Sam Pitroda row: ‘நிறத்தின் அடிப்படையில் அவமரியாதை செய்வதை பொறுத்துக்கொள்ள மாட்டேன்’: பிரதமர் மோடி

காங்கிரஸ் தலைவர் சாம் பிட்ரோடாவின் கருத்து பெரும் சர்ச்சையைத் தூண்டிய சில மணி நேரங்களுக்குப் பிறகு, பிரதமர் நரேந்திர மோடி புதன்கிழமை, தோலின் நிறத்தின் அடிப்படையில் அவமானப்படுத்தப்படுவதை நாட்டு மக்கள் பொறுத்துக்கொள்ள மாட்டார்கள் என்று கூறினார். வாரங்கல்லில் நடந்த பேரணியில் பேசிய பிரதமர் மோடி, காங்கிரஸ் எம்.பி.யான ராகுல் காந்தியிடம் பதில் கோரினார்.

"ராகுல் காந்தி, நீங்கள் பதிலளிக்க வேண்டும். எனது நாட்டு மக்களை அவர்களின் தோல் நிறத்தின் அடிப்படையில் அவமதிப்பதை எனது நாடு பொறுத்துக் கொள்ளாது, இதை மோடி ஒருபோதும் பொறுத்துக் கொள்ள மாட்டார்" என்று அவர் மேலும் கூறினார்.

வடகிழக்கு மாநிலங்களில் உள்ளவர்கள் சீனர்களைப் போல இருக்கிறார்கள் என்று இந்தியன் ஓவர்சீஸ் காங்கிரஸ் தலைவர் சாம் பிட்ரோடா கூறியதற்கு பிரதமர் மோடி இவ்வாறு பதிலளித்தார்.

சாம் பிட்ரோடா இந்த மாத தொடக்கத்தில் தி ஸ்டேட்ஸ்மேனுக்கு அளித்த பேட்டியில், வெவ்வேறு தோல் நிறங்கள் மற்றும் தோற்றம் கொண்ட மக்கள் ஒற்றுமையுடன் நாட்டில் உள்ளனர் என்று கூறினார்.

"அங்கொன்றும் இங்கொன்றுமாக சில சண்டைகளை ஒதுக்கி வைத்துவிட்டு, மக்கள் ஒன்றாக வாழக்கூடிய மிகவும் மகிழ்ச்சியான சூழலில் நாங்கள் 70-75 ஆண்டுகள் வாழ்ந்து வருகிறோம். கிழக்கில் உள்ளவர்கள் சீனர்கள் போலவும், மேற்கில் உள்ளவர்கள் அரேபியர்கள் போலவும், வடக்கில் உள்ளவர்கள் வெள்ளையர்கள் போலவும், தெற்கில் உள்ளவர்கள் ஆப்பிரிக்கர்கள் போலவும் தோற்றமளிக்கும் இந்தியாவைப் போலவே பன்முகத்தன்மை கொண்ட நாட்டை நாம் ஒன்றாக வைத்திருக்க முடியும். அது ஒரு விஷயமே இல்லை. நாம் அனைவரும் சகோதர சகோதரிகள்" என்று அவர் கூறியிருந்தார்.

சாம் பிட்ரோடாவின் கருத்துக்கள் இனவெறி மற்றும் பிரிவினைவாதம் என்று பாரதிய ஜனதா கட்சி கூறியுள்ளது. இந்த கருத்து காங்கிரஸ் தலைவரின் இந்தியா மற்றும் அதன் கலாச்சாரம் குறித்த குறைந்த புரிதலைக் காட்டுகிறது என்று கட்சி கூறியது.

பாஜக செய்தித்தொடர்பாளர் கருத்து

"நான் மீண்டும் சொல்கிறேன், காங்கிரஸின் தலைமையை வெளிநாட்டு வம்சாவளியினர் ஏற்றுக்கொண்டதால், அவர்கள் வடக்கு, தெற்கு, கிழக்கு மற்றும் மேற்கில் உள்ள இந்தியர்களை வெளிநாட்டு வம்சாவளியினராக பார்க்கத் தொடங்கினர். இது இந்தியாவின் அடையாளம் மற்றும் அதன் இருப்பு குறித்த இந்தியா என்ற கருத்தாக்கத்தின் போர். முகலாயர்கள் மற்றும் ஆங்கிலேயர்களால் நம் மனதில் ஊடுருவிய அந்நிய-மனநிலை இது, நாம் அனைவரும் அந்நியர்கள், இந்தியா ஒரு சத்திரம் மட்டுமே... என்ற காங்கிரஸின் மனநிலை தெளிவாக உள்ளது, அவர்களின் கருத்து 'பாரத் கோ அந்தர் சே டோடோ, பஹார் சே ஜோடோ' என்பதாகும்" என்று பாஜக செய்தித் தொடர்பாளர் சுதான்ஷு திரிவேதி கூறினார்.

காங்கிரஸ்

இதற்கிடையில், சாம் பிட்ரோடா கூறிய ஒப்புமைகள் "துரதிர்ஷ்டவசமானவை மற்றும் ஏற்றுக்கொள்ள முடியாதவை" என்று காங்கிரஸ் கூறியது.

"இந்தியாவின் பன்முகத்தன்மையை விளக்குவதற்காக சாம் பிட்ரோடா ஒரு பாட்காஸ்டில் தெரிவித்த ஒப்புமைகள் மிகவும் துரதிர்ஷ்டவசமானவை மற்றும் ஏற்றுக்கொள்ள முடியாதவை. இந்திய தேசிய காங்கிரஸ் இந்த ஒப்புமைகளிலிருந்து தன்னை முழுமையாக விலக்கிக் கொள்கிறது" என்று காங்கிரஸ் மூத்த தலைவர் ஜெய்ராம் ரமேஷ் ஒரு பதிவில் தெரிவித்துள்ளார்.