மேட்ச் வின்னரா மேஜர் முகுந்த்? தீபாவளி ரேஸில் அமரனுக்கு எந்த இடம்? முதல் காட்சி விமர்சனம் இதோ!

அமரன் கதை இது தான்

மேஜர் முகுந்த் வரதராஜனுக்கு ராணுவத்தில் நுழைய வேண்டும் என்ற ஆசை எப்படி வந்தது, அதற்காக அவர் வீட்டில் எப்படியான எதிர்ப்பை சந்தித்தார். இதற்கிடையே சிக்கி இருக்கும் அவரது காதல் என்ன ஆனது? ராணுவத்தில் அவர் எப்படியான சாகசங்களை செய்தார்? காஷ்மீரில் ஏன் அசாதாரண சூழ் நிலை நிலவுகிறது உள்ளிட்ட கேள்விகளுக்கான பதில்கள்தான் அமரன் படத்தின் கதை!

நடை, உடை, பாவனை, கட்டு மஸ்தான உடம்பு என முகுந்தின் ஒட்டு மொத்த உருவமாக இதுவரை நாம் பார்க்காத நடிகராக சிவகார்த்திகேயனை மாற்றி இருக்கிறார் இயக்குனர் ராஜ்குமார். நடிப்பிலும் முழுக்க முழுக்க வேறொரு களத்தில் இறங்கி, மீண்டும் ஒரு பரீட்சார்த்த முயற்சியை கையில் எடுத்து அதில் வெற்றியும் பெற்று இருக்கிறார் சிவா. ஒரு இராணுவ வீரனுக்கான மிடுக்கு ஒரு பக்கம் கவர, இன்னொரு பக்கம் அவர் நடிப்பில் வெளிப்பட்ட எமோஷன் திரையை சிதற விடுகிறது. அவரது மனைவி சாய் பல்லவியின் நடிப்பில் அவ்வளவு நிஜம். முகுந்த் மீது இந்து வைத்திருந்த அப்பழுக்கற்ற காதலை, ஆத்மார்த்தமான அன்பை, அவர் நடிப்பில் கொண்டு வந்திருக்கும் விதம் நடிப்பில் அவருக்கும் இருக்கும் ஆளுமையை வெளிப்படுத்தி இருக்கிறது. இதர கதாபாத்திரங்ளும் உண்மைக்கு நெருக்கமாக தன்னுடைய பங்களிப்பை கொடுத்து இருக்கின்றனர்.

ராணுவ வீரர்களின் தியாகம் போற்றப்பட வேண்டியது

இயக்குநர் ராஜ்குமார் பெரியசாமி, முகுந்தின் வாழ்க்கையை எவ்வளவு உண்மையாக காட்சி படுத்த முடியுமோ, அவ்வளவு உண்மையாக காட்சி படுத்தி இருக்கிறார். முகுந்த் ராணுவத்தில் இருந்த போது அவர் பணியாற்றிய இடங்களுக்கு சென்று நேரடியாக காட்சிகளை காட்சிப்படுத்தியது, நாமே அங்கு இருப்பது போன்ற உணர்வையும் பதபதப்பையும் கொடுத்து இருக்கிறது. குறிப்பாக காஷ்மீரில் ஏன் அசாதாரண சூழ்நிலை நிலவுகிறது என்பதை குட்டி டாக்குமெண்ட்ரியாக பதிவு செய்தது, இராணுவ வீரர்களின் தியாகம், அவர்கள் சந்திக்கும் ஆபத்துகள் உள்ளிட்ட வற்றை பதிவு செய்தது அல்டிமேட் ரகம்.

வாழ்க்கையை வரலாறு என்பதற்காக ஜவ்வாக இழுக்காமல் விறுவிறுப்பாக அவர் அமைத்த திரைக்கதை படத்தை போரடிக்காமல் பார்த்துக் கொண்டது. பாடல்களை விட பின்னணி இசையில் ஜிவி தனது முத்திரையை ஆழமாக பதித்து இருக்கிறார்.