Air India: 'ஏர் இந்தியாவுக்கு வந்த சோதனை' நட்ட நடுவானில் பெண்ணை தேள் கொட்டியதால் பதற்றம்!
Scorpion Bite:விமானத்திற்குள் எப்படி தேள் வந்தது என்று தெரியவில்லை. அதிகாரிகள் இது குறித்து விசாரணை நடத்தி வருகின்றனர்
சமீபகாலங்களில் விமானப்பயணத்தின் போது ஏதேனும் விரும்பதகாத சம்பவங்கள் நடந்து வருகிறது. இதனால் தொடர்ச்சியாக விமான பயணத்தில் ஈடுபடுவோர் முகம் சுழிக்கும் சூழல் நிலவுகிறது. சமீப காலங்களில் விமானத்தில் கரப்பான் பூச்சி தென்படுவது கடும் சிரமத்தை கொடுப்பதாக ஏற்கனவே பயணிகள் குற்றம் சாட்டி வந்தனர். இந்நிலையில், நாக்பூரில் இருந்து மும்பை வந்த விமானத்தில் மறைந்திருந்த தேள் பெண் பயணியை கடித்துள்ளது. செளரப் சின்ஹா என்ற பெண் வலியால் துடித்தார். இதையடுத்து விமானத்தில் தேள் கடித்த பெண் பயணிக்கு முதலுதவி செய்யப்பட்டது. மேலும் மும்பை விமான நிலையத்திற்கு இது குறித்த தகவல் கொடுக்கப்பட்டது. விமானம் தரையிறங்குவதற்கு முன்பாகவே மருத்துவ குழு தயார் நிலையில் இருக்கும்படி கேட்டுக்கொள்ளப்பட்டது. அதே சமயம் விமானத்தில் இருந்த மற்ற பயணிகள் தேள் கொட்டி விடுமோ என்ற அச்சத்திலேயே இருந்தனர்.
ட்ரெண்டிங் செய்திகள்
விமானம் மும்பையில் தரையிறங்கியவுடன் பாதிக்கப்பட்ட பெண்ணிற்கு உடனடியாக சிகிச்சையளித்தனர். சம்பந்தப்பட்ட பயணி மருத்துவமனைக்கு கொண்டு செல்லப்பட்டு சிகிச்சையளிக்கப்பட்ட பின் டிஸ்சார்ஜ் செய்யப்பட்டார். விமானத்திற்குள் எப்படி தேள் வந்தது என்று தெரியவில்லை. அதிகாரிகள் இது குறித்து விசாரணை நடத்தி வருகின்றனர்.
ஏற்கனவே கடந்த ஜனவரி மாதம் வளைகுடா நாட்டில் இருந்து இந்தியாவுக்கு வந்த விமானத்தில் பைலட் அறையில் பறவை இருந்தது. விமானம் புறப்படும் முன்பே பைலட் அந்த பறவை பார்த்ததால் வெளியே அனுப்பப்பட்டது. பின் 10 நிமிடம் கழித்து விமானம் புறப்பட்டுச்செல்ல அனுமதிக்கப்பட்டது. கடந்த டிசம்பர் மாதம் கோழிக்கோட்டில் இருந்து துபாய் சென்ற சரக்கு விமானத்தில் பாம்பு மறைந்திருந்தது குறிப்பிடத்தக்கது.
விமான நிறுவனங்கள் பாதுகாப்பு விஷயங்களில் உரிய கவனம் கொள்ள வேண்டும் என்று பயணிகள் வலியுறுத்தி உள்ளனர்.
தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9
டாபிக்ஸ்