‘வடிவேலை அட்டாக் செய்ய அரை மணி நேர இன்டர்வியூ’ சிங்கமுத்து கூறிய ஜெ அறை ரகசியம்!

திமுகவிற்கு வடிவேலு பிரச்சாரம் செய்த போது, அவருக்கு எதிராக அதிமுகவை ஆதரித்து சிங்கமுத்து பிரச்சாரம் செய்தது நாம் அனைவரும் அறிந்தது தான். ஆனால், அந்த வாய்ப்பு எப்படி சிங்கமுத்துவுக்கு கிடைத்தது என்பதை சமீபத்தில் இணையதளம ஒன்றுக்கு பேட்டியாக கூறியுள்ளார் சிங்கமுத்து. இதோ அந்த பேட்டி:

‘‘வடிவேலு பிரச்சாரத்தில் திமுகவிற்கு பயங்கர கூட்டம் கூடியது. இதைப் பார்த்து, அம்மாவிற்கு ஒரு தகவல் வந்தது. ‘திமுக பிரச்சாரங்களில் வடிவேலு மூலம் கூட்டம் திரள்கிறது’ என்று அந்த தகவல் சென்றது. ஒரு தரப்பு, கூட்டம் கூடுகிறது என்றிருக்கிறார்கள், ஒரு தரப்பு, கூட்டம் கூடுபவர்கள் ஓட்டு போடமாட்டார்கள், இருந்தாலும் நாம் எச்சரிக்கையாக இருக்க வேண்டும் என்றும் அம்மாவிடம் கூறியிருக்கிறார்கள்.

‘சரி, வடிவேலுக்கு மாற்றா யாரை இறக்கலாம்’ என்று அம்மா கேட்டிருக்கிறார். அப்போது தான், ‘சிங்கமுத்துனு ஒருத்தர், காமெடி எழுத்தி கொடுக்கிறார், எஸ்.எஸ்.சந்திரன் ஊரான சிவகங்கை தான் அவர் ஊரு. வடிவேலு கூட நடிச்சவர் தான்’ என கூறியிருக்கிறார்கள். ‘அப்படியா… சரி வரச்சொல்லுங்க பார்க்கலாம்’ என அம்மா சொல்லியிருக்கிறார்.

அவரது உதவியாளர் எனக்கு போன் செய்கிறார். அப்போ எனக்கும் வடிவேலுவுக்கும் சண்டை இருந்த சமயம். ‘சிங்கமுத்து சார்… போயஸ்கார்டன் வரை வரணுமே’ என்று அம்மா உதவியாளர் என்னை அழைக்கிறார்.

வடிவேலு தான் அழைக்கிறார் என நினைத்து, ‘வடிவேலு பக்கத்துல இருக்கானா… எப்படி இருக்கு உங்களுக்கு… உதை வாங்கப் போற… வைய்யா…’ என கடிந்து வைத்துவிட்டேன். அதுக்கு அப்புறம் இன்னொரு போன், அவரையும் திட்டிவிட்டேன்.

அப்புறும், அம்மாவே லைனில் வர்றாங்க, ‘ஹலோ… நான் பொதுச் செயலாளர் பேசுறேன்’ என்றார், அவ்வளவு தான், வேட்டி எல்லாம் அவிழ்ந்து போச்சு எனக்கு. ஓடோடி போனனே், போயஸ்கார்டனுக்கு. வெளியே செங்கோட்டை அண்ணன், ஓபிஎஸ் அண்ணன் எல்லாம் நிற்கிறாங்க.

அந்த சமயம், அம்மாவுக்காக ஒருத்தன் பெருவிரலை வெட்டி காணிக்கை செலுத்திவிட்டேன் அங்கு. அவன் விரலை தூக்கிட்டு, அவனையும் தூக்கிட்டு ஓடுறாங்க. அம்மா ரொம்ப டென்ஷன்ல இருக்காங்க. இன்று அவங்களை சந்திக்க வேண்டாம் என்று அங்கிருந்தவர்கள் கூறினார்கள்.

இன்னும் 15 நாள் தான் பிரச்சாரத்திற்கு இருக்கு, அதன் பின் நான் வர முடியாது என்று அவர்களிடம் கூறினேன். உடனே அம்மாவிடம் போய் அவர்கள் தகவலை சொல்ல, ‘ஏன் அவரை உள்ளே விடவில்லை, அவரை அனுப்புங்க’ என்று என்னை வரச்சொன்னார் அம்மா.

