அமரனை தமிழ்நாட்டில் வீழ்த்துவது கஷ்டம்! கங்குவாவிற்கு இணையாக வசூல் வேட்டை நடத்தும் அமரன்!

ஆனால், கங்குவா அதிகளவு விமர்சனத்திற்கு உள்ளாக்கப்பட்டு வருவதால், ஏற்கனவே வசூலில் கெத்து காட்டி வரும் அமரனுக்கு வரும் கூட்டம் அதிகரித்துள்ளது. இதனால், அமரன் படம் வார இறுதி நாளான நேற்று கங்குவா திரைப்படத்திற்கு இணையாக நல்ல வசூலைக் குவித்து வருகிறது.

வசூல் நிலவரம்

அமரன் திரைப்படம் வெளியான 17வது நாளான நேற்று, தமிழ்நாட்டில் மட்டும் 5.23 கோடி ரூபாய் வசூலப் பெற்றுள்ளது. இதுவரை படம் வெளியான 17 நாட்களில் 143.83 கோடி ரூபாய் வசூலைப் பெற்று சிவகார்த்திகேயனின் சினிமா வரலாற்றில் மாபெரும் வெற்றிப் படமாக மாறியுள்ளது.

மேலும், அமரன் படம் வெளியான 17 நாட்களில் இந்தியாவில் மட்டும் 202.25 கோடி ரூபாய் வசூலையும், உலகளவில் 277.25 கோடி ரூபாய் வசூலையும் பெற்று பிளாக் பஸ்டர் படமாக ஓடிக் கொண்டிருக்கிறது என்பது sacnilk.com எனும் இணையதளம் வெளியிட்ட தகவலின் அடிப்படையில் தெரிய வந்துள்ளது.

ஓடிடி ரிலீஸ் ஒத்தி வைப்பு

கங்குவா வெளியீட்டிற்குப் பின், அமரன் திரைப்படத்தின் வசூல் பாதிக்கப்படும் என எதிர்பார்க்கப்பட்ட நிலையில், அதன் வசூல் சீராக சென்று கொண்டிருப்பதால் படக்குழு மகிழ்ச்சி அடைந்துள்ளது.

முன்னதாக திரையரங்குகளில் வெற்றிகரமாக ஓடிக் கொண்டிருக்கும், அமரன் திரைப்படத்தின் ஓடிடி வெளியீட்டை திரையரங்கு வெளியீட்டுக்கு பிறகு குறைந்தபட்சம் 8 வாரங்கள் கடந்த பின் வெளியிட கோரிக்கை விடுத்து, ரெட் ஜெயண்ட் மூவிஸ், தயாரிப்பாளர் கமல் மற்றும் நடிகர் சிவகார்த்திகேயனுக்கு தமிழ்நாடு திரையரங்க உரிமையாளர்கள் சங்கத்தினர் கடிதம் எழுதியுள்ளனர்.

மேஜர் முகுந்த் வரதராஜனின் வாழ்க்கை

தமிழ்நாட்டைச் சேர்ந்த மேஜர் முகுந்த் வரதராஜன் ராணுவத்தில் வீரமரணம் அடைந்தார். அவரது வாழ்க்கை வரலாற்றை மையமாகக் கொண்டு உருவாக்கப்பட்டு இருக்கும் திரைப்படம் தான் அமரன். முகுந்த்தாக சிவகார்த்திகேயன் நடித்திருக்கும் நிலையில், அவரது மனைவி இந்துவாக நடிகை சாய் பல்லவி நடித்து இருக்கிறார். ராஜ் குமார் பெரிய சாமி இயக்கத்தில் உருவாக்கப்பட்டு இருக்கும் இந்தப் படத்தை கமல்ஹாசன் தயாரித்து இருக்கிறார்.

இராணுவ வீரரின் உண்மைக் கதை

இப்படம் காஷ்மீரில் தேர்தல் பாதுகாப்பு பணியில் ஈடுபட்டிருந்த போது பாகிஸ்தான் தீவிரவாதிகளால் சுட்டுக் கொல்லப்பட்ட இராணுவப் படை வீரர் மேஜர் முகுந்த் வரதராஜனின் வாழ்க்கை வரலாற்றை கதையாக கொண்டுள்ளது. உண்மைக் கதை என்பதால் படம் வெளியாகும் முன்பே படத்திற்கு அதிக வரவேற்பு இருந்தது. இப்படத்தில் சிவகார்த்திகேயன் பயன்படுத்திய பெரிய ரக துப்பாக்கி உண்மையானது எனத் தெரிவிக்கப்பட்டுள்ளது.

வாழ்ந்து காட்டிய நடிப்பு அரக்கர்கள்

நடை, உடை, பாவனை, கட்டு மஸ்தான உடம்பு என முகுந்தின் ஒட்டு மொத்த உருவமாக இதுவரை நாம் பார்க்காத நடிகராக சிவகார்த்திகேயனை மாற்றி இருக்கிறார் இயக்குனர் ராஜ்குமார். நடிப்பிலும் முழுக்க முழுக்க வேறொரு களத்தில் இறங்கி, மீண்டும் ஒரு பரீட்சார்த்த முயற்சியை கையில் எடுத்து அதில் வெற்றியும் பெற்று இருக்கிறார் சிவா. ஒரு இராணுவ வீரனுக்கான மிடுக்கு ஒரு பக்கம் கவர, இன்னொரு பக்கம் அவர் நடிப்பில் வெளிப்பட்ட எமோஷன் திரையை சிதற விடுகிறது.

இதனால், ஏற்கனவே படம் பார்த்தவர்களும் கூட, இவர்களின் நடிப்பால் ஈர்க்கப்பட்டு தியேட்டருக்கு திரும்பத் திரும்ப வருகின்றனர். இதன் காரணமாக அமரன் படத்தின் வசூல் அதிகரிப்பதால் இப்படத்தின் தயாரிப்பாளரான கமல் மிகவும் குஷியில் உள்ளார்.