Lyricist Thamarai : அவதூறுகளை பரப்புகிறார்..பாடலாசிரியர் தாமரை மீது புகார்!

சென்னை ஐயப்பன்தாங்கல் பகுதியை சேர்ந்தவர் விஜயலட்சுமி (36).சென்னையில் தனியார் டிவியில் பணியாற்றி வருகிறார். இவர் பிரபல சினிமா பாடலாசிரியர் தாமரை மீது ஆவடி காவல் ஆணையரகத்தில் புகார் ஒன்றை கொடுத்துள்ளார்.

அதில், தாமரை, கடந்த சில நாட்களாக சமூக வலைதளங்களில் என்னைப் பற்றி அவதூறுகளை பரப்பி வருகிறார். என் மீது தாமரையின் தனிப்பட்ட பழிவாங்கும் நடவடிக்கைகளால் கடந்த 10 ஆண்டுகளாக நானும் எனது மகள்களும் மன உளைச்சலில் வாழ்ந்து வருகிறோம். இறந்து போன எனது இரண்டாவது கணவர் ரத்னசீலன் மரணத்திற்கு, நான் தான் காரணம் எனவும், ரத்னசீலன் குடும்பத்தாருடன் இணைந்து கொண்டு தவறான தகவல்களையும், அவதூறுகளையும் தாமரை பொதுவெளியில் பரப்பி வருகிறார்.

அவருக்கான நீதியை அவர், அநீதி இழைத்தவரிடம் தான் கேட்க வேண்டும். அதைவிட்டு என்னை தொடர்ந்து தொந்தரவு செய்வது அபத்தம். தன் மீதான எந்த சட்ட நடவடிக்கைகளுக்கும் தான் எப்போதும் தயாராகவே இருக்கிறேன்”என அந்த புகார் மனுவில் தெரிவித்துள்ளார்.

முன்னதாக, கோவை மாவட்டம் சூலூர் அருகே உள்ள தென்னம்பாளையம் பகுதியை சேர்ந்தவர் சிவா என்கிற ரத்தினசீலன், கடந்த செப்டம்பர் மாதம் 21ஆம் தேதி தற்கொலை செய்து கொண்டார். சிவா குடும்ப பிரச்சனை காரணமாக தற்கொலை செய்துகொண்டதாக என வழக்குப்பதிவு செய்யப்பட்டிருந்தது.

இந்த விவகாரம் பாடல் ஆசிரியை தாமரையால் தற்போது பூதாகரமாகியுள்ளது. இந்த பெண்ணால்தான் தனது வாழ்க்கை நாசமானது என பகிரங்கமாக பதிவிட்டிருந்தார். தாமரையின் கணவர் தியாகுவிற்கும் , விஜயலட்சுமிக்கும் ஏற்பட்ட தொடர்பு காரணமாக தனது குடும்ப வாழ்க்கை பாதிக்கப்பட்டதாகவும், இந்த விஜி என்கிற விஜயலட்சுமி குறித்து கவிஞர் தாமரை தனது முகநூல் பக்கத்தில் பதிவிட்டிருந்தார்.

கோவையில், தன்னை விட ஏழு வயது குறைந்த, மணமாகாத ஓர் அப்பாவி இளைஞனை ஏமாற்றித் திருமணம் செய்து, அச்சுறுத்தி, தற்கொலை செய்து கொள்ள வைத்துவிட்டார் விஜி என்கிற விஜயலட்சுமி என தாமரை தெரிவித்துள்ளார். இதுதொடர்பாக அவரின் முகநூல் பக்கத்தில் பதிவிட்டுள்ள கவிஞர் தாமரை, இன்பாக்ஸ் அரட்டையில் தனக்குத் தோதான ஆளைத் தேர்ந்தெடுத்து அடுத்தடுத்த செயல்களில் வீழ்த்தி தன்னை விட்டு விலகாமல் பார்த்துக் கொள்வது, அதையே பிணையாக வைத்து தனக்கு வேண்டியதெல்லாம் பெற்றுக் கொள்வது, சட்டி காலியானவுடன் கழற்றி விடுவது, இதுதான் விஜியின் வேலை என விமர்சித்துள்ளார்.

கவிஞர் தாமரையின் இந்த பதிவால் பெரும் கவனம் பெற்றுள்ளது இந்தச் சம்பவம். மேலும், சிவாவின் தற்கொலைக்கு காரணம் அவரது மனைவி விஜி பழனிசாமி தான் என வீடியோ ஆடியோ ஆதாரங்களுடன் சிவாவின் பெற்றோர் கோவை மாவட்ட காவல் கண்காணிப்பாளர் அலுவலகத்தில் புகார் அளித்தனர். இதனையடுத்து இந்த வழக்கை காவல்துறை தீவிர விசாரணை மேற்கொண்டு வருகிறது.

இந்நிலையில் தான் பிரபல சினிமா பாடல் ஆசிரியர் தாமரை மீது ஆவடி காவல் ஆணையரகத்தில் தனியார் நிறுவன ஊழியர் விஜயலட்சுமி புகார் ஒன்றை கொடுத்துள்ளார்.