ADMK Vs BJP: ’கோவையில் எங்களுக்கு போட்டி திமுகதான்! பாஜகவுக்கு ஒட்டே இல்லை!’ அண்ணாமலையை விசாளசிய வேலுமணி!

நாடாளுமன்றத் தேர்தல் பரப்புரை களம் சூடு பிடித்துள்ளது. தமிழகம் மற்றும் புதுச்சேரியில் வரும் ஏப்ரல் 19ஆம் தேதி அன்று ஒரே கட்டமாக நாடாளுமன்றத் தேர்தல் நடைபெறுகிறது. இதற்கான வேட்புமனுத்தாக்கல் மார்ச் 20ஆம் தேதி தொடங்கியது. வேட்புமனு தாக்கல் செய்ய கடைசி நாள் மார்ச் 27 ஆகும்.மார்ச் 28ஆம் தேதி வேட்புமனுக்கள் மீதான பரிசீலனை நடைபெறும் நிலையில், வேட்புமனுக்களை திரும்பப் பெற மார்ச் 30ஆம் தேதி கடைசி நாள் ஆகும். பதிவு செய்யப்பட்ட வாக்குகள் வரும் ஜூன் 4ஆம் தேதி எண்ணப்பட்டு அன்றே முடிவுகள் அறிவிக்கப்படுகின்றன.

கோயம்புத்தூரில், கோவை, நீலகிரி, பொள்ளாச்சி தொகுதி வேட்பாளர்களை அறிமுகம் செய்து அதிமுக செயல்வீரர்கள் கூட்டத்தில் முன்னாள் அமைச்சர் எஸ்.பி.வேலுமணி உரையாற்றினார். 

அப்போது பேசிய அவர், கோவை நாடாளுமன்றத் தொகுதிக்கு வேட்பாளராக சிங்கை ஜி. ராமச்சந்திரன் பி.இ., எம்.பி.ஏ நிறுத்தப்பட்டுள்ளார்.  இவருக்கு இரட்டை இலை சின்னத்தில் வாக்களித்து அதிக வாக்குகள் வித்தியாசத்தில் வெற்றி பெற செய்ய வேண்டும். 

அருமை அண்ணன், கழகத்திற்காக பணியாற்றி மறைந்த முன்னாள் சட்டம்ன்ற உறுப்பினர் அண்ணன் சிங்கை கோவிந்தராஜன் மகன்தான் நமது வேட்பாளர், அவருடைய தந்தைக்கு புரட்சித் தலைவர் எம்ஜிஆர்தான் திருமணம் செய்து வைத்தார்.  எம்ஜிஆர் அவர்களால் நமது வேட்பாளருக்கு ராமச்சந்திரன் என்று பெயர் சூட்டப்பட்டது. 

புரட்சித் தலைவி அம்மா அவர்களால் ஐடி விங் மாநில செயலாளராக அறிவிக்கப்பட்டவர் சிங்கை ராமச்சந்திரன், மாதம் 15 லட்சம் ரூபாய் சம்பளம் வாங்கி கொண்டிருந்த இவர், அந்த வேலை எனக்கு முக்கியம் இல்லை, கட்சி பணிதான் முக்கியம் என்று கூறி வேலையை ரிசைன் செய்துவிட்டு கட்சி பணி ஆற்றி வருகிறார். 

சிங்காநல்லூர் தொகுதியில் ஜெயராமன் வெற்றிக்காக சிறப்பான முறையில் சிங்கை ராமச்சந்திரன் பணியாற்றி உள்ளார். களத்தில் உள்ள சிறந்த வேட்பாளராக இவர் உள்ளார். 

கோவையில் யார் நின்றாலும் எங்களுக்கு கவலை இல்லை. இந்த கட்சியை பலரும் அழிக்க நினைத்தார்கள். ஆனால் அழிக்க முடியவில்லை. களத்தில் வெற்றி பெறப்போவது நாம்தான், கோவை, நீலகிரி, பொள்ளாச்சி தொகுதிகளில் வெற்றி உறுதி. 

களத்தில் உள்ள வேட்பாளர்கள் எல்லாம் நமக்கு தூசு; நமது பக்கத்திலேயே வர முடியாது. சும்மா சோஷியல் மீடியாவுல போட்டுட்டு ரொம்ப பெரிய ஆளா காண்பிச்சா ஆகாது. 

நீலகிரி தொகுயில் ஆ.ராசாவும், மத்திய அமைச்சர் முருகனும் நிற்கின்றனர். ஆனால் நம்முடைய வேட்பாளர் சாதாரண வேட்பாளர்தான், அதுதான் அதிமுக, நமது வேட்பாளர் வெற்றி பெறுவது உறுதி. 

கோவை நாடாளுமன்ற தொகுதியில், திமுக சார்பில் கணபதி ராஜ்குமார் போட்டியிடுகிறார்.   அவர்தான் நமக்கு போட்டியே, கணபதி ராஜ்குமாரை அம்மா அவர்கள் மேயராகவும், மாவட்ட செயலாளராகவும் வாய்ப்பு கொடுத்து அடையாளம் காட்டியவர். அவர் இந்த கட்சிக்கு துரோகம் செய்துவிட்டு திமுகவில் சேர்ந்துவிட்டார். திமுகவில் வேட்பாளர் ஆகும் தகுதி யாருக்கும் இல்லை போல, கொள்கை விசுவாசம் இல்லாதவராக அவர் உள்ளார். 

அண்ணாமலை கரூரில் போன தேர்தலில் நமது கூட்டணியில் நின்றார். இப்போது கரூரில் நிற்காமல் கோயம்புத்தூரில் நிற்கிறார். எங்களுக்கு போட்டி திமுக, அதிமுகவுக்கும்தான். பாஜக கட்சிக்கு  4 சதவீதம்தான் ஓட்டு உள்ளது. 

பாஜக கூட்டணியில் உள்ள பாமகவுக்கு ஓட்டு உள்ளதா?, திமுக கூட்டணியில் உள்ள கம்யூனிஸ்ட்களுக்கும், காங்கிரஸ்க்கும் இங்கு ஓட்டு உள்ளதா? ஜி.கே.வாசனுக்கு ஓட்டு உள்ளதா?, 

பாஜக பயங்கரமாக வளர்ந்துவிட்டது என்றாலும் 10 சதவீதம் ஓட்டு வாங்கினாலும் ஜெயித்துவிட முடியுமா? அதிமுக எப்பேர்பட்ட கட்சி, உலகத்தில் 7ஆவது கட்சி, இந்தியாவிலேயே பெரிய கட்சியாக உள்ளது. சும்மா வாட்ஸ் அப்களில் வீடியோவுல போட்டுவிட்டால் வேலைக்கு ஆகாது. நமக்கு போட்டி திமுகதான் எஸ்.பி.வேலுமணி பேசினார்.