Anandham: ‘ஆசை ஆசையாய் இருக்கிறதே’ அண்ணன் தம்பி உறவை பேசிய படம்! பல்லாங்குழி பாடலால் ரசிகர்களை தன் பக்கம் ஈர்த்த சினேகா!

Anandham Movie: "ஆனந்தம் " திரைப்படம் வெளியாகி இன்று 23 ஆண்டுகள் கடந்தும் ஆனந்தம் தமிழ் திரைப்பட உலகில் தவிர்க்க முடியாத குடும்பப் படமாக உள்ளது. பிரபல இயக்குனர் லிங்குசாமி இயக்கத்தில் உருவான முதல் அறிமுகப்படம் இது. நான்கு சகோதரர்களை மையப்படுத்தி அவர்களுக்குள்ளான வாழ்வை மையமாகக் கொண்டு நமது குடும்பங்களுக்கு நெருக்கமாக கதை சொல்லி வெற்றி பெற்ற படம்.

திரைப்படம் சூப்பர் குட் பிலிம்ஸ் நிறுவனம் சார்பில் ஆர்.பி. சௌத்ரி தயாரித்தார். ஆர்தர் ஏ. வில்சன் செய்திருக்கும் ஒளிப்பதிவு நம்மை அறியாமல் கிராமத்துக்குள் அழைத்துச் செல்லும். எஸ்.ஏ.ராஜ்குமாரின் இசை இன்றும் கேட்க இதமாக இருக்கும். லிங்குசாமி கதைக்கு பிருந்தா சாரதி அழுத்தமாக வசனம் எழுதி இருக்கிறார். 

ஆனந்தம் படத்தின் கதை

கிராமத்தில் வாழும் டெல்லி கணேஷ் ஸ்ரீவித்யா தம்பதிக்கு நான்கு மகன்கள். மம்முட்டி மூத்த மகன் திருப்பதியாகவும், முரளி இரண்டாம் மகன் மாதவனாகவும், அப்பாஸ் கண்ணனாகவும், ஷியாம் கணேஷ் சூர்யாவாகவும், இளைய தம்பிகளாகவும் தேவயானி, ரம்பா, சினேகா ஆகியோர் முதல் மூவரின் ஜோடிகள் ஆகவும் நடித்துள்ளனர்.

மூத்த சகோதரர் ஊரில் திருப்பதி ஸ்டோர் என்று பலசரக்கு கடை ஒன்றை தனது பெயரில் நடத்தி வருகிறார். தனது குடும்பத்தை தலைநிமிர்ந்து வாழ வைக்கும் மூத்த மகன். இவருக்கு தேவயானியை திருமணம் செய்து வைக்க அவரும் சேர்ந்து கடையை கவனித்துக் கொள்ள உதவுகிறார். இந்த சூழ்நிலையில் இரண்டாம் மகன் முரளிக்கு திருமணம் முடிக்கிறார். இரண்டாம் மகன் மனைவிக்கும் மைத்துனருக்கும் எப்போதும் மம்முட்டி மீது ஒரு சந்தேகம். 

தனியாக பணத்தை வங்கி ஒன்றில் சேர்த்து வருவதாக பிரச்சினை கிளப்புகிறார். அது உடல் நலம் பாதிக்கப்பட்ட குழந்தையின் அறுவை சிகிச்சைக்கு என்று புரிந்து கொண்டு சமரசம் ஆவார்கள். இந்த நிலையில் மூன்றாவது மகன் அப்பாஸ்க்கு செல்வந்தர் மகளுடன் காதல் ஏற்படுகிறது என்பதை மம்முட்டி கண்டறிகிறார். அந்த பெண்னின் தந்தை தவசியாக வரும் விஜயகுமாரை சந்தித்து தனது தம்பியான அப்பாஸ்க்கு திருமணம் செய்து வைக்கும் படி கேட்கிறார். 

அவர் ஏற்றுக் கொண்டு தன் வீட்டோடு மாப்பிள்ளை ஆக இருக்க வேண்டும் என்று நிபந்தனை விதிக்க அதையும் தம்பி நலன் கருதி ஏற்றுக் கொள்கிறார். திருமண ஏற்பாடுகள் நடந்து கொண்டிருந்த இடத்தில் இந்த விஷயம் தெரிந்து திருமணம் செய்ய மறுத்து அப்பாஸ் வீடு திரும்பினார். அப்பாவின் நிபந்தனைகளை நிராகரித்து தன்னை ஏற்கும் படி வீட்டை விட்டு வெளியேறி அந்த பெண் திருப்பதி வீட்டுக்கு வந்து விடுகிறார். அந்த விசயம் தெரிந்ததும் தவசி திருப்பதி வீட்டுக்கு தாக்குதல் திட்டத்தோடு வருகிறார். 

அதே நேரத்தில் அந்த பெண்ணை தவசியின் மரியாதை கெட்டு விடக் கூடாது என்று கூறி மம்முட்டி அழைத்து கொண்டு கிளம்புகிற நேரத்தில் தவசி இந்த நிகழ்ச்சியை பார்த்து நெகிழ்ச்சி அடைந்து ஊரறிய திருமணம் நடைபெறுகிறது. சாதாரண கடையில் இருந்து அரிசி ஆலை என்று தனது தொழிலை திருப்பதி பிரதர்ஸ் என்ற பெயரில் விரிவாக்கம் செய்து தனது தம்பிகள் நால்வரோடும் ஒற்றுமையாக இருந்து வாழும் கூட்டுக்குடும்பத்தின் மகத்துவம் பேசிய மாபெரும் வெற்றிப் படம்.

அண்ணன் தம்பி உறவுகளை அழுத்தமான காட்சி

தமிழ் குடும்ப அமைப்பில் அமைப்புகளுடன் கூட்டு குடும்பமாக வாழும் வாழ்க்கையில் உள்ள விசயங்களை சுவாரஸ்யமாக சொன்ன இந்த படம் மக்களின் மத்தியில் பெரும் வரவேற்பை பெற்றது. பல திரையரங்குகளில் நூற்றுக்கும் மேற்பட்ட நாட்களை தாண்டி வெள்ளி விழாவும் கண்டது. லிங்குசாமி இயக்கத்தில் அவரின் அறிமுகப்படமே வெற்றி பெற்றது. சிறந்த திரைப்படத்துக்கான பிலிம்பேர் விருது சினிமா எக்ஸ்பிரஸ் விருதுகள் கிடைத்தன. தமிழக அரசு விருதுகளும் வழங்கப்பட்டது. தெலுங்கு மொழியில் சங்கராந்தி என்ற பெயரில் 2005 ல் மறுஆக்கம் செய்யப்பட்டது.

இசையமைப்பாளர் எஸ்.ஏ.ராஜ்குமார் இசையில்

• கோகுலத்து ராதை 
• ஆசை ஆசையாய்
• என்ன இதுவோ 
• ஆத்தி கூசுதா 
• பல்லாங்குழி 

என்ற ஐந்து பாடல்களும் படத்தை வலுவாக்கின.

ஆனந்தம் படத்தின் ஆரம்பம் முதல் முடிவு வரை சகோதரர்களுக்கு இடையே எந்த விரிசலும் மோதலும் இன்றி நேர்மறையாக பேசிய படம். வீட்டில் மூத்த மகனை தகப்பன் ஸ்தானத்தில் வைத்து இளைய தம்பிகள் கொண்டாடிய இந்த படமும் கதையும் ரசிகர்கள் மனதில் பல்லாங்குழி போல் இத்தனை ஆண்டுகள் கடந்தும் நிறைந்து கிடக்கின்றது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9