PKL 2023: ஒரே புள்ளியில் கோட்டை விட்ட தமிழ் தலைவாஸ்! ஹாட்ரிக் தோல்வியால் சிக்கல் - ஜெயிப்பூர் சூப்பர் வெற்றி

புரோ கபடி லீக் 2023 தொடர் அகமதாபாத், பெங்களுரு, புனே நகரங்களை தொடர்ந்து தற்போது நான்காவது கட்டமாக சென்னையில் நடைபெற்று வருகிறது. இதையடுத்து தொடரின் 36வது போட்டி தமிழ் தலைவாஸ் - ஜெயிப்பூர் பிங்க் பேந்தர்ஸ் அணிகளுக்கு இடையே நடைபெற்றது.

ஏற்கனவே இரண்டு தொடர் தோல்விகளால் துவண்டு போயிருக்கும் தமிழ் தலைவாஸ் அணி வெற்றிப்பாதைக்கு மீண்டும் திரும்ப வேண்டிய கட்டாயத்தில் களமிறங்கியது. உள்ளூர் ரசிகர்கள் முன்னிலையில் உற்சாகத்துடனே செயல்பட்ட தமிழ் தலைவாஸ் வீரர்கள் கவனமுடன் விளையாடினர். தமிழ் தலைவாஸ் வீரர்களுக்கு ஈடுகொடுக்கும் விதமாக சிறப்பான ஆட்டத்தை வெளிப்படுத்திய ஜெயிப்பூர் பிங்க் பேந்தர்ஸ் வீரர்கள் தொடர்ந்து புள்ளிகளை எடுத்தனர். மாறி மாறி இரு அணிகளும் புள்ளிகளை பெற்ற நிலையில், முழு ஆட்ட நேர முடிவில் 25-24 என்ற புள்ளி கணக்கில் ஜெயிப்பூர் பிங்க் பேந்தர்ஸ் வெற்றி பெற்றது. ஒரேயொரு புள்ளி வித்தியாசத்தில் தமிழ் தலைவாஸ் தோல்வியை தழுவியது.

இந்த போட்டியில் ஜெயிப்பூர் பிங்க் பேந்தர்ஸ் அணி 12 ரெயிட், 11 டேக்கிள், 2 எக்ஸ்ட்ரா புள்ளிகளை பெற்றது. சூப்பர் ரெயிட், ஆல்அவுட் புள்ளிகளை பெறவில்லை.

தமிழ் தலைவாஸ் அணி 11 ரெயிட், 9 டேக்கிள், 2 ஆல்அவுட், 2 எக்ஸ்ட்ரா புள்ளிகளை பெற்றது. சூப்பர் ரெயிட் புள்ளிகள் எதுவும் பெறவில்லை.

தமிழ் தலைவாஸ் வீரர் ஹிமான்சு நார்வல் 8 ரெயிட் புள்ளிகளை பெற்று மொத்தம் 8 புள்ளிகளை பெற்று டாப் வீரராக ஜொலித்தார். இவர் டேக்கிள், போனஸ் புள்ளிகளை பெறவில்லை.

தமிழ் தலைவாஸ் கடைசியாக விளையாடிய 3 போட்டிகளில் தோல்வியை தழுவியுள்ளது. தற்போதையை நிலையில் 6 போட்டிகளில் 2 வெற்றி, 4 தோல்வி என மொத்தம் 11 புள்ளிகளை பெற்று புள்ளிப்பட்டியலில் கடைசி இடைத்தில் உள்ளது.

இனி வரும் போட்டிகளில் தொடர் வெற்றி பெற்றால் மட்டுமே புள்ளிப்பட்டியலில் முன்னேற முடியும் என்கிற சிக்கல் தமிழ் தலைவாஸ் அணிக்கு உருவாகியுள்ளது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil  

Google News: https://bit.ly/3onGqm9