Asia cup 2022: பாக். அணியில் மற்றொரு வீரர் காயத்தால் விலகல்! ஹசன் அலி சேர்ப்பு

ஆசிய கோப்பை தொடருக்கான பாகிஸ்தான் அணியின் நட்சத்திர வேகப்பந்து வீச்சாளர் ஷாகீன் அப்ரிடி முழங்காலில் ஏற்பட்ட காயம் காரணமாக விலகினார். அவருக்கு பதிலாக மாற்று வீரராக, வலது கை வேகப்பந்து வீச்சாளர் முகமது ஹஸ்னைன் சேர்க்கப்பட்டார்.

இதைத்தொடர்ந்து பாகிஸ்தான் அணியின் மற்றொரு வீரரான முகமது வாசிம் முதுகுவலி காரணமாக விலகியுள்ளார். பெளலிங் ஆல்ரவுண்டரான இவர் கடைசி கட்டத்தில் பேட்டிங்கிலும் சிறப்பாக செயல்படக்கூடியவர்.

ஆனால் துபாயில் பயிற்சி மேற்கொண்டபோது முதுகு பகுதியில் வலி ஏற்பட்ட நிலையில் பந்து வீச்சை தொடர முடியாமல் அவர் தவித்து வந்தார். பின்னர் அவர் பிஸியோதெரபிஸ்டிடம் ஆலோசனை பெற்று வெளியேறியுள்ளார்.

முகமது வாசிமுக்கு பதிலாக ஹசான் அலி அணியில் சேர்க்கப்பட்டுள்ளார். வலது கை வேகப்பந்து வீச்சாளரான இவரும் பெளலிங் ஆல்ரவுண்டராக இருப்பதுடன் பாகிஸ்தான் அணிக்காக டெஸ்ட், ஒருநாள், டி20 என மூன்று வகை போட்டிகளிலும் விளையாடியுள்ளார். இதுவரை 49 டி20 போட்டிகள் விளையாடி 60 விக்கெட்டுகளை வீழ்த்தி நல்ல சராசரியும் வைத்துள்ளார்.

ஆசிய கோப்பை தொடரில் தனது முதல் போட்டியில் பாகிஸ்தான் அணி இந்தியாவை எதிர்கொள்கிறது. இந்தப் போட்டிய துபாயில் இந்திய நேரப்படி இரவு 7.30 மணிக்கு நாளை நடைபெறுகிறது.