ராக்கெட்ரி திரைப்படத்தை அனைவரும் பார்க்க வேண்டும் - ரஜினிகாந்த்

நடிகர் மாதவன் இயக்குநர் அவதாரம் எடுத்து இருக்கும் படம் ராக்கெட்ரி தி நம்பி எஃபெக்ட்.

நாட்டின் ரகசியங்களை பாகிஸ்தானுக்கு விற்பனை செய்ததாகப் போலி புகார் அளிக்கப்பட்டும் சிறையில் இருந்த நம்பி நாராயணனின் வாழ்க்கையைத் தழுவி படம் உருவாக்கப்பட்டது.

மாதவன் நம்பி நாராயணனாக நடித்த நிலையில் அவருக்கு மனைவியாக சிம்ரன் நடித்துள்ளார். பான் இந்தியா படமாக வெளியான இப்படம் சிறப்பான விமர்சனங்களைப் பெற்று வருகிறது.

படம் முழுக்க முழுக்க அறிவியலையும், தொழில்நுட்பமும் கலந்ததாக இருந்ததால் ரசிகர்கள் சற்று படம் போர் அடித்ததாகக் கூறினார்.

இருப்பினும் மாதவனின் நடிப்பு பெரிதும் பேசப்படுகிறது. இது போன்ற கதாபாத்திரத்தில் அவர் நடித்ததற்காகவே மாதவனைப் பலரும் பாராட்டி வருகின்றனர்.

இந்நிலையில் ராக்கெட்ரி தி நம்பி எஃபெக்ட் படத்தை நடிகர் ரஜினிகாந்த் பார்த்து உள்ளார்.

படம் மிகவும் நன்றாக இருப்பதாக நடிகர் மாதவனுக்கு வாழ்த்து தெரிவித்து உள்ளார். இது குறித்து அவர் வெளியிட்டுள்ள பதிவில், "நம் நாட்டின் விண்வெளி ஆராய்ச்சி வளர்ச்சிக்காகப் பல துன்பங்களுக்கு உள்ளாகி, தியாகங்கள் செய்து அரும்பாடுபட்டு பத்ம பூஷன் நம்பி நாராயணனின் வரலாற்றை மிகத் தத்ரூபமாக நடித்துப் படமாக்கி, இயக்குநராகத் தனது முதல் படத்திலேயே தலை சிறந்த இயக்குநர்களுக்கு இணையாக தானும் நிரூபித்து இருக்கிறார் மாதவன்.

இப்படி ஒரு திரைப்படத்தைக் கொடுத்ததற்காக அவருக்கு என்னுடைய நன்றிகளும், பாராட்டுகளும் " எனக் குறிப்பிட்டு உள்ளார்.