TNPL Today Match: சுழலில் ஜாலம் செய்த பவுலர்கள் - திருப்பூர் தமிழன்ஸ்-ஐ சிக்கலில் சிக்க வைத்த சேலம் ஸ்பார்டன்ஸ்

டிஎன்பிஎல் 2023 தொடரின் 22வது போட்டி திருப்பூர் தமிழன்ஸ் - சேலம் ஸ்பார்டன்ஸ் அணிகளுக்கு இடையே நடைபெற்றது. திருநெல்வேலி இந்தியா சிமெண்ட்ஸ் மைதானத்தில் நடைபெற்ற இந்த போட்டியில் 8 ரன்கள் வித்தியாசத்தில் சேலம் அணி வெற்றி பெற்றது. இந்த சீசனில் இரண்டாவது வெற்றியை பதிவு செய்த சேலம் அணி, ப்ளேஆஃப்புக்கான வாய்ப்பு கதவுகளை திறந்துள்ளது.

இந்த போட்டியில் முதலில் பேட் செய்த சேலம் ஸ்பார்டன்ஸ் 20 ஓவரில் 155 ரன்களுக்கு ஆல்அவுட்டானது. அந்த அணியின் சன்னி சந்து மட்டும் அதிகபட்சமாக 61 ரன்கள் எடுத்தார். திருப்பூர் பவுலர்களில் புவனேஷ்வரன் 48 ரன்களை வாரி வழங்கியபோதிலும் 3 விக்கெட்டுகளை வீழ்த்தினார்.

திரிலோக் நாக், சாய் கிஷோர் ஆகியோர் தலா 2 விக்கெட்டுகளை வீழ்த்தினர். இந்த போட்டியில் வென்றால் மட்டுமே ப்ளேஆஃப் வாய்ப்பை தக்க வைத்துக்கொள்ள முடியம் என்ற சூழ்நிலையில் சேஸிங்கில் களமிறங்கியது திருப்பூர் அணி.

அந்த அணிக்கு சிறப்பான தொடக்கம் அமைந்தபோதிலும், சீரான இடைவெளியில் விக்கெட்டுகள் வீழ்ந்தன. ஒரு கட்டத்தில் சேலம் அணி ஸ்பின்னர்களான சச்சின் ராட்டி, இம்பேக்ட் வீரராக களமிறக்கப்பட்ட செல்வகுமரன் ஆகியோர் திருப்பூர் பேட்ஸ்மேன்களை ரன்குவிக்க விடாமல் கட்டுப்படுத்தினர்.

இதையடுத்து 20 ஓவர் முடிவில் 9 விக்கெட் இழப்புக்கு திருப்பூர் அணி 147 ரன்கள் மட்டுமே எடுத்து தோல்வியை தழுவியது. ஆட்டத்தின் கடைசி ஓவரில் 14 ரன்கள் தேவைப்பட்ட நிலையில், சந்து வீசிய அந்த ஓவரில் 5 ரன்கள் மட்டுமே எடுக்கப்பட்டது.

இந்த தோல்வியால் திருப்பூர் அணியுடன் தற்போது சேலம் அணியும் 6 போட்டிகளில் 2 வெற்றியை பெற்றிருப்பதுடன், ப்ளே ஆஃப்புக்கான ரேசில் இணைந்துள்ளது.