25 Years Of Jeans: மிஸ் செய்த அஜித்.. அதிசயங்களை நிகழ்த்திய பிரசாந்த்.. மறக்க முடியுமா ஆஸ்கார் கதவை தட்டிய 'ஜீன்ஸ்'!

1990-களில் தமிழ் ரசிகர்கள் மத்தியில் சாக்லேட் பாயாக வலம் வந்தவர் நடிகர் பிரசாந்த். குறிப்பாக காதலுக்கு முக்கியத்துவம் கொடுக்கும் படங்களையே அதிக அளவில் தேர்ந்தெடுத்து நடித்து வந்தார். இவரை வைத்து பிரமாண்ட இயக்குனர் சங்கர் 'ஜீன்ஸ்' திரைப்படத்தை இயக்கியிருந்தார். சென்னையில் தொடங்கிய படப்பிடிப்பு பின்னர் 45 நாட்கள் அமெரிக்காவின் லாஸ் ஏஞ்சல்ஸ் உள்பட உலகெங்கிலும் இப்படத்தின் ஷூட்டிங் நடைபெற்றது.

காதலை மையமாக வைத்து உருவாக்கப்பட்ட இப்படத்தில் பிரசாந்த் உடன் உலக அழகி ஐஸ்வர்யா ராய் ஜோடி சேர்ந்து நடித்திருந்தார். நாசர், ராதிகா, செந்தில் ராஜூ சுந்தரம், லட்சுமி உள்ளிட்டோர் முக்கிய கதாப்பாத்திரங்களில் நடித்திருந்தனர். நாசருக்கு, விஸ்வநாதன், ராமமூர்த்தி என இரட்டை குழந்தைகள். விஸ்வநாதனை ஐஸ்வர்யா ராய் காதலிப்பார். ஆனால், இரட்டையருக்குத்தான் தனது மகன்களை திருமணம் செய்து வைப்பேன் என அடம் பிடிப்பார் நாசர். இதனால் ஐஸ்வர்யா ராயும் இரட்டையராக நடிக்கிறார். அதிலும் இவர்களுக்குள் நடக்கும் காதல் காட்சிகளான இன்றைய தலைமுறை ரசிகர்களையும் கூட வெகுவாகவே கவர்ந்தது.

படம் முழுவதும் பிரமாண்ட காட்சிகள் இடம் பெற்றிருந்ததால் படத்தில் வரும் அனைத்து பாடல்களும் ஏ.ஆர்.ரஹ்மான் இசையில் சூப்பர் ஹிட் அடித்தது. அதிலும், 'பூவூக்குள் ஒளிந்திருக்கும் கனிக்கூட்டம் அதிசயம்..பாடலில் உலகின் ஏழு அதிசயங்களான சீனப் பெருஞ்சுவர், ஈபில் டவர், தாஜ் மஹால், எகிப்தின் பிரமிட் என அனைத்திலும் பிரமாண்டம் காட்டி நம்மை மயக்கி இருப்பார் சங்கர். நவீன தொழில்நுட்பத்தை பாடல்குளுக்கு மட்டுமின்றி கதையோட்டத்துக்கும் பயன்படுத்திய முதல் தமிழ் படமும் இதுதான். இது அக்காலத்தில் மிகவும் பரபரப்பாக பேசப்பட்டது.

இப்படத்தில் அஜித் தான் முதலில் நடிக்க வேண்டியது, ஆனால், பெப்சி ஊழியர்களுக்கு ஆதரவாக பேசியதால் இப்படத்தில் அவர் நடிக்க முடியவில்லை. இதையடுத்து பிரபு தேவாவுக்கு செல்ல, அவரும் வாய்ப்பை இழந்த நிலையில் பிரசாந்த அந்த பெருமையை பெற்றார்.

தமிழ் சினிமாவில் முக்கிய படங்களின் வரிசையில் ஒன்றாக நிலைத்து இருக்கும் 'ஜீன்ஸ்' திரைப்படம் வெளியாகி (ஏப்.24) இன்றுடன் 25 ஆண்டுகள் நிறைவடைந்துள்ளது. நேற்று ரிலீசானது போல் உள்ளது. ஆனால் 25 ஆண்டுகள் உருண்டோடியது என்றால் ஆச்சரியமாக இருக்கிறது. 26-ம் ஆண்டில் அடியெடுத்து வைக்கும் 'ஜீன்ஸ்' திரைப்படம் பாக்ஸ் ஆபிஸில் அன்றைய காலகட்டத்தில் முதல் இடத்தை பிடித்திருந்தது. மேலும் அந்த ஆண்டுக்கான 71-வது ஆஸ்கார் விருதுகள் வழங்கும் விழாவில், சிறந்த வெளிநாட்டு திரைப்படம் என்ற பிரிவின் கீழ் இந்தியாவில் இருந்து பரிந்துரைக்கப்பட்ட படம் என்ற பெருமையும் பெற்றது.

அதிசயங்களை நம் கண் முன் காட்சிப்படுத்தியது ஜீன்ஸ்!