Budget 2023:பட்ஜெட் தாக்கலில் 7 அம்சங்களுக்கு முக்கியத்துவம் - நிர்மலா சீதாராமன்

இது குறித்து ஒருங்கிணைந்த வளர்ச்சி, கட்டமைப்பு மேம்பாடு, கடை நிலை வரை வளர்ச்சி உள்ளிட்ட ஏழு முக்கிய அம்சங்களுக்கு இந்த பட்ஜெட்டில் முன்னுரிமை கொடுக்கப்பட்டுள்ளதாக நிதியமைச்சர் நிர்மலா சீதாராமன் தெரிவித்துள்ளார்.

பட்ஜெட் தாக்கலின் போது நிர்மலா சீதாராமன் கூறியதாவது;

• சுதந்திரம் பெற்று 75 வது ஆண்டில் இந்த பட்ஜெட் தாக்கல் செய்யப்பட்டுள்ளது. கடந்த முறை செய்யப்பட்ட பட்ஜெட்டுகள் அடித்தளத்தின் மீது இந்த புதிய பட்ஜெட் அமைய உள்ளது.
• உலகப் பொருளாதாரத்தில் நம் இந்தியா ஒளிரும் நட்சத்திரமாக விளங்கி வருகிறது. வரும் நடப்பு ஆண்டில் ஏழு விழுக்காடு பொருளாதார வளர்ச்சியை இந்தியா காணும். மற்ற நாடுகளுடன் ஒப்பிடுகையில் இது அதிகமாகும்.
• இந்தியாவில் பொருளாதாரம் சிறப்பாக உள்ளது என்பதை உலக நாடுகள் ஒப்புக்கொள்கின்றன. பிற்படுத்தப்பட்டோர், பழங்குடியினர், பெண்கள் உள்ளிட்ட அனைவருக்கும் சிறந்த பட்ஜெட்டாக இது அமையும்.
• உலக பொருளாதார தரவரிசையில் பத்தாவது இடத்திலிருந்து இந்தியா தற்போது ஐந்தாவது இடத்திற்கு முன்னேறி உள்ளது. கடந்த 9 ஆண்டுகளில் தனிநபரின் வருமானமானது இரட்டிப்பாகி உள்ளது.
• 9.6 கோடி சமையல் எரிவாயு இணைப்புகள் உஜ்வாலா திட்டத்தின் கீழ் கொடுக்கப்பட்டுள்ளன. பிரதமர் காப்பீடு திட்டத்தின் கீழ் 44 கோடி பேர் பலன் பெற்றுள்ளனர்.
• இதுவரை 11.4 கோடி விவசாயிகளுக்கு ரூபாய் 2.2 லட்சம் கோடிக்கும் அதிகமான நிதி பிரதமரின் கிசான் திட்டத்தின் கீழ் வழங்கப்பட்டுள்ளது. உணவு தானிய விநியோகத்திற்காக இரண்டு லட்சம் கோடி தற்போது ஒதுக்கீடு செய்யப்பட்டுள்ளது.
• தூய்மை இந்தியா திட்டத்தின் கீழ் 1.75 கோடி கழிவறைகள் கட்டித் தரப்பட்டுள்ளன. பசுமை விவசாயம் மற்றும் பசுமை எரிசக்தி போன்றவற்றை ஊக்குவிக்க பல்வேறு நடவடிக்கைகள் எடுக்கப்பட்டு வருகின்றன.
• ஜி 20 நாடுகளின் மாநாட்டில் இந்தியா தலைமை வகிப்பது மிகுந்த பெருமைக்குரிய விஷயம் ஆகும். மருத்துவ காப்பீடாக மக்களுக்கு 44.6 கோடி வழங்கப்பட்டுள்ளது.
• நிதித்துறை வளர்ச்சி, பசுமை வளர்ச்சி, இளைஞர்களின் ஆற்றல், தேசவளங்களை பயன்படுத்துதல் முக்கியத்துவம், கட்டமைப்பு மேம்பாடு, ஒருங்கிணைந்த வளர்ச்சி, கடை நிலை வரை வளர்ச்சி உள்ளிட்ட ஏழு முக்கிய அம்சங்களுக்கு இந்த பட்ஜெட்டில் முன்னுரிமை அளிக்கப்பட்டுள்ளது.
• அதிக அளவில் சிறுதானியங்களை உற்பத்தி செய்யும் நாடாக உலக அளவில் இந்தியா முன்னுரிமை பெற்றுள்ளது. விவசாயத்தை அதிகரிக்க ஸ்டார்ட் அப் நிறுவனங்களுக்கு நிதி ஒதுக்கப்படும். சிறுதானியங்கள் ஆராய்ச்சி செய்வதற்காக ஹைதராபாத்தில் தனி நிறுவனம் உருவாக்கப்பட உள்ளது.
• கூட்டுறவுச் சங்கங்கள் குறித்த தரவுத் தளம் நாடு முழுவதும் உருவாக்கப்பட உள்ளது. தற்போது இருக்கும் மருத்துவக் கல்லூரிகளுடன் சேர்ந்து 157 நர்சிங் கல்லூரிகள் அமைக்கப்பட உள்ளது.
• விவசாய விளைபொருட்களைச் சேமிக்கப் பரவலாக்கப்பட்ட சேமிப்பு மையங்கள் அமைக்கப்பட உள்ளது

இவ்வாறு தனது உரையின்போது கூறியுள்ளார்.