Shah Rukh Khan: சினிமாவிலிருந்து ரிட்டெயர்மெண்ட்.. மாஸாக பதில் சொன்ன ஷாருக்கான்! வாயை மூடிய கரண் ஜோஹர்

இந்த நிகழ்ச்சியில் பங்கேற்பதற்காக இயக்குநர் மணிரத்னம், நடிகை சமந்தா, தெலுங்கு மெகா ஸ்டார் சிரஞ்சீவி, நந்தமுரி பாலகிருஷ்ணா, இசைப்புயல் ஏ.ஆர்.ரஹ்மான், தெலுங்கு நடிகர்கள் ராணா டகுபதி, மற்றும் வெங்கடேஷ் டகுபதி போன்ற நட்சத்திரங்கள் கலந்துகொண்டனர்.

இதேபோல் பாலிவுட் சினிமாவில் இருந்து ஐஸ்வர்யா ராய், ஷாஹித் கபூர், ஷாருக்கான், அனன்யா பாண்டே, கிருதி சனோன், கரண் ஜோஹர், ஜாவேத் அக்தர், ஷபானா ஆஸ்மி உள்ளிட்ட பலரும் கலந்துகொண்டனர்.

கலைஞர்களுக்கு விருது

விழாவின் முதல் நாள் சிறந்த நடிகர், நடிகை, இயக்குநர், வில்லன், துணை நடிகர்கள், இசையமைப்பாளர் என பல துறைகளுக்கு விருது வழங்கப்பட்டது. அதில், பொன்னியின் செல்வன் திரைப்படமே அதிக விருதுகளைக் குவித்தது.

இந்தப் படத்தில் நடித்ததற்காக நடிகர் விக்ரமுக்கு சிறந்த நடிகர் விருதும், ஐஸ்வர்யா ராய்க்கு சிறந்த நடிகை விருதும், மணிரத்னத்திற்கு சிறந்த இயக்குநர் விருதும், ஏ.ஆர்.ரகுமானுக்கு சிறந்த இசையமைப்பாளர் விருதும், ஜெயராமுக்கு சிறந்த துணை நடிகர் விருதும் கிடைத்தது.

வைப் ஆக்கிய ஷாருக்கான்

இந்த நிலையில், விழாவின் 3ம் மற்றும் கடைசி நாளான இன்று, நடிகர் ஷாருக்கான் விழாவில் பங்கேற்று அனைவரையும் குஷியாக்க இருந்தார். அதற்காக அவர், நடிகர் விக்கி கௌஷலுடன் இணைந்து பான் இந்தியா திரைப்படமான புஷ்பா படத்தின் ஊ சொல்றியா மாமா பாடலுக்கு நடனமாடி அனைவரையும் வைப் ஆக்கினார்.

நச்சென பேசிய ஷாருக்கான்

பின் அவர் பாலிவுட் தயாரிப்பாளரும், இயக்குநருமான கரண் ஜோஹருடன் உரையாடினார். அப்போது, கரண் ஜோஹரின் கேள்வி ஒன்றிற்கு பதிலளித்த ஷாருக்கான், “சச்சின், சுனில் சேத்ரி, ரோஜர் பெடரர் போன்ற மாபெரும் லெஜண்ட்டுகளுக்கு அவர்களின் ஓய்வை எப்போது அறிவிக்க வேண்டும் என்பது தெரியும்” எனக் கூறினார்.

இதை தனது வாய்ப்பாக பயன்படுத்திக் கொண்ட கரண் ஜோஹர், ஷாருக்கானிடம் நீங்கள் ஏன் ஓய்வு குறித்த முடிவை எடுக்கவில்லை எனக் கிண்டலாகக் கேட்டார்.

வைரலான ஷாருக்கான்

அதைக்கேட்ட ஷாருக்கான், விழாவில் இருந்த அனைவரும் ஆச்சர்யப்படும் விதமாகவும் யாரும் எதிர்பார்க்காத விதமாகவும் பதில் ஒன்றை அளித்துள்ளார். அதில் நானும் தோனியும் வித்தியாசமான லெஜண்டுகள். நாங்கள் ஓய்வு முடிவை எடுத்த பிறகும் 10 ஐபிஎல் மேட்சுகள் விளையாடுவோம் என நச்சென்று பதிலளித்தார். இதைக் கேட்ட பலரும் ஷாருக்கானின் பதிலுக்கு விசிலடித்து உற்சாகமூட்டினர்.

இந்த உரையாடலைக் கேட்ட நடிகர் விக்கி கௌஷல், லெலஜண்டுகளுக்குத் தான் ஓய்வு. ராஜாக்கள் என்றுமே நிலையானவர்கள் எனக் கூறி ஆராவாரம் செய்தார். இதனால் அந்த இடமே அதகளம் ஆனது. இந்தப் பதிலை எதிர்பார்க்காத கரண் ஜோகர் வாயடைத்து நின்றார். இந்த உரையாடல் பலராலும் ரசிக்கப்பட்ட நிலையில், ஷாருக்கானின் நச் பதிலை பலரும் பகிர்ந்து வைரலாக்கி வருகின்றனர்.