பென்ஸ் காரை நொறுக்கும் சண்டைக் காட்சி..எதிர்பாராமல் நிகழ்ந்த விபத்தில் சிக்கிய ஹீரோ - சிறு காயங்களுடன் எஸ்கேப்

மறைந்த பழம்பெரும் நடிகர் ரவிச்சந்திரன் மகன் ஹம்சவர்தன். தமிழில் இவர் மானசீக காதல் என்ற படத்தில் ஹீரோவாக நடித்தார். தொடர்ந்து புன்னகை தேசம், ஜூனியர் சீனியர், மந்திரன் போன்ற படங்களில் நடித்துள்ள படப்பிடிப்பின்போது விபத்தில் சிக்க காயமடைந்துள்ளார்.

தற்போது இவர் நாயகனாக நடிக்கும் 'மகேஸ்வரா' படத்தின் முதல் கட்ட படப்பிடிப்பு திருச்சி மற்றும் அதன் சுற்று வட்டாரப் பகுதிகளில் நடைபெற்றது. மோகன் நடிப்பில் சமீபத்தில் வெளியான 'ஹரா' படத்தை இயக்கிய விஜய் ஸ்ரீ ஜி இயக்குகிறார்.

சண்டைக்காட்சியின் போது விபத்து

படத்தில் உயர்ரக சொகுசு பென்ஸ் கார் ஒன்றை நொறுக்கி தரைமட்டமாக்கும் சண்டைக் காட்சி, அரியலூர் நெடுஞ்சாலையில் ஸ்டண்ட் மாஸ்டர் தினேஷ் சுப்பராயன் தலைமையில் படமாக்கப்பட்டது. அப்போது எதிர்பாராத வகையில் விபத்து ஏற்பட்டுள்ளது. இதில் சிறு காயங்களுடன் ஹம்சவர்தன் உள்ளிட்டோர் தப்பியுள்ளனர்.

உரிய முன்னெச்சரிக்கை நடவடிக்கைகள் மேற்கொள்ளப்பட்டதால் பெரும் சேதம் தவிர்க்கப்பட்டுள்ளது.

மகேஸ்வரா திரைப்படம்

சஸ்பென்ஸ் த்ரில்லர் பாணியில் உருவாகி வரும் மகேஸ்வரா படத்தில் ராம்கி, 'கேஜிஎஃப்' புகழ் கருடா ராம், பி.எல்.தேனப்பன், வேல ராமமூர்த்தி உள்ளிட்ட பலரும் நடிக்கிறார்கள். அதிக பொருள்செல்வில் உருவாகி வரும் இந்த படத்தின் அடுத்தகட்ட படப்பிடிப்பு ரஷ்யா, பொலிவியா, ஐரோப்பியா நாடுகளில் எடுக்கப்படவுள்ளது.

17 ஆண்டுகளுக்கு பிறகு ஹம்சவர்தன் மீண்டும் ஹீரோவாக இந்த படத்தில் நடிக்கிறார். இதுவரை ஏற்றிராத முற்றிலும் மாறுபட்ட வேடத்தில் அவர் இந்த படத்தில் நடிக்கிறாராம். ரெட் டிராகன் எண்டர்டெயின்மென்ட் பேனர் படத்தை தயாரிக்கிறது.

ஹம்சவர்தன் சினிமா பயணம்

1999இல் வெளியான மானசீக காதல் என்ற ரெமாண்டிக் படம் மூலம் தமிழ் சினிமாவில் ஹீரோவாக அறிமுகமானார் ஹம்சவர்தன். இந்த படத்தை அவரது தந்தையும், மறைந்த நடிகருமான ரவிச்சந்திரன் இயக்கியிருந்தார். இந்த படத்துக்கு முன்னர் வி.சி. குகநாதன் இயக்கத்தில் ஹம்சவர்தன் நடிப்பில் வடுகப்பட்டி மாப்பிள்ளை படம் உருவானது. ஆனால் சில காரணங்களால் ரிலீஸில் தாமதமாக, ஹம்சவர்தன் இரண்டாவது படமாக வெளியானது.

இந்த படத்துக்கு பின்னர் இவர் நடித்த புன்னகை தேசம் ரசிகர்கள் மத்தியில் நல்ல வரவேற்பை பெற்று ஹிட்டானது. பின் மம்முடியுடன் இணைந்து ஜூனியர் சீனியர், நேற்று வரை நீ யாரோ, இனிது இனிது காதல் இனிது, மந்திரன், பிறகு போன்ற படங்களில் நடித்தார்.

2007க்கு பிறகு சினிமாவை விட்டு ஒதுங்கி இருந்த ஹம்சவர்தன், 2018இல் மீண்டும் நடிப்புக்கு கம்பேக் கொடுக்கப்போவதாக தெரிவித்தார். இதையடுத்து தற்போது மகேஸ்வரா என்ற படத்தில் நடித்து வருகிறார்.

வடுகப்பட்டி மாப்பிள்ளை படத்தில் தன்னுடன் ஜோடியாக நடித்த நடிகை ரேஷ்மாவை திருமணம் செய்து கொண்டார் ஹம்சவர்தன். ஹம்சவர்தன் - ரேஷ்மா தம்பதியினருக்கு இரண்டு மகன், ஒரு மகள் உள்ளார்கள். கடந்த 2021இல் கோவிட் பாதிப்புக்குள்ளான நடிகை ரேஷ்மா சிகிச்சை பலனின்றி உயிரிழ்ந்தார்.