பணக்கார முதல்வர்களில் ஜெகன் முதலிடம்! ஸ்டாலினுக்கு எத்தனையாவது இடம் தெரியுமா?

பகுப்பாய்வு செய்யப்பட்ட 30 முதல்வர்களில், 29 பேர் (97 சதவீதம்) கோடீஸ்வரர்கள், ஒவ்வொரு முதல்வரின் சராசரி சொத்து மதிப்பு 33.96 கோடி என்று ஏடிஆர் தெரிவித்துள்ளது. ஏடிஆர் அறிக்கையின்படி, 30 முதல்வர்களில் 13 பேர் (43 சதவீதம்) மீது கொலை, கொலை முயற்சி, கடத்தல் மற்றும் கிரிமினல் மிரட்டல் உள்ளிட்ட கடுமையான கிரிமினல் வழக்குகள் பதியப்பட்டுள்ளது. 

சொத்து மதிப்பில் முதல் மூன்று இடங்களில் ஆந்திராவின் ஜெகன் மோகன் ரெட்டி (510 கோடிக்கு மேல்), அருணாச்சலப் பிரதேசத்தின் பெமா காண்டு (163 கோடிக்கு மேல்), ஒடிசாவின் நவீன் பட்நாயக் (63 கோடிக்கு மேல்) ஆகியோர் உள்ளனர்.

மிகக்குறைந்த சொத்துக்கள் உள்ள மூன்று முதல்வர்கள் – மேற்கு வங்காளத்தின் மம்தா பானர்ஜி (ரூ.15 லட்சத்துக்கு மேல்), கேரளாவின் பினராயி விஜயன் (ரூ.1 கோடிக்கு மேல்) மற்றும் ஹரியானாவின் மனோகர் லால் (ரூ.1 கோடிக்கு மேல்) என ஏடிஆர் தெரிவித்துள்ளது.

பீகார் முதல்வர் நிதிஷ் குமார் மற்றும் டெல்லியைச் சேர்ந்த அரவிந்த் கெஜ்ரிவால் ஆகிய இருவருக்குமே 3 கோடிக்கு மேல் சொத்துக்கள் இருப்பதாக அறிக்கை கூறுகிறது.

அந்த அறிக்கையின்படி, 46 வயதான ஜெகன் மோகன் ரெட்டியின் சொத்து மதிப்பு 510 கோடிக்கு மேல் உள்ளது. இவரது வருமானம் 50 கோடி ரூபாய். இரண்டாவது பெரிய பணக்கார முதல்வர் பெமா காண்டுவின் சுய வருமானம் மற்றும் கடன் பூஜ்ஜியம் ஆகும், அவருடைய மொத்த சொத்து 163 கோடிக்கும் அதிகமாக உள்ளது. டெல்லி முதல்வர் அரவிந்த் கெஜ்ரிவாலின் சுய வருமானம் 2 லட்சத்துக்கும் அதிகமாகவும், மொத்த சொத்து மதிப்பு 3 கோடிக்கு மேல் உள்ளது. 

8 கோடிக்கும் மேலான சொத்துக்கள் உடன் தமிழ்நாடு முதலமைச்சர் ஸ்டாலின் 14ஆவது இடத்தில் உள்ளார் என ஏடிஆர் ஆய்வறிக்கை தெரிவித்துள்ளது.