Arthritis Pain Remedy: ஆர்த்ரைடீஸ் மூட்டு வலியைக் குறைக்கும் எளிய வழிமுறைகள்

ஆர்த்ரைடீஸை கீல்வாதம் என்றும் அழைப்பர். குளிர்காலம் கீல்வாதத்தை ஏற்படுத்தாது என்றாலும், குளிர்காலச் சூழ்நிலையால் ஏற்கெனவே கீல்வாதம் பாதிக்கப்பட்டவர்களுக்கு நோயுடன் தொடர்புடைய வலியை அதிகரிக்கச் செய்யும். மூட்டுவலியால் பாதிக்கப்பட்டவர்களுக்கு குளிர்காலம் மிகவும் கடினமாக இருக்கும் என்று மருத்துவ நிபுணர்கள் கூறுகின்றனர். குளிர் காலத்தில் மூட்டுவலி நோயாளிகளுக்கு மூட்டுகளைச் சுற்றியுள்ள ரத்த நாளங்கள் இறுக்கமாதல் போன்ற விஷயங்கள் சவாலாக மாறும்.

சில வாழ்க்கை முறை மாற்றங்களால் இவற்றை எளிதாக சமாளிக்க முடியும். சுறுசுறுப்பாக இருத்தல், தவறாமல் உடற்பயிற்சி செய்தல், நல்ல தோரணையுடன் உட்கார்ந்து நிற்பது, கடினமான செயல்களைத் தவிர்ப்பது ஆகியவை இந்த நோயை எதிர்த்துப் போராட உதவும்.

கீல்வாதத்தால் பாதிக்கப்பட்டவர்களுக்கு குளிர்காலம் ஏன் கடினமாக உள்ளது?

குளிர்காலத்தில் வலி அதிகரிப்பதற்கு பல காரணங்கள் உள்ளன. தேய்ந்த குருத்தெலும்பு, மூட்டுக்குள் உள்ள எலும்புகளில் அழுத்தத்தை ஏற்படுத்துகிறது. இதனால் அதைச் சுற்றியுள்ள நரம்புகள் அழுத்தப்படுகின்றன. மேலும் குளிர்காலத்தில் நமது உடல் வெப்பத்தைத் தக்க வைக்கிறது. முக்கிய உறுப்புகளுக்கு அதிக அளவில் ரத்தம் விநியோகிக்கப்படுவதை உறுதி செய்கிறது.

இத்தகைய சூழ்நிலைகளில், கைகள், கால்கள், தோள்கள் மற்றும் முழங்கால்களின் மூட்டுகளில் உள்ள ரத்த நாளங்கள் மேலும் அழுத்தத்துக்கு ஆளாகின்றன. இதனால் வலி மற்றும் அசௌகரியம் ஏற்படுகிறது' என்கிறார் பிரபல எலும்பு மூட்டுவியல் பாதுகாப்பு மற்றும் அறுவைச்சிகிச்சை நிபுணர் டாக்டர் தேவதாஸ்.

மேலும் குளிர் காலத்தில் உடல் ரீதியாக சுறுசுறுப்பாக இருப்பவர்களை விட, எந்த வேலையும் செய்யாமல் சோம்பலாக உட்கார்ந்து வேலைசெய்யும் வாழ்க்கை முறை கொண்டவர்கள் மூட்டுவலி பிரச்னைகளை அதிகம் சந்திக்க நேரிடும் என்கிறார்.

குளிர்காலத்தில் தசைகளில் விறைப்புத்தன்மை ஏற்படும். முழங்காலில் உள்ள சினோவியல் திரவம் குறைந்த வெப்பநிலையில் விரிவடைகிறது. முழங்காலைச் சுற்றியுள்ள இறுக்கமான தசைகள் இயக்கம் இருக்கும்போது உராய்வை உருவாக்குகின்றன. சினோவியல் திரவம் குறைவாக வெளியிடப்பட்டால் ஆஸ்டியோமலாசியா எனப்படும் பிரச்னையாக மாறுகிறது.

