Palani temple: அமைச்சர் பிடிஆர் சென்ற ரோப் கார் பாதியில் நின்றதால் பரபரப்பு

திண்டுக்கல் மாவட்டம் பழனி அருள்மிகு தண்டாயுதபாணி சுவாமி திருக்கோயிலுக்கு தமிழக நிதி அமைச்சர் பழனிவேல் தியாகராஜன் சாமிதரிசனம் செய்ய வருகை தந்தார். அவர் மலைக்கோவிலுக்கு மேலே செல்வதற்காக அடிவாரத்தில் இருந்து ரோப்கார் மூலமாக சென்றார்.

அப்போது திடீரென மின்தடை ஏற்பட்ட நிலையில், மேலே சென்ற ரோப்கார் பாதியிலேயே அந்தரத்தில் தொங்கியபடி நின்றது.

அந்த ரோப் காரில் நிதியமைச்சருடன், திண்டுக்கல் மாவட்ட ஆட்சியர் விசாகன் உள்ளிட்ட அரசு அலுவலர்களும் உடன் இருந்தனர். சுமார் இரண்டு நிமிட காத்திருப்புக்கு பிறகு மின்சாரம் வந்தவுடன் மீண்டும் ரோப் கார் இயக்கப்பட்டது.

இதைத்தொடர்ந்து மலைக்கோயிலுக்கு சென்ற நிதி அமைச்சர் பழனிவேல் தியாகராஜன் பழனிமுருகனை தரிசனம் செய்தார். அவருக்கு திருக்கோயில் சார்பில் பிரசாதம் வழங்கபட்டது.

சாமி தரிசனத்துக்கு பின்னர் மீண்டும் ரோப்கார் வழியாகவே அமைச்சர் கீழே இறங்கினார்.

கடந்த சில நாள்களுக்கு முன்னர் சென்னையிலுள்ள அரசு ஸ்டான்லி மருத்துவமனையில் நடைபெற்ற நிகழ்ச்சியில் பங்கேற்க சென்றிருந்த தமிழக சுகாதாரத் துறை அமைச்சர் மா. சுப்பிரமணியன் லிப்ட் பழுதாகி பாதி வழியில் நிற்க, அதில் சிக்கிய அவர் அவசரவழி மூலம் வெளியேறினார்.

இதைத்தொடர்ந்து தற்போது அமைச்சர் பழனிவேல் தியாகராஜன் சென்ற ரோப்கார் பாதி வழியில் அந்தரத்தில் தொங்கிய நிலையில் பின்னர் மீண்டும் இயக்கப்பட்டது சிறிது நேரம் பரபரப்பை ஏற்படுத்தியது.