Asian Games Volleyball: தொடர் வெற்றி! மூன்று முறை தங்கம் வென்ற தென் கொரியாவை வீழ்த்திய இந்தியா! அடுத்த போட்டி யாருடன்?

ஆசிய விளையாட்டு போட்டி சீனாவின் ஹாங்சோவ் நகரில் வரும் 23ஆம் தேதி தொடங்கி நடைபெற இருக்கும் நிலையில் வாலிபால், கிரிக்கெட் உள்பட சில போட்டிகள் நேற்று முதலே தொடங்கி நடைபெற்று வருகின்றன.

இதையடுத்து வாலிபால் விளையாட்டில் குரூப் சி பிரிவில் இடம்பெற்றிருக்கும் இந்தியா முதல் போட்டியில் கம்போடியா அணியை வீழ்த்தி வெற்றி பெற்றது. இதைத்தொடர்ந்து இன்று நடைபெற்ற போட்டியில் பலம் வாய்ந்த் தென் கொரியா அணியை எதிர்கொண்டது.

ஆசிய விளையாட்டில் மூன்று முறை தங்கப்பதக்கத்தை வென்ற அணியாக தென் கொரியா உள்ளது. அதேபோல் சர்வதேச அளவில் தென் கொரியா அணி 27வது இடத்திலும், இந்தியா 73வது இடத்திலும் உள்ளது.

இந்த இரு அணிகளுக்கும் இடையே இன்று நடைபெற்ற பரபரப்பான ஆட்டத்தில் இந்தியா 25-27, 29-27, 25-22, 20-25, 17-15 என்ற ஸ்கோர் கணக்கில், கொரியாவை 3-2 என வீழ்த்தி வெற்றி பெற்றது.

இந்த வெற்றியின் மூலம் குரூப் சி பிரிவில் டாப் இடத்தை பிடித்துள்ளது. போட்டி விதிமுறைப்படி டாப் இரண்டு இடங்களை பிடிக்கும் அணி அடுத்து சுற்றுக்கு முன்னேறும்.

அதன்படி சி பிரிவில் முதல் இடத்தை பிடித்திருக்கும் இந்தியா அடுத்து டி பிரிவில் இரண்டாம் இடத்தை பிடிக்கும் அணியுடன் மோதவுள்ளது.

குரூப் டி பிரிவில் சீனா தைபே, பாகிஸ்தான், மங்கோலியா ஆகிய அணிகள் உள்ளன.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9