ஜேசிபி வாகனம் தலைகீழாக கவிழ்ந்து விபத்து: உடல் நசுங்கி ஒருவர் பலி

பழனி அருகே நெய்க்காரப்பட்டியில் பேரூராட்சி குப்பை கிடங்கில் ஜே.சி.பி வாகனம் கவிழ்ந்து விபத்துக்குள்ளானது தொடர்பாக போலீசார் வழக்கு பதிவு செய்து விசாரணை நடத்தி வருகின்றனர்.

திண்டுக்கல் மாவட்டம் பழனி அருகே நெய்க்காரப்பட்டி பேரூராட்சியில் குப்பை கிடங்கு உள்ளது. குப்பைகளை ஜே.சி.பி வாகனம் உதவியுடன் சரி செய்யும் பணி நடைபெற்று வந்தது. அப்போது எதிர்பாராதவிதமாக ஜே.சி.பி வாகனம் கவிழ்ந்து விபத்துக்குள்ளானது. இதில், அந்த வாகனத்தில் அமர்ந்திருந்த ஒருவர் மீது கீழே விழுந்ததில் உடல் நசுங்கி சம்பவ இடத்திலேயே பலியானார். இதுகுறித்து தகவல் அறிந்து வந்த பேரூராட்சி ஊழியர்கள் ஜே.சி.பி வாகனத்தில் சிக்கி இறந்தவரின் உடலை மீட்கும் பணியில் ஈடுபட்டனர்.

விபத்து குறித்து தாலுகா காவல் நிலையத்துக்கு தகவல் தெரிவிக்கப்பட்டது. சம்பவ இடத்துக்கு வந்த போலீசார் இறந்தவரின் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இந்த விபத்து குறித்து வழக்கு பதிவு செய்த தாலுகா காவல் நிலைய போலீசார் விசாரணை மேற்கொண்டு வருகின்றனர். 

போலீஸாரின் முதல்கட்ட விசாரணையில் விபத்தில் சிக்கி பலியான நபர் பழனி அடிவாரத்தைச் சேர்ந்த சுபாஷ் (22) எனவும், ஜே.சி.பி வாகனம் ஓட்டுனர் பாலசமுத்திரத்தைச் சேர்ந்த கார்த்திக் தனது நண்பருடன் இன்று பணியில் ஈடுபட்ட போது விபத்து ஏற்பட்டதும் தெரிய வந்துள்ளது.

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, வெப் ஸ்டோரி, வேலைவாய்ப்பு தகவல்கள், சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.