Asia Championship Trophy 2023: பாகிஸ்தானை வீழ்த்தி வெற்றி - நான்கு தொடர் வெற்றியுடன் இந்தியா அரையிறுதிக்கு தகுதி

ஆசிய சாம்பியன்ஸ் கோப்பை 2023 ஹாக்கி தொடர் சென்னையில் நடைபெற்று வருகிறது. இந்த தொடரில் இந்தியா - பாகிஸ்தான் அணிகளுக்கு இடையிலான போட்டி சென்னை எழும்பூரில் உள்ள ராதாகிருஷ்ணன் மைதானத்தில் இன்று நடைபெற்றது. பரபரப்பாக நடைபெற்ற இந்த ஆட்டத்தில் 4-0 என்ற கோல் கணக்கில் இந்தியா வெற்றி பெற்றது.

இந்த வெற்றியின் மூலம் இந்தியா இடம்பிடித்திருக்கும் பிரிவில் விளையாடிய அனைத்து போட்டிகளிலும் வெற்றி பெற்று புள்ளிப்பட்டியலில் முதல் இடத்தில் பிடித்திருப்பதுடன், அரையிறுதி போட்டிக்கும் தகுதி பெற்றுள்ளது.

பாகிஸ்தானுக்கு எதிரான போட்டி தொடங்கியது முதலே இந்திய அணி வீரர்கள் ஆதிக்கம் செலுத்தும் விதமான ஆட்டத்தை வெளிப்படுத்தினர். சிறப்பாக அட்டாக்கிங் மூலம் பாகிஸ்தான் அணியை முன்னேற விடாமல் அவர்கள் கோல் அடிக்க முயலும் வாயப்பையும் தடுத்தனர்.

இந்திய அணிக்கான முதல் கோல், அணியின் கேப்டன் ஹர்மன்ப்ரீத் சிங் அடித்தார். ஆட்டத்தின் 15வது நிமிடத்தில் கிடைத்த பெனால்டி வாய்ப்பை கோல் ஆக்கினார். இதனால் ஆட்டத்தின் முதல் பாதியில் இந்தியா 1-0 என முன்னிலை பெற்றது.

இதைத்தொடர்ந்து ஆட்டத்தின் 23வது நிமிடத்தில் மற்றொரு பெனால்டி வாய்ப்பு கிடைக்க, அதையும் கோல் ஆக மாற்றினார் இந்திய கேப்டன் ஹர்மன்ப்ரீத் சிங். இதன் மூலம் இந்தியா 2-0லஎன முன்னிலை பெற்றது.

தொடர்ந்து பாகிஸ்தான் கோல் அடிப்பதற்காக போராடிய நிலையில், ஆட்டத்தின் 36வது நிமிடத்தில் பெனால்ட் கார்னர் வாய்ப்பு மூலம் ஜர்ராஜ் சிங் கோல் அடித்தார். இதன் பின்னர் ஆட்டத்தின் 55வது நிமிடத்தில் மந்தீப் சிங் - ஆகாஷ் தீப் சிங் ஆகியோர் சிறப்பாக பாஸ் செய்ய, ஆகாஷ்தீப் சிங் பினிஷ் செய்து அணிக்கு நான்காவது கோல் பெற்று தந்தார்.

இந்த வெற்றியின் மூலம் மூன்று முறை ஆசிய சாம்பியன்ஸ் கோப்பை வென்ற பாகிஸ்தான் அணியை இந்தியா தொடரை விட்டு வெளியேற்றியுள்ளது.

முன்னதாக இன்று நடைபெற்ற முதல் போட்டியில் சீனா - ஜப்பான் அணிகள் மோதின. இந்த 2-1 என்ற கோல் கணக்கில் ஜப்பான் வென்றது.

இதைத்தொடர்ந்த நடைபெற்ற இன்றைய இரண்டாவது லீக் ஆட்டத்தில் மலேசியா -தென்கொரியா அணிகள் மோதின. இதில் 1-0 என்ற கோல் கணக்கில் மலேசியா வெற்றி பெற்றது.

இந்த தொடரில் இந்தியா, மலேசியா, தென் கொரியா, ஜப்பான் ஆகிய அணிகள் அரையிறுதிக்கு தகுதி பெற்றுள்ளன. முதல் அரையிறுதியில் மலேசியா - தென் கொரியா, இரண்டாவது அரையிறுதியில் இந்தியா - ஜப்பான் அணிகளும் மோதவுள்ளன. அரையிறுதி போட்டிகள் ஆகஸ்ட் 11ஆம் தேதி நடைபெறவுள்ளது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9