Praggnanandhaa Meets CM: முதலமைச்சர் ஸ்டாலினை சந்தித்த பிரக்ஞானந்தா! ரூ. 30 லட்சம் பரிசு அளித்து வாழ்த்து

அஜர்பைஜான் நாட்டில் நடைபெற்ற ஃபிடே உலக கோப்பை செஸ் சாம்பியன்ஷிப் போட்டியில் இந்தியாவை சேர்ந்த இளம் கிராண்ட் மாஸ்டர் பிரக்ஞானந்தா இரண்டாவது இடத்தை பிடித்தார். இதைத்தொடர்ந்து நாடு திரும்பிய அவருக்கு சென்னை விமான நிலையத்தில் உற்சாக வரவேற்பு அளிக்கப்பட்டது.

இதைத்தொடர்ந்து சென்னை கோட்டையில் உள்ள முகாம் அலுவலகத்தில் பிரக்ஞானந்தாவை சந்தித்தார் முதலமைச்சர் மு.க. ஸ்டாலின். பின்னர் அவரை பாராட்டி ஊக்குவிக்கும் விதமாக ஊக்கத் தொகையாக ரூ. 30 லட்சம் காசோலை மற்றும் நினைவுப் பரிசை வழங்கி, வாழ்த்தினார்.

விளையாட்டு துறையில் இந்தியாவிலேயே சிறந்த மாநிலமாக தமிழ்நாட்டை உருவாக்கிடவும், அகில இந்திய அளவிலும் பன்னாட்டு அளவிலும் நடைபெறும் பல்வேறு விளையாட்டுப் போட்டிகளில் தமிழ்நாட்டைச் சேர்ந்த விளையாட்டு வீரர்கள் மற்றும் வீராங்கனைகள் பங்கு கொண்டு வெற்றி பெறும் வகையில் அவர்களுக்கு உரிய பயிற்சி அளித்தல், உயரிய ஊக்கத்தொகை வழங்குதல், விளையாட்டுக்கான உட்கட்டமைப்பு வசதிகளை ஏற்படுத்துதல் என பல்வேறு முனைப்பான நடவடிக்கைகளை தமிழ்நாடு அரசு எடுத்து வருகிறது.

44வது செஸ் ஒலிம்பியாட் போட்டி அனைவரும் பாராட்டும் வகையில் தமிழ்நாட்டில் சிறப்பாக நடத்தப்பட்டது. மாநிலத்தில் அதிநவீன விளையாட்டு உட்கட்டமைப்பு வசதிகளை பெரு நிறுவனங்கள் மற்றும் தனிப்பட்ட நன்கொடையாளர்களிடமிருந்து நன்கொடை பெற்று ஏற்படுத்திட “தமிழ்நாடு சாம்பியன்ஸ் அறக்கட்டளை” உருவாக்கப்பட்டது.

சர்வதேச விளையாட்டுப் போட்டிகளை தமிழ்நாட்டில் நடத்திட தேவையான உட்கட்டமைப்பு வசதிகளை ஏற்படுத்துவது போன்ற பல்வேறு திட்டங்களை செயல்படுத்தி வருகிறது.

சர்வதேச செஸ் விளையாட்டு வீரரும் இந்தியாவின் கிராண்ட் மாஸ்டருமான பிரக்ஞானந்தா, 3 வயது முதல் செஸ் விளையாட தொடங்கி, 5 வயது முதல் செஸ் தொடர்களில் பங்கேற்று வருகிறார்.

10 வயதில் சர்வதேச மாஸ்டர் பட்டம் வென்று இளம் வயதில் இந்தப் பட்டத்தை வென்ற வீரர் என்ற பெருமையை பெற்றுள்ளார். 2013ஆம் ஆண்டு 8 வயதுக்குட்பட்ட உலக சாம்பியன்ஷிப் பட்டத்தையும், 2015ஆம் ஆண்டு 10 வயதுக்குட்பட்ட உலக சாம்பியன்ஷிப் பட்டத்தையும் வென்றார்.

12 வயதில் கிராண்ட்மாஸ்டர் பட்டம் பெற்று அன்றைய காலத்தில் குறைந்த வயதில் கிராண்ட் மாஸ்டர் பட்டம் பெற்ற இரண்டாவது இளம் வீரர் என்ற சாதனையும், 16 வயதில் முன்னாள் உலக சாம்பியனை வீழ்த்தி சாதனையும் படைத்துள்ளார்.

அத்துடன் இளம் வயதில் இந்தியாவில் இருந்து உலக கோப்பை தொடரின் இறுதி போட்டிக்கு முன்னேறிய வீரர் என்ற சாதனையைும் படைத்துள்ளார். செஸ் CANDIDATE தொடரில் விளையாட தேர்வாகி உள்ள இரண்டாவது இந்திய வீரர் என்ற பெருமையை பெற்றுள்ள பிரக்ஞானந்தா, ஃபிடே செஸ் ஒலிம்பியாட் தொடரில் பங்கேற்று தனி வீரராகவும் வெண்கலப் பதக்கம் வென்றுள்ளார்.

கடந்த ஆண்டு ஆசிய செஸ் சாம்பியன்ஷிப் தொடரில் பங்கேற்று தங்கப் பதக்கமும் வென்றுள்ளார். அஜர்பைஜான் நாட்டின் பாகு நகரில் நடைபெற்ற ஃபிடே உலக கோப்பை செஸ் சாம்பியன்ஷிப் போட்டியில் சிறப்பாக விளையாடி இரண்டாவது இடத்தை பெற்ற பிரக்ஞானந்தாவை, முதலமைச்சர் மு.க.ஸ்டாலின் விடியோ கால் வாயிலாக தொடர்பு கொண்டு தனது வாழ்த்துகளை தெரிவித்திருந்தார்.

இதன் பின்னர் நாடு திரும்பிய அவருக்கு சென்னை விமான நிலையத்தில் தமிழ்நாடு அரசின் சார்பில் சிறப்பான வரவேற்பு அளிக்கப்பட்டது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9