Football Player Priya Dies : கால் அகற்றப்பட்ட கால்பந்து வீராங்கனை உயிரிழப்பு!

சென்னை : வியாசர்பாடி பகுதியினைச் சேர்ந்தவர் பிரியா. சென்னை ராணி மேரி கல்லூரியில் முதலாம் ஆண்டு படித்து வந்த இவர் கால்பந்து விளையாட்டிலும் பயிற்சி பெற்று வந்தார்.தேசிய அளவிலான போட்டிகளில் பங்கேற்று பல சாதனைகளை படைத்து வந்த பிரியா, அண்மையில் பயிற்சியின்போது காலில் தசை பிடிப்பு ஏற்பட்டது .

இதை அடுத்து சென்னை ராஜீவ்காந்தி மருத்துவமனையில் பரிசோதனைக்காக சென்றிருந்தர்.அப்போது காலில் தசை பிடிப்பால் சவ்வு விலகி இருப்பது பரிசோதனையில் தெரிய வந்தது. இதை அடுத்து மருத்துவர்களின் பரிந்துரைப்படி வீட்டின் அருகே உள்ள கொளத்தூர் அரசு புறநகர் மருத்துவமனையில் சிகிச்சை பெற்று வந்தார்.

தசைப் பிடிப்புக்கு அறுவை சிகிச்சையும் செய்தார். ஆனாலும் பிரியாவுக்கு காலில் வலி குறையாமல் இருந்தது . இதையடுத்து மேல்சிகிச்சைக்காக சென்னை ராஜீவ் காந்தி அரசு மருத்துவமனைக்கு அவர் அனுமதிக்கப்பட்டார். அங்கு அவருக்கு மருத்துவர்கள் தீவிர சிகிச்சை அளித்து வந்தனர். 

மேலும் மருத்துவ பரிசோதனை செய்யப்பட்டது. இதில் அவரது வலது காலில் ரத்த ஓட்டம் தடைப்பட்டதும், அதனால் தான் அறுவை சிகிச்சைக்கு பிறகு கால் வீங்கியதும் தெரியவந்தது. இது உயிருக்கு ஆபத்தை ஏற்படுத்தலாம் எனக்கூறி அவரது வலது கால் அகற்றப்பட்டது.

இந்நிலையில், சென்னை பெரியார் நகர் அரசு மருத்துவமனையில் அளிக்கப்பட்ட தவறான சிகிச்சையால் தான் கால் அகற்றப்பட்டதாக குற்றம்சாட்டினர். மேலும் கவனக்குறைவாக உள்ள மருத்துவர்கள் மீது நடவடிக்கை எடுக்க வேண்டும் என அவர்கள் கோரிக்கை விடுத்தனர். இதையடுத்து அரசு சார்பில் விசாரணைக்கு உத்தரவிடப்பட்டது.

இந்நிலையில், சென்னை ராஜீவ் காந்தி மருத்துவமனையில் சிகிச்சை பெற்ற பிரியா இன்று காலை 7.15 மணியளவில் உயிரிழந்தார். சிகிச்சை பலனின்றி பிரியா இறந்தார். இது பெரும் சோகத்தை ஏற்படுத்தி உள்ளது.