இது மூட்டுவலி நோயாளிகளுக்கு வலியை அதிகரிக்கும் நரம்புகளை பாதிக்கும். நீண்ட காலமாக இது கீல்வாதம், முடக்கு வாதம், ஆஸ்டியோபோரோசிஸ் போன்றவற்றால் பாதிக்கப்பட்டவர்களை சிரமத்தில் ஆழ்த்துகிறது.

உடல் உழைப்பை அதிகம் செய்யும் தொழிலாளர்களுக்கு இந்த பிரச்னைகள் ஏற்படுவதில்லை. கடின உழைப்பு, மூட்டுகளில் வெப்பத்தை உருவாக்குவதோடு சினோவியல் திரவத்தைக் கூடுதலாக வெளியிடுகிறது.

குளிர்கால மூட்டுவலியால் பாதிக்கப்பட்டவர்களுக்கு பின்வரும் வாழ்க்கை முறை மாற்றங்களை டாக்டர் நாராயண் ஹல்சி பரிந்துரைக்கிறார். இவர் ஃபோர்டிஸ் மருத்துவமனையில் எலும்பியல் துறை இயக்குனராக பணியாற்றி வருகிறார்.

• உங்களை சூடாக வைத்திருக்க கம்பளி ஆடைகளை அணியுங்கள். வீட்டில் ஒரு கதகதப்பான சூழல் இருப்பதை உறுதிப்படுத்திக் கொள்ளுங்கள்.

• வெயிலில் சுறுசுறுப்பான நடைப்பயிற்சி அல்லது உடற்பயிற்சி உங்களை சூடுபடுத்துவது மட்டுமல்லாமல் கூட்டு செயல்பாட்டை மேம்படுத்தவும் உதவுகிறது. அத்துடன் சில விளையாட்டு பயிற்சிகளில் பங்கேற்பது உங்கள் உடலுக்கும் மனதுக்கும் உதவும்.

• ஆரோக்கியமான உணவு, குறிப்பாக பழங்கள், காய்கறிகள், மீன், பருப்புகள் மற்றும் விதைகள் குளிர்காலத்தில் மூட்டுவலியிலிருந்து உங்களுக்கு நிவாரணம் அளிக்கும்.

• வைட்டமின் டி சப்ளிமெண்ட்ஸ் உங்களைப் பாதுகாக்கும். மேலும், இயற்கையான சூரிய ஒளி உங்களை கீல்வாதத்திலிருந்து பாதுகாக்கும்.

• வெதுவெதுப்பான நீர் குளியல் மற்றும் நீச்சல் பயிற்சி உடல் வெப்பத்தை சீராக்க உதவுகிறது.

உங்கள் மூட்டுகளை தொடர்ந்து அசைக்கவும். மென்மையான நீட்சி பயிற்சிகளை தவறாமல் செய்யுங்கள். இயக்கம் உங்கள் வலியையும் விறைப்பையும் குறைக்கும். இது உங்கள் தசைகளை பலப்படுத்துகிறது. சரியான தோரணையை பராமரிக்கவும். சரியான போஸில் உட்காருதல், நிற்பது, நகருதல் ஆகியவற்றுக்கு உடல் சிகிச்சையாளர் உதவ முடியும். எடையைக் கட்டுக்குள் வைத்திருக்க வேண்டியது மிகவும் அவசியமாகும். அதிக எடையுடன் இருப்பது மூட்டுவலி சிக்கல்களை அதிகரிக்கும்.

மெல்ல மெல்ல உடல் எடையை குறைக்க, வாழ்க்கைமுறையில் மாற்றங்களை ஏற்படுத்துவது நல்லது. மூட்டு வலி உள்ளவர்கள் ஓடுதல், குதித்தல் மற்றும் கடுமையான ஏரோபிக் பயிற்சிகளைத் தவிர்க்கவும், போதுமான ஓய்வு எடுக்கவும் மருத்துவ நிபுணர்களால் அறிவுறுத்தப்படுகிறது.