச் சாலையில் உள்ள செவ்வந்தி இல்லத்தில் சந்தித்த நடிகை கெளதமி தன்னை அதிமுகவில் இணைத்துக்கொண்டார். முன்னதாக இவர் பாஜகவில் இருந்தது குறிப்பிடத்தக்கது. 

இந்த நிலையில் இந்த இணைவு குறித்து பேசிய கெளதமி, “முன்னாள் முதல்வரும் அதிமுக பொதுச் செயலாளருமான எடப்பாடி பழனிச்சாமியின் செயல்கள் கட்சியை அவர் முன் நின்று அவர் கொண்டு செல்லும் முறைகள், எல்லோரையும் ஒன்றிணைத்து அவர் புரியும் செயல்கள் ஆகியவற்றை நாம் கண்முன்னே பார்த்துக் கொண்டிருக்கிறோம். 

மக்களுக்கு நல்ல விஷயங்களை கொண்டு செல்வதற்கு சரியான கட்சியாகவும், தளமாகவும் அதிமுக இருக்கிறது என்பதில் எனக்கு முழு நம்பிக்கை ஏற்பட்டிருக்கிறது. கிட்டத்தட்ட 25 வருடங்களாக நான் பாரதிய ஜனதா கட்சியிலிருந்து இருந்து இருக்கிறேன். இன்று நான் அதிமுகவில் இணைந்திருக்கிறேன். 

சில நாட்களுக்கு முன்னதாக வேறு சில காரணங்களுக்காக அந்தக்கட்சியை விட்டு வெளியே வந்து விட்டேன். இந்த நிலையில் இன்று அண்ணன் எடப்பாடி பழனிச்சாமி அவர்களின் முன்னிலையில் அதிமுகவில் சேர்ந்தது மிகவும் மகிழ்ச்சியாக இருக்கிறது.

என்னிடம் ஒரு பொறுப்பை கொடுத்தால் அதற்காக இறங்கி வேலை செய்வேன் என்பது எல்லோருக்குமே தெரியும். அரசியலில் என்னுடைய ஈடுபாடு இப்போதுவரை அப்படித்தான் இருந்திருக்கிறது. இனிமேல் இன்னும் அது தீவிரமாக நடக்கும். நடப்பதற்கான வாய்ப்பும், அதற்கு சரியான இடமும் கிடைத்திருக்கிறது என்பதை முழுவதுமாக நம்புகிறேன்

அம்மா என் மனதில் இப்போதும் இருக்கிறார். அந்த உறவானது சினிமாவிற்கு அப்பாற்பட்டது. அம்மாவிற்கு பிறகு கட்சியை மிக நேர்த்தியாக எடப்பாடி பழனிச்சாமி அவர்கள் கொண்டு சென்று கொண்டிருக்கிறார்” என்று பேசினார்.