Shaheen Afridi: முதல் ஓவரில் 4 விக்கெட்டுகள்! உலக சாதனை புரிந்த பாகிஸ்தான் பவுலர் அப்ரிடி - விடியோ

இங்கிலாந்தில் டி20 பிளாஸ்ட் 2023 தொடர் நடைபெற்று வருகிறது. இதில் நாட்டிங்கம்ஷைர் - பிரிமிங்ஹாம் பியர்ஸ் அணிகள் மோதிய போட்டியில் ஷாகின் அப்ரிடி உலக சாதனை புரிந்துள்ளார். டிரெண்ட் பிரிஜில் நடைபெற்ற இந்த போட்டியில் நாட்டிங்கம்ஷைர் அணிக்காக களமிறங்கிய ஷாகின் அப்ரிடி ஆட்டத்தின் முதல் ஓவரிலேயே 4 விக்கெட்டுகளை வீழ்த்தினார்.

டி20 கிரிக்கெட் வரலாற்றில் முதல் ஓவரிலேயே 4 விக்கெட்டுகள் வீழ்த்தப்பட்டது இதுவே முதல்முறையாகும். அந்த வகையில் ஷாகின் அப்ரிடி உலக சாதனை புரிந்துள்ளார். ஆனாலும் இந்தப் போட்டியில் அப்ரிடி விளையாடிய நாட்டிங்கம்ஷைர் அணி தோல்வியை தழுவியது.

முன்னதாக, முதலில் பேட் செய்த நாட்டிங்கம்ஷைர் அணி 20 ஓவரில் 168 ரன்கள் அடித்தது. இதை சேஸ் செய்ய களமிறங்கிய பிரிமிங்ஹாம் அணியின் டாப் ஆர்டரை முதல் ஓவரிலேயே தனது அபார பந்து வீச்சால் காலி செய்தார் ஷாகின் அப்ரிடி.

இருந்தபோதிலும் 19.1 ஓவரில் 8 விக்கெட் இழப்புக்கு 172 ரன்கள் எடுத்து பிரிமிங்ஹாம் அணி வெற்றி பெற்றது. இந்த போட்டியில் 4 ஓவர்கள் வீசிய அப்ரிடி ஒரு மெய்டனுடன், 29 ரன்களை விட்டுக்கொடுத்து 4 விக்கெட்டுகளை எடுத்தார்.

ஷாகின் அப்ரிடி துல்லியமான யார்க்கர் மூலம் ஸ்டம்ப் தெறிக்கும் விதமாக இரண்டு கிளீன் போல்ட், ஒரு எல்பிடபிள்யூ, ஒரு கேட்ச் என 4 விக்கெட்டுகளை எடுத்தார். டி20 கிரிக்கெட்டில் மாயஜாலம் நிகழ்த்திய ஷான் அப்ரிடி வீசிய இந்த ஓவரின் விடியோ சமூக வலைத்தளங்களில் வைரலாகியுள்ளது.

ஆட்டத்தின் முதல் பந்து வைடு வீசி, கீப்பரிடம் மிஸ் ஆகி பவுண்டரி செல்ல 5 ரன்களை விட்டு கொடுத்தார். இதைத்தொடர்ந்து வீசிய பந்தில் எல்பிடபிள்யூ, அடுத்த பந்தில் ஸ்டம்புகள் தெறிக்கும் விதமாக போல்டாக்கி அடுத்தடுத்து 2 விக்கெட்டுகளை வீழ்த்தினார்.

இதன் பின்னர் ஹாட்ரிக்கை மிஸ் செய்த அப்ரிடி, அந்த ஓவரின் கடைசி இரண்டு பந்தில் கேட்ச் மற்றும் போல்டு என இரண்டாவது முறையாக அடுத்தடுத்து இரண்டு விக்கெட்டுகளை வீழ்த்தினார்.

தற்போது டி20 பிளாஸ்ட் தொடரில் பங்கேற்று வரும் ஷாகின் அப்ரிடி, இந்த மாதம் இலங்கை சுற்றுப்பயணம் செய்யும் பாகிஸ்தான் அணியிலும் விளையாடவுள்ளார். பாகிஸ்தான் அணி இலங்கைக்கு எதிராக இரண்டு டெஸ்ட் போட்டிகளில் விளையாடவுள்ளது.

இந்த ஆண்டு ஆகஸ்ட் மாதம் நடைபெற இருக்கும் ஆசிய கோப்பை ஒரு நாள் தொடர், அக்டோபர் - நவம்பரில் நடைபெற இருக்கும் உலகக் கோப்பை 2023 தொடரில், பாகிஸ்தான் அணியின் முக்கிய பவுலராக இருந்து வருகிறார் ஷாகின் அப்ரிடி.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9