Samantha: சமந்தா விவாகரத்திற்கு காரணமான முன்னாள் அமைச்சர்.. ஓடோடி வந்த நாகர்ஜூனா.. நீடிக்கும் மர்மம்..
Samantha: நடிகை சமந்தா- நாக சைதன்யாவை விவாகரத்து செய்ய முன்னாள் அமைச்சரே காரணம் எனக்கூறி, அணைந்த தீயை மீண்டும் பற்ற வைத்துள்ளார் தெலங்கானா பெண் அமைச்சர் சுரேகா.
நடிகை சமந்தாவும் நாக சைதன்யாவும் காதலித்து திருமணம் செய்த நிலையில், கடந்த 2021ம் ஆண்டு இருவரும் திருமண வாழ்க்கையிலிருந்து பரஸ்பரமாக பிரிந்து வாழ இருப்பதாக அறிவித்தனர். இவர்கள் இருவரின் பிரிவுக்கும் இதுவரை எந்த காரணமும் அதிகாரப்பூர்வமாக தெரிவிக்காத நிலையில், சினிமா வட்டாரங்கள், பிரபலங்கள் என பலரும் பல தகவல்களை பரப்பி வருகின்றனர்.
அந்த வகையில், தெலங்கானா மாநிலத்தின் அமைச்சரான சுரேகா சமந்தாவின் திருமண வாழ்க்கை இப்படி ஆக முன்னாள் அமைச்சர் கேடிஆர் தான் காரணம் எனக் கூறி தமிழ் மற்றும் தெலுங்கு திரையுலகில் அதிர்ச்சியை ஏற்படுத்தியுள்ளார்.
சினிமா எண்ட்ரி
தமிழ் ரசிகர்ளின் மனங்களில் காதல் திரைப்படம் என்றால் இதுதான் என முத்திரை குத்திய படங்களில் ஒன்று தான் கௌதம் வாசுதேவ் மேனனின் விண்ணைத் தாண்டி வருவாயா. இந்தப் படத்தில் சிறு கதாப்பாத்திரத்தில் நடித்து சினிமாவில் எண்ட்ரி கொடுத்தவர் சமந்தா. பின் இதே படத்தின் தெலுங்கு வெர்ஷனில் திரிஷாவிற்கு பதிலாக கதாநாயகியாக அறிமுகமானார் சமந்தா. இந்தப் படத்தில் கதாநாயகனாக நடித்தவர் நாக சைதன்யா.
திருமணம்- விவாகரத்து
இந்தப் படத்தின் மூலம் அறிமுகமான இருவரும் காதல் வலையில் விழுந்தனர். பின் இருவரும் அவர்கள் கெரியரை பார்த்துக் கொண்டே காதலர்களாக வலம் வந்தனர். இதற்கிடையில், தமிழ், தெலுங்கு என இரு மொழிகளிலும் சமந்தா முன்னணி நடிகையாக வலம் வரத் தொடங்கியிருந்தார்.
பின் சமந்தாவும்- நாக சைதன்யாவும் இருவீட்டார் சம்மதத்துடன் கடந்த 2017ம் ஆண்டு திருமணம் செய்து கொண்டனர். திருமணத்திற்கு பின்னும் இருவரும் சினிமாவில் நடித்து வரத் தொடங்கிய நிலையில், சமந்தா ரசிகர்கள் கொண்டாடும் மாபெரும் நடிகையாக உருவெடுத்தார்.
அந்த சமயத்தில் நாக சைதன்யாவிற்கும் சமந்தாவிற்கும் இடையே நாளுக்கு நாள் கருத்து வேறுபாடுகள் அதிகரித்து வந்தது. இந்தத் தகவல்கள் மீடியாவில் கசியத் தொடங்கியது. இதைத் தொடர்ந்து இருவரும் திருமண வாழ்வில் இருந்து விலகுவதாக கூட்டாக அறிவித்தனர். இது அவர்களது ரசிகர்களுக்கு பேரதிர்ச்சியாக இருந்தது. இவர்களின் பிரிவுக்கு பல காரணங்கள் கூறப்பட்டு வந்த நிலையில், சமந்தா மீண்டும் கெரியரில் கவனம் செலுத்தத் தொடங்கினார்.
டாப் கியரில் கெரியர்
ஆனால், சில நாட்களிலேயே அவர் மையோசிடிஸ் எனும் அரியவகை நோயினால் பாதிக்கப்பட்டார். காதல் கணவரின் பிரிவும் நோயும் ஒருசேர சமந்தாவை தாக்கிய நிலையில், தமிழ், தெலுங்கு திரையுலக ரசிகர்கள் பலரும் சமந்தாவிற்காக சோகத்தில் மூழ்கினர்.
