8 Years Of Joker: 'என்னங்க சார் உங்க சட்டம்’; அரசின் ஊழல்களை தோலுரித்த ஜோக்கர் திரைப்படம்!

பள்ளி உரிமையாளருக்கு எதிராக மன்னர்மன்னன் தொடுத்த வழக்கு தள்ளுபடியானதும், மன்னன் அவரை கத்தியால் குத்திவிடுகிறார். இதனால் கைதாகி விடுகிறார். அப்போது, இவர் தொடர்பாக சமர்ப்பிக்க அறிக்கையின் மூலம் மன்னர்மன்னன் பற்றிய பழைய கதை விரிகிறது.

மன்னர்மன்னன் எல்லோரையும் போல, பொறுப்பான கூலித்தொழிலாளர். பக்கத்து ஊரில் பணிசெய்யும் மல்லிகா என்னும் பெண்ணை ஒருதலையாக காதலிக்கிறார். ஒரு கட்டமாக மல்லிகாவின் வீட்டில் போய் பெண் கேட்கிறார். பல கட்டப்போராட்டங்களுக்குப் பின், மல்லிகா, கழிப்பறை அமைக்கவேண்டும் என்ற நிபந்தனையோடு, மன்னர்மன்னனை கல்யாணம் செய்துகொள்கிறார். அரசின் மானியத்திட்டத்தில் பல்வேறு ஊழல்களுக்குப் பின், வெறும் கழிப்பறைக் கோப்பையை மட்டுமே பெறுகிறார்.

சரியான பணவசதியில்லாமல் தவிக்கும் மன்னர் மன்னனின் வீட்டுக்கு, கவுன்சிலர் அரசின் திட்டத்தின்பேரில் கழிப்பறையை அமைக்க முன் வருகிறார். ஏனெனில், வீட்டுக்கு ஒரு கழிப்பறை திட்டத்தை திறந்து வைக்க குடியரசுத்தலைவர் மன்னர்மன்னனின் ஊருக்கு வந்து, அவரது வீட்டு கழிப்பறையைத் திறந்துவைப்பது என குடியரசுத்தலைவரின் திட்டத்தில் நிகழ்ச்சி நிரல் திட்டமிட்டதனால் தான் எனலாம்.

இதனால், அவசர அவசரமாக மன்னர்மன்னனின் வீட்டில் அரையும்குறையுமாக ‘கழிப்பறை’ கட்டிமுடிக்கப்படுகிறது. துரதிர்ஷ்டவசமாக, கர்ப்பிணியாக இருக்கும் மல்லிகா மன்னர்மன்னன், முதல்நாள் இரவில் தன் வயிற்று உபாதையைக் கழிக்க அந்த கழிப்பறைக்குச் செல்கிறார். கழிப்பறையில் அவர் அமர்ந்திருக்கும்போது, அவர் மீது கட்டடம் இடிந்துவிழுகிறது.

இதை மறுநாள் காலையில் பார்த்து அதிர்ச்சியாகும் மன்னர்மன்னன், தன் மனைவியை ஆம்புலன்ஸில் மருத்துவமனைக்குச் செல்ல நினைக்கிறார். ஜனாதிபதி வரும் நிகழ்ச்சி என்பதால், அவரை ஒரு அறையில் வைத்து விழா முடியும் வரை அடைத்துவிடுகின்றனர். இதனால், மல்லிகா மன்னர்மன்னனின் கரு இறந்துபோகிறது. அவரும் கோமா நிலைக்குச் செல்கிறார். இதனால் விரக்திக்குள்ளாகிறார். ஒரு கட்டத்தில் மல்லிகாவை கருணைக்கொலை செய்ய உச்ச நீதிமன்றம் வரை செல்கிறார். இதுபோன்ற நிலையில் சற்று மனப்பிறழ்வுக்கு ஆளாகிறார், மன்னர்மன்னன்.

தன் மனைவியின் உயிரைப் பாதிப்புக்குள்ளாக்கிய ஊழல்களுக்கு எதிராகப் பல்வேறு போராட்டங்களை முன்னெடுக்கிறார். உச்ச நீதிமன்றத்தின் இறுதித்தீர்ப்பில் மல்லிகாவின் கருணைக்கொலை வழக்கு தள்ளுபடியாகிறது. மேலும் உச்ச நீதிமன்றம், அவரது மனநிலையை ஆய்வுசெய்ய உத்தரவிடுகிறது.

ஆனால், அதிலிருந்து தப்பி சொந்த ஊர் வரும் மன்னர்மன்னனனை மணல் ஏற்றிய லாரி மோதி, அதில் அவர் இறக்கிறார். இறுதியில் மன்னர்மன்னனின் நண்பர்களான பொன்னூஞ்சலும், இசையும் கோமாவில் இருக்கும் மல்லிகாவைப் பார்த்துக்கொள்கின்றனர். மன்னர்மன்னனின் மரணத்துக்கு, அவரது நண்பர்கள் தான் காரணம் என, அவரது சகோதரி குற்றம்சாட்டுகிறார். இறுதியில், மன்னர்மன்னனின் இறப்பு, ஒரு திட்டமிட்ட கொலை என்று அம்பலமாகிறது. படம் பார்க்கும் நபர்களைப் போராட்டத்துக்கு அழைத்து படம் முடிகிறது.

ஜோக்கர் படத்தில் நடித்தவர்கள் விவரம்:

இப்படத்தில் குரு சோமசுந்தரம் மன்னர்மன்னனாக நடித்துள்ளார். ரம்யா பாண்டியன், மல்லிகா மன்னர்மன்னனாக நடித்துள்ளார். இசையாக காயத்ரி கிருஷ்ணாவும், பொட்டி கேஸ் பொன்னூஞ்சலாக மு.ராமசாமியும் நடித்துள்ளனர். தவிர, பவ செல்லதுரை மற்றும் பலர் நடித்துள்ளனர்.

ஜோக்கர் படத்தில் இசையின் பங்கு:

இப்படத்தில் மொத்தம் ஆறு பாடல்கள் இடம்பெற்றுள்ளன. அதனை ஷான் ரோல்டன் இசையமைத்துள்ளார். குறிப்பாக, இதில் என்னங்க சார் உங்க சட்டம், ஓல ஓல குடிசையில் ஒண்ட வந்த மீனாட்சி, ஜாஸ்மினு, செல்லம்மா ஆகிய நான்கு பாடல்கள் ஹிட்டடித்தன. அதில், ஜாஸ்மின் பாடலைப் பாடிய சுந்தரய்யருக்கு சிறந்த பின்னணிப் பாடகருக்கான தேசிய விருது கிடைத்தது.

ட்ரீம் வாரியர்ஸ் நிறுவனம் தயாரித்த இந்தப்படம், அரசில் நடக்கும் ஊழல்களை சுட்டிக்காட்டி சிரிக்கவும் சிந்திக்கவும் வைத்தது. படம் வெளியாகி இன்றுடன் 8 ஆண்டுகள் ஆனாலும், டிவியில் இந்தப் படத்தைப் பார்க்கும்போது நல்ல கருத்துள்ள படம் என்னும் உணர்வைப் பெறுவது உறுதி.. வாழ்த்துகள் ராஜூமுருகன்!