இனி சாப்பாட்டில் இருந்து தூக்கி வீசாதீர்கள்; நன்மைகள் தெரிந்தால் வீட்டிலே வளர்ப்பீர்கள் கறிவேப்பிலையை; இதோ ஐடியா!

கறிவேப்பிலையை நாம் அனைத்து உணவிலும் தாளிப்புக்காக சேர்த்துக்கொள்வோம். ஆனால் அதை பெரும்பாலானோர் சாப்பிடாமல் தூக்கியெறிவார்கள். ஆனால் கறிவேப்பிலை தலைமுடி வளர்ச்சி, கருமை முதல் செரிமானம், கண் பார்வை என எண்ணற்ற நன்மைகளைத் தரும். இத்தனை நன்மைகள் நிறைந்த கறிவேப்பிலையை வீட்டிலே வளர்க்க முடியும். தாளிப்பில் சேர்க்கும்போதுதாக் வீசியெறிவார்கள். ஆனால் அதில் துவையல், தொக்கு எனவும் செய்து அசத்தலாம். இவை குறித்தெல்லாம் அறிந்துகொண்டால் நீங்கள் கறிவேப்பிலையை வீட்டிலே வளர்க்க ஆசைப்படுவீர்கள். இதோ கறிவேப்பிலையை வீட்டிலே எப்படி வளர்ப்பது என்று தெரிந்துகொள்ளுங்கள். அதை நடுவது, பராமரிப்பது, அறுவடை செய்வது அனைத்துமே எப்படி என்று தெரிந்துகொள்ளுங்கள். நீங்கள் அன்றாட உணவில் பயன்படுத்தும் கறிவேப்பிலையை பால்கனியில் இருந்தே பறித்துக்கொண்டால் அது எத்தனை மகிழ்ச்சி தரும். இதோ கறிவேப்பிலையை பால்கனியில் வளர்ப்பது எப்படி என்று பாருங்கள்.

இந்த ஃபிரஷ் கறிவேப்பிலை உங்கள் ரெசிபிகளுக்கு புதிய சுவையைத்தரும். செடியில் இருந்து பறித்து தாளிக்கும்போது அதன் மணம் எப்படி இருக்கும் தெரியுமா? இதோ இந்த குறிப்புக்களை பின்பற்றி செடியை வளர்த்து அதை பறித்து தாளித்து பாருங்கள். நீங்கள் சுவை மற்றும் மணத்துக்காக உங்கள் உணவில் சேர்த்துக்கொள்வதுடன், சில கறிவேப்பிலை இலைகளை நீங்கள் மென்று சாப்பிடலாம். ஏனெனில் அதில் எண்ணற்ற ஆரோக்கிய நன்மைகள் உள்ளது.

கறிவேப்பிலைச் செடியை வீட்டில் வளர்ப்பது எப்படி?

கறிவேப்பிலைச் செடியை விதைகள் மற்றும் வெட்டிய பாகங்களில் இருந்தும் நட்டு வளர்க்கலாம். இருமுறைகளிலும் நீங்கள் எப்படி வேண்டுமானாலும் நடவு செய்யலாம். விதைகள் தூவ விரும்பினால், கறிவேப்பிலை விதைகளை வாங்கி, ஒரு ஈரமான பேப்பரில் வையுங்கள். அதை ஒரு சிஃப் லாக் பையில் வைத்து மூடி, ஒரு ஜன்னலுக்கு அருகில் 15 – 20 நாட்கள் வைக்க வேண்டும். சில நாட்களில் விதைகள் முளைக்கத் துவங்கும். அவற்றை வெளியே எடுத்து ஈரமான மண்ணில் நடவேண்டும். அதற்கு தண்ணீரும் தொடர்ந்து விடவேண்டும். சில வாரங்களில் செடி வளர்ந்து வரும்.

நீங்கள் ஏற்கனவே கறிவேப்பிலை வளர்ப்பவர்களிடம் இருந்து சிறு துண்டை வாங்கி அதையும் நட்டு வளர்க்க முடியும். அதற்கு நடுப்பகுதி தண்டை பார்த்து எடுத்துக்கொள்ளவேண்டும். ஒரு தொட்டியில் நடவேண்டும். நன்றாக மூடிவிடவேண்டும். ஒரு பிளாஸ்டிக் கவரில் செடியை மூடிவேண்டும். இரண்டு நாட்கள் மூடிவைத்து, பின்னர் திறந்து இரண்டு வாரங்களுக்கு நிழலில் செடியை வைக்கவேண்டும். இந்த நேரத்தில் வெட்டி வைத்த செடியில் இருந்து புதிய அரும்புகள் விடத்துவங்கும். வேர்களும் முளைக்கத் துவங்கும்.

செடியை பாதுகாப்பது எப்படி?

மண்ணுக்கு அதிகம் தண்ணீர் விடக்கூடாது. மண்ணுக்கு நிறைய தண்ணீர் தேவையில்லை. மண் ஈரப்பதத்துடன் கொஞ்சம் பொலபொலவென இருக்கவேண்டும்.

கறிவேப்பிலைக்கு மிதமான சூரிய ஒளியே தேவை. நேரடி சூரிய ஒளியில் வைத்தால் செடி கருகிவிடும் ஆபத்து உள்ளது.

ஒவ்வொரு ஆண்டும் நீங்கள் கறிவேப்பிலை செடியை புதிய தொட்டிக்கு மாற்றுவது நல்லது. இது அதன் ஆரோக்கிய வளர்ச்சிக்கு உதவும்.

இலைகளை மட்டும் தனித்தனியாக உருவக்கூடாது. தண்டில் இருந்து அனைத்து இலைகளும் உள்ள கொத்துக்களை மட்டுமே பறித்து எடுக்கவேண்டும்.

கறிவேப்பிலையை ஃப்ரிசரில் வைத்து ஒரு மாதம் வரை பாதுகாக்கலாம். கறிவேப்பிலை இலைகளை காய வைத்தும் உணவில் பிற்காலத்தில் பயன்படுத்திக்கொள்ளலாம்.

வளர்ச்சியை அதிகரிப்பது எப்படி?

கறிவேப்பிலை செடி அடர்ந்து படர்ந்து வளர வேண்டுமெனில் அதற்கு இரும்புச்சத்துக்கள் தேவை. அதற்காக இரும்புச்சத்துக்கள் நிறைந்த உரங்கள் இடலாம். அதை இரு மாதங்களுக்கு ஒருமுறை இடவேண்டும்.

செடியில் இருந்து இறந்த இலைகள் மற்றும் கிளைகளை நீக்கிவிடவேண்டும்.

செடியின் வளர்ச்சியை சில பூச்சிகள் காலி செய்துவிடும். எனவே தேவைப்பட்டால் பூச்சிக்கொல்லி மருந்துகள் தெளிக்கவேண்டும்.

தினமும் 6 முதல் 8 மணி நேரம் கறிவேப்பிலை செடிக்கு முழு சூரிய ஒளி தேவைப்படும். இல்லாவிட்டால் நல்ல இலைகள் வளராது. இதைச் செய்தால், புதிய கறிவேப்பிலை செடிகள் தோன்றுவதை காணலாம்.