பின், சிகிச்சைக்காக சினிமாவிலிருந்து சில காலம் ஓய்வெடுத்து வந்தார். பின், சிகிச்சை முடிந்து நடிப்பைத் தொடங்கிய சமந்தா தற்போது டாப் கியரில் பறந்து வருகிறார். இவர் தற்போது திரைப்படங்களைத் தொடர்ந்து வெப் சீரிஸ்களிலும் முக்கியமாக கவனம் செலுத்தி வருகிறார். தனது அடுத்தடுத்த சினிமா பயணங்கள் குறித்த அறிவிப்பை வெளியிட்டு ரசிகர்களை குஷியாக்கி வருகிறார்.
சந்தோஷத்தை கண்டுபிடித்தோம்
மறுபுறம், சமந்தாவை விவாகரத்து செய்த பின் நாக சாதன்யா, பொன்னியின் செல்வன் திரைப்படத்தின் மூலம் தமிழ் ரசிகர்களுக்கு பரிட்சையமான சோபிதா துலிபாலாவை காதலித்து இருவீட்டார் சம்மதத்துடன் அவரை நிச்சயதார்த்தமும் செய்துள்ளார். இதனால், தனது மகனின் சந்தோஷம் என்ன என்பதை நாங்கள் கண்டுபிடித்து விட்டோம் எனவும் நாக சைதன்யாவின் தந்தையும் நடிகருமான நாகார்ஜூனா கூறியிருந்தார்.
சூப்பர் கூல்
மேலும் , நிச்சயதார்த்தத்திற்குப் பின், நடந்த ஒரு நேர்காணலில், சமந்தாவின் திரைப்பயணத்தை எவ்வாறு பார்க்கிறீர்கள் என ஷோபிதா துலிபாலாவிடம் கேள்வி எழுப்பப்பட்டது. அதற்கு பதிலிளித்த ஷோபிதா, சமந்தா படம் குறித்த அறிவிப்பு செய்திகளில் கதாநாயகர்களைப் போல அவரின் பெயரே தனித்து நிற்கிறது. அவரது திரைப்பயணத்தை பார்க்க சூப்பர் கூலாக உள்ளது எனக் கூறியிருந்தார்.
தொடரும் வதந்திகள்
இந்த நிலையில், சமந்தாவும் நாக சைதன்யாவுமே தங்களது திருமண வாழ்க்கை குறித்து மறந்துவிட்டு அடுத்தடுத்த கட்ட பணிகளில் ஈடுபட்டாலும், அவர்களை பற்றிய தகவல்கள் மட்டும் குறைந்தபாடில்லை. ஊ சொல்றியா பாடலுக்கு நடனமாடியது, சைதன்யாவின் தாய் அமலாவுடன் மனக்கசப்பு, குடும்ப வாழ்க்கை, குழந்தை பெற்றுக் கொள்வது, ஜீவனாம்சம் என இவர்கள் குறித்த தகவல்களும் வதந்திகளும் ஏராளம்.
பகீர் கிளப்பிய பெண் அமைச்சர்
அந்த வகையில், தற்போது புதிய தகவல் ஒன்றை கூறியுள்ளார் தெலங்கானா அமைச்சர் சுரேகா. இவர் செய்தியாளர்களிடம் பேசுகையில், சமந்தா, நாக சைதன்யாவை பிரிந்து சென்றதற்கு காரணமே முன்னாள் அமைச்சர் கேடிஆர் தான். அந்த அமைச்சரால் சமந்தா மட்டுமல்ல, பல நடிகைகளும் சினிமா கலைஞர்களும் சினிமாவை விட்டு விலகி காணமலே போயுள்ளனர் எனக் கூறி மக்களிடம் அதிர்ச்சியை கிளப்பியுள்ளார்.
பாய்ந்து வந்து கண்டித்த நாகார்ஜூனா
இந்நிலையில், இந்த விவகாரம் நாக சைதன்யாவின் தந்தை நாகார்ஜூனாவின் காதுகளுக்கு செல்ல, அவர் அமைச்சர் சுரேகாவின் தகவலை முற்றிலும் மறுத்துள்ளார். அத்துடன் அரசியலில் இருந்து ஒதுங்கி இருக்கும் சினிமா நட்சத்திரங்களின் வாழ்க்கையை உங்கள் எதிரிகளை விமர்சிப்பதற்காக பயன்படுத்தாதீர்கள். தயவுசெய்து மற்றவர்களின் தனியுரிமையை மதிக்க கற்றுக் கொள்ளுங்கள். பொறுப்பான பதவியில் இருக்கும் ஒரு பெண்ணாக, எங்கள் குடும்பத்திற்கு எதிரான வைத்த கருத்துக்களையும் குற்றச்சாட்டுகளையும் உடனடியாக திரும்பப் பெற்றுக் கொள்ளுங்கள் எனக் கூறியுள்ளார்.
சமந்தா நாக சைதன்யா இடையே என்ன தான் நடந்தது என்பதை அவர்களும் இருவருமே கூறாமல் உள்ள நிலையில், இதுபோன்ற தேவையற்ற கருத்துகள் பரவி வருகிறது. இது சம்பந்தப்பட்ட நபர்களைத் தாண்டி, அவர்களை நேசிக்கும் ரசிகர்களுக்கும் ஒருவித அயர்ச்சியை தந்துகொண்டிருக்கிறது.
