உலகக் கோப்பை கண்ணோட்டம்

2023-ஆம் ஆண்டுக்கான உலகக் கோப்பை கிரிக்கெட் போட்டி அக்டோபர் 5-ம் தேதி தொடங்குகிறது. குஜராத் மாநிலம், அகமதாபாத்தில் நடைபெறும் முதல் ஆட்டத்தில் நடப்பு சாம்பியனான இங்கிலாந்து அணி, கடந்த சீசனில் ரன்னர்-அப் ஆன நியூசிலாந்தை எதிர்கொள்கிறது. 2023 ஐசிசி ஆடவர் கிரிக்கெட் உலகக் கோப்பை கிரிக்கெட் போட்டித் தொடர், உலகக் கோப்பையின் 13வது எடிஷன் ஆகும். இது சர்வதேச கிரிக்கெட் கவுன்சில் (ஐசிசி) ஏற்பாடு செய்யப்படும் நான்கு ஆண்டுகளுக்கு ஒரு முறை நடக்கும் ஒரு நாள் சர்வதேச (ODI) கிரிக்கெட் உலகக் கோப்பை போட்டியாகும். இது இந்தியாவில் இந்த முறை நடத்தப்படுகிறது. இது முதலில் பிப்ரவரி முதல் மார்ச் 2023 வரை நடத்தத் திட்டமிடப்பட்டது. ஆனால் கோவிட் தொற்று காரணமாக ஒத்திவைக்கப்பட்டது. 2019 நடப்பு சாம்பியனான இங்கிலாந்து உட்பட 10 அணிகள் இப்போட்டியில் பங்கேற்கின்றன. 1987, 1996 மற்றும் 2011 ஆம் ஆண்டுகளில் இந்திய துணைக்கண்டத்தில் உள்ள பிற நாடுகளுடன் இணைந்து இந்த போட்டியை நடத்திய இந்தியா, இம்முறை முழுமையாக தனித்து நடத்தும் முதல் ஆடவர் கிரிக்கெட் உலகக் கோப்பை இதுவாகும். இறுதிப் போட்டி அகமதாபாத்தில் உள்ள நரேந்திர மோடி ஸ்டேடியத்தில் நவம்பர் 19, 2023 அன்று நடைபெற உள்ளது. மும்பை வான்கடே ஸ்டேடியம் மற்றும் கொல்கத்தா ஈடன் கார்டன்ஸ் மைதானங்களில் அரையிறுதி ஆட்டங்கள் நடைபெறுகின்றன. இந்த எடிஷனின் டேக்லைன் "It takes one day" என்பதாகும். முதலில், இந்த போட்டி 2023 பிப்ரவரி 9 முதல் மார்ச் 26 வரை நடைபெறுவதாக இருந்தது. கோவிட்- 19 காரணமாக போட்டி அட்டவணை உருவாக்குவதில் பாதிப்பு ஏற்பட்டது. இதையடுத்து, அக்டோபர் மற்றும் நவம்பர் மாதங்களுக்கு மாற்றப்படும் என்று ஜூலை 2020-இல் அறிவிக்கப்பட்டது. ஐசிசி போட்டி அட்டவணையை 27 ஜூன் 2023 அன்று வெளியிட்டது.

இதே ஆண்டு பாகிஸ்தானில் நடைபெற உள்ள ஆசிய கோப்பை கிரிக்கெட் போட்டிக்கு இந்திய அணியை அனுப்ப இந்திய கிரிக்கெட் வாரியம் மறுத்ததை அடுத்து போட்டியை புறக்கணிப்பதாக பாகிஸ்தான் கிரிக்கெட் வாரியம் முரண்டு பிடித்தது. ஜூன் 2023-இல் ஆசிய கிரிக்கெட் கவுன்சில் பாகிஸ்தான் கிரிக்கெட் வாரியம் முன்மொழிந்த ஹைபிரிட் மாதிரியைப் பயன்படுத்தி போட்டி நடத்தப்படும் என்று அறிவித்த பின்னர் இந்த சிக்கல் தீர்க்கப்பட்டது. ஆசிய கோப்பை கிரிக்கெட்டில் 13 போட்டிகளில் ஒன்பது போட்டிகள் இலங்கையில் நடைபெறுகின்றன. ஆசிய கோப்பை கிரிக்கெட் போட்டி ஆகஸ்ட் 30-ஆம் தேதி தொடங்கி செப்டம்பர் 17-ஆம் தேதி வரை நடக்கிறது. சரி உலகக் கோப்பைக்கு வருவோம். முந்தைய உலகக் கோப்பையைப் போலவே, இந்த போட்டியிலும் 10 அணிகள் பங்கேற்கின்றன. தகுதி பெறுவதற்கான முக்கிய வழி புதிய ஐ.சி.சி கிரிக்கெட் உலகக் கோப்பை சூப்பர் லீக் ஆகும். சூப்பர் லீக்கில் 13 அணிகளில் முதல் எட்டு அணிகள் தானாகவே உலகக் கோப்பைக்கு தகுதி பெற்றன.

