Thozha movie: வம்சியின் வாழ்கைப் பாடம்.. கட்டியணைத்த தோழா! 7 ஆண்டுகள் நிறைவு

நடிகர் கார்த்தியின் கேரியரில் முக்கியமாக சில படங்களில் தோழா திரைப்படமும் ஒன்று. இந்த திரைப்படம் தெலுங்கு, தமிழ் என இருமொழிகளில் எடுக்கப்பட்டது. தெலுங்கில் இதன் பெயர் ஒப்பிரி. பிரெஞ்சு திரைப்படமான தி இன்டச்சபில்ஸ் என்றதன் மீள்வுருவாக்கமே தோழா. இத்திரைப்படத்தில் கார்த்திக், நாகார்ஜூனா, தமன்னா, பிரகாஷ்ராஜ், விவேக், அனுஷ்கா, ஜெயசுதா, ஸ்ரேயா போன்ற நடிகர் பட்டாளமே நடித்திருந்தனர். இத்திரைப்படத்தை வம்சி பைடிபள்ளி இயக்கியுள்ளார், பிரசாத் வி பொட்லூரி தயாரித்துள்ளார். இந்த திரைப்படம் 2016ம் ஆண்டு கடந்த மார்ச் 25ம் தேதி வெளியானது.

கார்த்திக்கு எப்படி இது முக்கிய படமோ அதேபோல் வாரிசு திரைப்படத்தை இயக்கிய வம்சியின் கேரியரிலும் இந்த தோழா படத்திற்கு முக்கிய பங்கு உள்ளது.

குறிப்பாக நடிகர் கார்த்தியை (சீனு) பொறுத்தவரை குடும்பத்தின் மீது பாசமாக இருக்கும் அதே நேரத்தில் தன் வயதிற்கே உரிய அனைத்து சேட்டைகளையும் திரையில் காட்டி இருப்பார்.

நடிகர் நாகார்ஜூனாவை பொறுத்தவரை பெரும்பாலும் ஆக் ஷன் திரைப்படங்களில் தன்னை துருதுருவென திரையில் காட்டி வந்த நிலையில் இந்த படத்தில் சக்கர நாற்காலியில் மட்டும்மே முடங்கி இருப்பார். ஆனாலும் படத்தின் ஆரம்பம் முதல் கடைசி வரை கார்த்தியின் நடிப்பிற்கு தன் முக பாவனைகளாலேயே பதில் சொல்லி இருப்பார். குறிப்பாக பணக்காரர்களாக இருப்பவர்களுக்கும் இயலாமை, ஏக்கம், காதல் தோல்வி உள்ளிட்ட வாழ்வின் ஏற்ற இறக்கங்கள் இருக்கும் என்பதை திரையில் காட்டி இருப்பார். அதே நேரத்தில் கார்த்தியை பொருத்த வரை பிரகாஷ் ராஜை படம் முழுவதும் முரண்பட்டும் உடன் பட்டும் நடித்திருப்பார். குறிப்பாக ஒரு கட்டத்தில் பிரகாஷ் ராஜின் வீட்டில் தன் பெயிண்டிங் மாட்டப்பட்டிருப்பதை பார்த்த கார்த்தி இதுக்கு என்ன அர்த்தம் என்று கேட்கும் போது பிரகாஷ் ராஜ் தன் நண்பனிடம் உள்ள உரிமையை பிரம்மாண்டமாக காட்ட முயல்வார். மேலும் தன் ரசனையை வெளிப்படுத்துகிறோம் என் பெயரில் அந்த ஓவியத்தை புகழ புகழ கடைசியில் இத வரஞ்ச எனக்கே தெரியல சார் என்ற சொல்லும் போது தியேட்டர் முழு சிரிப்பலையில் மிதந்தது. கார்த்தி அடிக்கும் லூட்டில் இந்த படத்திற்கு பள்ளி குழந்தைகள் கூட ரசிகர்களாக இருந்தனர். 

அண்ணா அண்ணா என்ற இயல்பான பாசத்துடன் இருந்த கார்த்தி ஒரு கட்டத்தில் உண்மையில் தன் அண்ணன் விக்கிரமிற்கு செய்ய வேண்டிய கடமை என்ற எண்ணத்தில் அவரது காதலியை சந்திக்க ஏற்பாடு செய்வார். அதேபோல் விக்கிரமின் முன்னால் காதலியான அனுஷ்காவை அவர் முன் தோன்ற வைத்து விக்கிரமின் செயலில் எந்த தவறும் இல்லை என்று உணர வைப்பார் . அதேபோல் படத்தில் உண்மையில் வெளிநாட்டு பயணத்தில் சாதாரண ஒரு இளைஞர் எதை எல்லாம் பார்த்து பிரமிப்பாரோ அதை அப்படி தன் நடிப்பில் வெளிப்படுத்தி இருப்பார் கார்த்தி.

குறிப்பாக தோழா படத்தில் வரும் கார் ரேஸ் காட்சிகள் பார்ப்பவர்களை சேரின் நுனிக்கு வரை வைத்து விடும்.

ஆனாலும் இந்த படத்தின் மைனஸ் என்று இரண்டு விஷயத்தை சொல்லலாம் படத்தின் ஹீரோயினான தமன்னா வெறும் கிளாமருக்காகவே வந்து போயிருப்பார். அதே போல் படத்தின் பாடல்கள் தேவையே இல்லாத இடங்களில் வலிந்து திணித்ததை போன்ற ஒரு தோற்றம் இருந்தது.

ஆனால் இந்த எல்லா மைனஸ்களையும் தாண்டி தோழா திரைப்படம் கார்த்தியின் கேரியரில் வெற்றிப்படம் என்பதில் சந்தேகம் இல்லை!