5 நிமிடம் நேரம் ஒதுக்கப்பட்டது, அரை மணி நேரம் அவரிடம் பேசினேன். உள்ளே போகும் போதே மிரட்டி தான் அனுப்புனாங்க. நான் மிரட்சியோடு போய் நின்னேன். அம்மா வந்தாங்க, நான் நின்று கொண்டிருந்தேன், என்னை உட்காரச் சொன்னாங்க.

அரை மணி நேரம் என்னிடம் பேசி, என் தரத்தை அவர் ஆய்வு செய்தார். என் பேச்சு, பயம், திறமை எல்லாவற்றையும் அவர் எடை போட்டார். நானும் அதை புரிந்து கொண்டு துணிந்து பேசினேன். கடைசியாக அவரிடம் கேட்டேன், ‘அம்மா… ரொம்ப தாக்கி பேசவா… வேணாமா?’ என்று கேட்டேன்.

அவர் கொஞ்சம் நேரம் யோசித்தார். ‘அது உங்க இஷ்டம்… இடத்திற்கு தகுந்தார் போல பேசிக்கோங்க. உங்க பாதுகாப்பை பார்த்துக்கோங்க’ என்றார். அப்புறம், உதவியாளர் பூங்குன்றனை பார்க்கச் சொன்னாங்க. அவர் செய்ய வேண்டியதை செய்தார். அப்படியே என் பிரச்சாரத்தை தொடங்கினேன்.

நான் போன இடமெல்லாம் அதிமுக வெற்றி. வடிவேலு போன இடமெல்லாம் தோல்வி. அதில் எனக்கு நல்ல பெயர். நான் போகவில்லை என்றாலும் அதிமுக ஜெயித்திருக்கும். வெற்றி பெற்ற பிறகும் அம்மாவை போய் சந்தித்தேன்.

அப்போ அவங்களிடம் கூறினேன், ‘அம்மா நீங்க இவ்வளவு எதார்த்தமா இருக்கீங்க… வெளியே ரொம்ப டெரரா சொல்றாங்க’ என்றேன். ‘என்ன சொல்றாங்க?’ என்று அம்மா கேட்டார்.

திடீர்னு கோபம் வரும், செருப்பை தூக்கி அடிப்பாங்க, அதில் ஊசி இருக்கும், அது கண்ணுல குத்தும் என்றெல்லாம் சொன்னாங்க என்றேன். ‘இதெல்லாம் வேற நடக்குதா?’ என்று என்னிடம் கேட்டார். ‘அதெல்லாம் உண்டு தான், அது வேற. உங்களை எல்லாம் அடிக்க மாட்டேன்’ என்று சிரித்தபடி அம்மா கூறினார்.

என் வீட்டு இல்லத்திருமண விழா அழைப்பிதழ் கொடுக்க போனேன், ‘எனக்கு கால் வலி; என்னால் நடக்க முடியவில்லை, 32 அமைச்சர்களும் வருவார்கள்’ என்றார். சொன்னபடி அனைத்து அமைச்சர்களும் வந்தார்கள்.

அம்மாவிற்கு பின் எந்த கட்சிக்கும் நான் போகவில்லை. கட்சியின் நான்கு பிரிவுகளிலும் எனக்கு ஆஃபர் இருக்கு. நான்கு பேரிடமும் கேட்டாலும், அவர்கள் அதிமுக தான் என்கிறாா்கள். அப்புறம் என்ன, எல்லாரும் அதிமுகவில் இருக்கும் போது நாம் ஏன் மாற வேண்டும் என, நான் யாரிடமும் போகாமல், அதிமுகவில் நானும் தொடர்கிறேன்.

எல்லாரும் இணைந்து கூடமாட்டார்களா என்று காத்திருக்கிறேன். சேரவில்லை என்றால், தேர்தலில் சிரமமாகிவிடும். அதிமுக சேருவதை தான் பாஜக விரும்புகிறது. அதிமுக பலமாக இருந்தால் தான் அவர்களுக்கு எம்.பி., கிடைக்கும். இல்லை என்றால், நான்கு பேரையும் கூட்டணியில் சேர்ப்பார்கள்.

பாஜகவில் இருந்து என்னையும், என் பையனையும் அழைத்தார்கள். நான் தான் போகவில்லை,’’

என்று அந்த பேட்டியில் சிங்கமுத்து கூறினார்.