ஆறாவது இடத்தைப் பிடித்த இந்தியாவுக்கு இடம் உறுதி செய்யப்பட்டது. 8 அணிகள் தேர்வான நிலையில், எஞ்சியுள்ள இரண்டு இடங்களுக்கான அணியை தேர்வு செய்ய கிரிக்கெட் உலகக் கோப்பை தகுதிச் சுற்று போட்டிகள் நடத்தப்பட்டன. அதில் நெதர்லாந்தும், இலங்கையும் தேர்வாகி உலகக் கோப்பைக்குள் அடியெடுத்து வைத்தன. தகுதிச் சுற்று செயல்முறையின் விளைவாக, ஸ்காட்லாந்துக்கு எதிரான தோல்விக்குப் பிறகு தகுதி செயல்முறையிலிருந்து முன்னேறத் தவறிய முன்னாள் சாம்பியன் வெஸ்ட் இண்டீஸ், தகுதி பெற முடியவில்லை. இதுவரை நடந்த உலகக் கோப்பை தொடர்களில் அந்த அணி இல்லாமல் நடக்கும் முதல் போட்டியாக இது இருக்கும். முழு உறுப்பினர்களான அயர்லாந்து மற்றும் ஜிம்பாப்வே அணிகளும் தகுதி பெறவில்லை. அதாவது நாக்-அவுட் தகுதி சுற்றில் பங்கேற்ற நான்கு முழு உறுப்பினர்களில் மூன்று அணிகள் தகுதி பெறவில்லை. இலங்கை மட்டுமே முன்னேறியது. இறுதித் தகுதி இடம் இணை உறுப்பினர்களான ஸ்காட்லாந்து மற்றும் நெதர்லாந்து ஆகியவற்றுக்கு இடையிலான எலிமினேட்டருக்கு சென்றது. நெதர்லாந்து எலிமினேட்டர் போட்டியில் வென்று போட்டியின் இறுதி கட்டத்தில் வாய்ப்பை பெற்று உலகக் கோப்பை போட்டிக்கு தகுதி பெற்றது. உலகக் கோப்பை போட்டியையொட்டி, வசதிகளை மேம்படுத்துவதற்காக பிசிசிஐ தனிப்பட்ட இடங்களுக்கு தலா ரூ .50 கோடி (6.3 மில்லியன் அமெரிக்க டாலர்) வழங்குகிறது. வான்கடே மைதானத்தில் அவுட்பீல்டு மறுசீரமைக்கப்பட்டுள்ளது. ஃப்ளட்லைட்டுகள் எல்இடி விளக்குகளாக மேம்படுத்தப்பட்டுள்ளன. கழிப்பறைகளும் மேம்படுத்தப்பட்டுள்ளன. சிதம்பரம் ஸ்டேடியத்தில் புதிய ஃப்ளட்லைட்டுகள் நிறுவப்பட்டுள்ளன. ஐதராபாத்தில் உள்ள ராஜீவ் காந்தி சர்வதேச கிரிக்கெட் ஸ்டேடியம், கவுகாத்தியில் உள்ள அசாம் கிரிக்கெட் அசோசியேஷன் ஸ்டேடியம் மற்றும் திருவனந்தபுரத்தில் உள்ள கிரீன்பீல்டு சர்வதேச ஸ்டேடியம் ஆகிய இடங்களில் பயிற்சி ஆட்டங்கள் செப்டம்பர் 29 முதல் அக்டோபர் 3 வரை நடைபெறுகிறது. போட்டிகள் தொலைக்காட்சியில் நேரடி ஒளிபரப்பு செய்யப்படும்.