26 Years Of Pistha: காமெடியில் சக்க போடு போட்ட கார்த்திக்கின் 'பிஸ்தா' ரிலீஸான நாள் இன்று
26 Years Of Pistha: திரையரங்குகளில் 100 நாட்களுக்கும் மேல் ஓடி மாபெரும் ஹிட் கொடுத்த 'பிஸ்தா' திரைப்படம் 1997 ஆம் ஆண்டு இதே மே 9 ஆம் நாளில் வெளியாகியது.
கதாபாத்திரத்தை உள்வாங்கி, ரொம்பவே யதார்த்தமாக நடிப்பதில் கில்லாடி என்று பேரெடுத்தார் நடிகர் கார்த்திக். அவரது நடிப்பில் வெளியான 'உள்ளத்தை அள்ளித்தா', 'மேட்டுக்குடி' போன்று காமெடி சரவெடிகளை கொளுத்திப் போட்ட படம் தான் 'பிஸ்தா'.
ட்ரெண்டிங் செய்திகள்
அப்பாவி மற்றும் அடாவடி என இரு முகம் காட்டும் கதாபாத்திரத்தில் கார்த்திக் அசத்தி இருப்பார். கே.எஸ்.ரவிக்குமார் இயக்கிய இத்திரைப்படத்தில் கார்த்திக்குடன் நக்மா, மணிவண்ணன், மவுலி ஆகியோர் முக்கிய கதாபாத்திரங்களில் நடித்திருந்தனர்.
சபரிமலைக்கு மாலை அணிந்து விரதம் இருக்கும் கார்த்திக்கின் நல்ல குணத்தை தெரிந்துகொண்டு அவரை, ஊட்டியில் இருக்கும் தனது தொழிற்சாலைக்கு மவுலி மேனேஜராக்குகிறார். மவுலியின் மகளான நக்மா, தொழிற்சாலையில் யாரும் வேலை செய்யக் கூடாது என கட்டளையிட்டு இருக்கிறார். வீட்டில் இருக்கும் பொருட்களை உடைக்கிறார். நக்மாவுக்கும், கார்த்திக்கும் அடிக்கடி வாக்குவாதம் வருகிறது.
இதனிடையே, திருமணம் செய்து கொண்டால் தான் தனக்கு சொத்து கிடைக்கும் என்ற உண்மை நக்மாவுக்கு தெரிய வருகிறது. இதையடுத்து, அப்பாவியாக இருக்கும் கார்த்திக்கை நக்மா திருமணம் செய்துகொள்கிறார். திருமணத்துக்கு பின் தான், கார்த்திக் அப்பாவி அல்ல, அடாவடி செய்பவர் என்பது தெரிய வருகிறது. கார்த்திக், கொஞ்சம் கொஞ்சமாக நக்மாவின் திமிறை அடக்கி, எப்படி அவரது குணங்களை மாற்றுகிறார் என்பது தான் மீதிக்கதை.
வயிறு குலுங்க குலுங்க சிரிக்க வைக்கும் கதையில் முதல் பாதி நக்மாவின் ஆட்டமும், இரண்டாம் பாதியில் கார்த்திக்கின் ஆட்டமும் ரசிகர்களை ரசிக்க வைக்கும். பிரமிட் நடராஜன் தயாரித்த இப்படத்திற்கு கென்னடி கதை, வசனம் எழுதியிருந்தார். எஸ்.ஏ.ராஜ்குமார் இசையில் 'கண்களிலே ஒரு காதல் நிலா..வந்தது வந்தது வீதி உலா', 'கோழிக்கறி கொண்டு வரட்டா', 'சரணம் ஐயப்பா' பாடல்கள் சிறப்பாக அமைந்திருந்தன. குறிப்பாக பிஸ்தா..பிஸ்தா என்ற பின்னணி இசை பட்டையை கிளப்பியது.
திகட்டாத நகைச்சுவையை ரசிகர்களுக்கு விருந்தாக அளித்த 'பிஸ்தா' 1997 ஆம் ஆண்டு மே 9-ல் திரையரங்குகளில் ரிலீஸானது. இப்படம் வெளிவந்து இன்றோடு 26 ஆண்டுகளை நிறைவு செய்துள்ளது. தமிழகம் முழுவதும் 100 நாட்களை கடந்து வெற்றிகரமாக ஓடிய இப்படம் வெளி வந்து இன்றோடு 26 ஆண்டுகளை கடந்திருக்கிறது. நேற்று ரிலீசானது போல் உள்ளது. ஆனால் 26 ஆண்டுகள் உருண்டோடியது என்றால் ஆச்சரியமாக இருக்கிறது. காலங்கள் உருண்டோடினாலும் கார்த்திக்கின் நடிப்பில் இந்தப்படமும் ஒரு மைல்கல்.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9
டாபிக்ஸ்