Arnold Dix: உத்தராகண்ட் சுரங்க மீட்புப் பணியின் நிஜ ஹீரோக்களில் ஒருவர்... யார் இந்த அர்னால்ட் டிக்ஸ்?

உத்தராகண்ட் மாநிலம் உத்தரகாசியில் சுரங்கம் தோண்டும் பணியின் போது ஏற்பட்ட மண் சரிவில் 41 தொழிலாளர்கள் சிக்கிக்கொண்டனர். 17 நாட்கள் பெரும் போராட்டத்திற்கு பின் அவர்கள் அனைவரும் நேற்று இரவு பத்திரமாக மீட்கப்பட்டனர். மீட்பு குழுவினருக்கு குடியரசுத் தலைவர் திரெளபதி முர்மு, பிரதமர் நரேந்திர மோடி உட்பட ஒட்டுமொத்த நாடும் பாராட்டு தெரிவித்துள்ளனர். 

41 தொழிலாளர்களும் மீட்கப்பட்டதை அவர்களது உறவினர்கள் இனிப்பு வழங்கியும், பட்டாசு வெடித்தும் கொண்டாடி மகிழ்ந்தனர். இந்த அபார வெற்றிக்கான பணியில் உள்நாடு மற்றும் வெளிநாட்டைச் சேர்ந்த ஏராளமான மீட்புக் குழுவினர் ஈடுப்பட்டிருந்தனர். அதில் ஒருவர்தான் சர்வதேச சுரங்க நிபுணர் அர்னால்ட் டிக்ஸ்.

யார் இந்த அர்னால்ட் டிக்ஸ்?

ஆஸ்திரேலியாவைச் சேர்ந்த அர்னால்ட் டிக்ஸ் ஜெனீவாவை தலைமையிடமாகக் கொண்டு செயல்படும் சர்வதேச சுரங்கப்பாதை மற்றும் நிலத்தடி கூட்டமைப்பின் தலைவர். புவியியலாளர், பொறியாளர் மற்றும் வழக்கறிஞராகவும் செயல்பட்டு வருகிறார். கட்டுமான ஆபத்துகள், பாதுகாப்பு செயல்திறன் தொடர்பான தொழில்நுட்ப சிக்கல்கள் ஆகியவற்றில் நிபுணத்துவம் பெற்றவர்.

மேலும், நிலத்தடி கட்டுமானங்கள் தொடர்பான அபாயங்கள் பற்றிய ஆலோசனைகளை வழங்கி வரும் டிக்ஸ், உலகின் முன்னணி நிலத்தடி சுரங்கப்பாதை நிபுணராக அறியப்படுகிறார். கடந்த 30 ஆண்டுகளுக்கும் மேலாக பொறியியல், புவியியல், இடர் மேலாண்மை ஆகிய துறைகளில் டிக்ஸ் கவனம் செலுத்தி வருகிறார். அண்டர்கிரவுண்ட் ஒர்க்ஸ் சேம்பர்ஸ் அமைப்பின் உறுப்பினராகவும் அர்னால்ட் டிக்ஸ் இருந்து வருகிறார்.

உத்தரகாசி சுரங்கத்தில் சிக்கிய தொழிலாளர்களை மீட்பதற்கு உதவுவதற்காக கடந்த 20 ஆம் தேதி அர்னால்ட் டிக்ஸ். இந்த மீட்புப் பணிகள் குறித்து அவர் கூறுகையில், "ஆரம்பத்தில், இந்தப் பணி விரைவாக நடக்கும் என்று நான் ஒருபோதும் உறுதியளிக்கவில்லை. இது எளிதாக இருக்கும் என்று நான் ஒருபோதும் உறுதியளிக்கவில்லை. ஆனால், கிறிஸ்துமஸ் சீக்கிரம் வருகிறது. அந்த சமயத்தில் 41 பேரும் காயமின்றி வீட்டில் இருப்பார்கள், பாதுகாப்பாக இருப்பார்கள் என்று நான் சொன்னேன்." என்றார்.

வெற்றியின் ரகசியத்தை உச்சரித்த அர்னால்ட், "நாங்கள் அமைதியாக இருந்தோம், எங்களுக்கு என்ன வேண்டும் என்பது எங்களுக்குத் தெரியும். நாங்கள் ஒரு அற்புதமான குழுவாக பணியாற்றினோம். பொறியாளர்கள், சிறந்த ராணுவம், அனைத்து ஏஜென்சிகள், கூட்டாட்சி அதிகாரம், வெற்றிகரமான பணியின் ஒரு பகுதியாக இருப்பது மகிழ்ச்சியாக இருந்தது." என்று தெரிவித்தார்.

அவர் சொன்னது போலவே, 41 தொழிலாளர்களும் எந்தவித ஆபத்தும் இன்றி பத்திரமாக மீட்கப்பட்டனர். மீட்புப் பணியின்போது சுரங்கத்துக்கு வெளியே இருந்த சிறிய கோயிலில் டிக்ஸ் மிகவும் அமைதியான முறையில் உட்கார்ந்து பிரார்த்தனை செய்த புகைப்படம் தற்போது சமூக வலைதளங்களில் வைரலாகி வருகிறது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9 

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், ஆன்மிகம், புகைப்பட கேலரி, வெப் ஸ்டோரி, வேலைவாய்ப்பு தகவல்கள், சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.