Amit Shah On Tamil CM: ஒடிசாவில் ஒரு தமிழ் முதல்வரை திணிக்க நவீன் பட்நாயக் முயற்சிக்கிறார்! அமித் ஷா ஆவேசம்!

தமிழ்நாட்டில் பிறந்த முன்னாள் ஐஏஎஸ் அதிகாரியும் ஒடிசா முதலமைச்சர் நவீன் பட்நாயக்கின் நெருங்கிய உதவியாளருமான வி.கே.பாண்டியனை குறிவைத்து, பத்ரக் மாவட்டத்தில் உள்ள சந்த்பாலியில் நடந்த பொதுக்கூட்டத்தில் மத்திய உள்துறை அமைச்சர் அமித்ஷா பேசினார். 

தமிழ் முதலமைச்சரை திணிக்க முயற்சி 

அப்போது “ஒடிசா மக்கள் தங்கள் இன்னுயிரை தியாகம் செய்து, மாமன்னர் அசோகருக்கு எதிராக வீரத்துடன் போராடினார்கள். ஆனால் இன்று நவீன்பாபு ஒரு தமிழ் முதலமைச்சரை மக்கள் மீது திணிக்க முயற்சிக்கிறார். மக்கள் நவீன் பாபுவை சகித்துக் கொண்டார்கள் ஆனால் உங்கள் பெயரில் இந்த தமிழ் பாபுவை நாங்கள் பொறுத்துக்கொள்ள மாட்டோம் என அவர் கூறினார். 

திரை மறைவில் இருந்து ஆட்சி நடத்த திட்டம் 

திரைமறைவில் இருந்து ஆட்சியை நடத்த ஒரு தமிழ் பாபுவை அனுமதிக்க தயாரா? என்று கேள்வி எழுப்பிய அவர், பாரதிய ஜனதா கட்சி ஆட்சிக்கு வந்தால் ஒரு மக்கள் சேவையாளர் ஆட்சியை நடத்துவார் என்று அவர் கூறினார்.

ராமர் கோயில் உற்சவத்தில் கலந்து கொள்ள ஒடிசா மக்களை பாண்டியன் தடுத்து நிறுத்தியதாக ஷா குற்றம் சாட்டிய அவர், “பகவான் ஜெகநாதருக்கு அவமரியாதை செய்வதை மக்கள் பொறுத்துக் கொள்வார்களா என்று கேள்வி எழுப்பினார். 

பூரி ஜெகன்நாதர் கோயில் குறித்து பேச்சு 

பூரியில் உள்ள ஜெகநாதர் கோவிலின் ரத்ன பண்டரின் சாவி காணாமல் போன விவகாரத்தை எழுப்பிய அமித் ஷா, “பொக்கிஷ அறையின் டூப்ளிகேட் சாவிகள் ஏன் தயாரிக்கப்பட்டன. விசாரணை அறிக்கையை ஏன் வெளிப்படையாக தெரிவிக்கவில்லை என்பதை நவீன் பட்நாயக் பதிலளிக்க வேண்டும். ஆளும் பிஜூ ஜனதாதளம் அரசாங்கம் யாரைப் பாதுகாக்க முயல்கிறது என கேள்வி எழுப்பினார். 

ஒடிசா மக்கள் பாஜகவுக்கு வாக்கு அளித்தால் ஆட்சி அமைந்த ஒரு மாதத்திற்குள் பூரி ஜெகன்நாதர் கோயில் பொக்கிஷ அறை குறித்த அறிக்கையை வெளியிடுவோம் என்றும் அமித்ஷா உறுதி அளித்தார். 

மக்கள் ஏழையாக இருக்க காரணம் யார்?

இயற்கை வளங்கள் அதிகம் இருந்தாலும், ஒடிசாவில் மக்கள் இன்னும் ஏழைகளாகவே உள்ளனர் என்று பேசிய அமித் ஷா இந்த நிலைமைக்கு முதல்வர் நவீன் பட்நாயக் மட்டுமே காரணம். இங்கு பாஜக ஆட்சிக்கு வாக்களியுங்கள், எந்த இளைஞர்களும் வேலை தேடி மாநிலத்தை விட்டு வெளியேற வேண்டியதில்லை என்று கூறினார். 

பாஜக ஆட்சிக்கு வந்தால் இளம் முதலமைச்சர் கிடைப்பார்

மேலும், ஒடிசாவில் 17 மக்களவைத் தொகுதிகளில் பாஜக வெற்றி பெறும் என்றும், 75க்கும் மேற்பட்ட சட்டமன்றத் தொகுதிகளில் வெற்றி பெற்று மாநிலத்தில் ஆட்சி அமைக்கும் என்று கூறிய அவர். வரும் ஜூன் 4-ம் தேதி தேர்தல் முடிவுகள் அறிவிக்கப்பட்டு, முன்னாள் முதல்வராக நவீன் பட்நாயக் பதவியேற்பார். 

ஒடிசா மாநிலத்திற்கு ஒரு இளம் முதல்வர் வருவார். 25 ஆண்டுகளுக்குப் பிறகு ஒடிசாவுக்கு ஒடியா மொழி பேசும் ஒருவருக்கு முதல் மந்திரி பதவி கிடைக்கும்” என்று அவர் கூறினார்.