Happy Birthday Trisha: லியோவில் இருந்து வந்த கிஃப்ட்; பிறந்தநாளை கோலாகலமாக கொண்டாடிய த்ரிஷா.. வைரல் புகைப்படங்கள்!

1999ம் ஆண்டில் வெளியான ஜோடி படத்தில் சிம்ரனுக்கு தோழியாக நடித்து திரையுலகில் அறிமுகமானவர் நடிகை த்ரிஷா. அதனைத்தொடர்ந்து சூர்யா நடிப்பில் இயக்குநர் அமீர் இயக்கத்தில் வெளியான ‘மெளனம் பேசியதே’ திரைப்படத்தில் முழு நேர கதாநாயகியாக மாறினார். இந்தத்திரைப்படம் மக்களிடையே நல்ல வரவேற்பை பெற்ற நிலையில் தொடர்ந்து விக்ரமுடன் ‘சாமி’, ஷ்யாமுடன் ‘லேசா லேசா’ ‘எனக்கு 20 உனக்கு 18' உள்ளிட்ட படங்களில் நடித்தார்.

விஜயுடன் இவர் இணைந்து நடித்த ‘கில்லி’ திரைப்படம் ப்ளாக்பஸ்டர் ஹிட்டடிக்க இவரின் மார்க்கெட் எகிறியது. தொடர்ந்து திருப்பாச்சி, ‘ஜி’, ‘ஆறு’, ‘ஆதி’ ‘குருவி’ ‘உனக்கும் எனக்கும்’ என பல படங்களில் நடித்தவர் அபியும் நானும் திரைப்படத்தில் வித்தியாசமாக தோன்றி கவனிக்க வைத்தார். இதற்கடுத்ததாக வெளியான சில திரைப்படங்கள் த்ரிஷாவிற்கு கைகொடுக்காமல் போக, கெளதம் மேனன் உடன் இணைந்து ‘விண்ணைத்தாண்டி வருவாயா’ அதை மீட்டெடுத்துக்கொண்டார்.

அதன் பின்னர் ‘மங்காத்தா’ ‘சகலகலா வல்லவன்’ ‘என்னை அறிந்தால்’ ‘பூலோகம்’ உள்ளிட்ட படங்களில் நடித்தவர் ‘கொடி’ திரைப்படத்தில் வில்லியாக வந்து மிரளவைத்தார். அதன் பின்னர் மீண்டும் ஒரு சரிவை கண்ட த்ரிஷா அதனை விஜய்சேதுபதியுடன் இணைந்த ‘96’ படத்தில் மீட்டெடுத்துக்கொண்டார்.

அண்மையில் வெளியான பொன்னியின் செல்வன் திரைப்படத்தில் இவர் ஏற்றுநடித்த குந்தவை கதாபாத்திரமும் பெருமளவு கொண்டாடப்பட்டது. அடுத்ததாக தன்னுடைய சினிமா கிராஃபை உச்சிக்கு கொண்டு செல்ல கையில் விஜயின் ‘லியோ’ திரைப்படமும் கையில் இருப்பதால் சந்தோஷத்தின் உச்சத்தில் இருக்கும் த்ரிஷா இன்று தன்னுடைய 40 ஆவது பிறந்தநாளை இன்று கொண்டாடி இருக்கிறார். இந்த புகைப்படங்கள் தற்போது சமூகவலைதளங்களில் வைரலாகி வருகிறது.