TN Law And Order: தமிழ்நாடு கொலை மாநிலம் அல்ல; கலை மாநிலம்! சட்டத்துறை அமைச்சர் ரகுபதி வினோத பேட்டி!

செய்தியாளர்களை சந்தித்த அவர் கூறுகையில், தமிழ்நாட்டில் ஏற்பட்ட தொடர் தோல்வியின் விரக்தியினால், இன்றைக்கு மாண்புமிகு சட்டமன்ற எதிர்க் கட்சித் தலைவராக இருக்கக்கூடிய எடப்பாடி பழனிச்சாமி அவர்கள் தமிழ்நாடு கொலை மாநிலமாக மாறிவிட்டது என்கின்ற ஒரு புதிய குற்றச்சாட்டை வைத்திருக்கின்றார்கள். 

கொலை மாநிலம் அல்ல; கலை மாநிலம் 

அவருக்கு நாங்கள் தெரிவிக்க விரும்புவது என்னவென்றால், தமிழ்நாடு கொலை மாநிலம் அல்ல, கலை மற்றும் அறிவுசார் மாநிலம் தான் தமிழ்நாடு. இன்னும் சொல்லவேண்டும் என்றால், சமூக விரோதிகளை களையெடுக்கின்ற மாநிலம் தமிழ்நாடு. இதை அவர் உணர்ந்து கொண்டாக வேண்டும். அவருடைய ஆட்சியில் நடந்த சம்பவங்கள் ஆட்சியோடு தொடர்புடையவை. ஆனால், இந்த ஆட்சியில் எந்தச் சம்பவங்களும், வன்முறை சம்பவங்களும் ஆட்சியோடு தொடர்புடைய சம்பவங்களாக நடைபெறவில்லை. 

கொடநாடு கொலை வழக்கு 

கொடநாடு சம்பவம் என்று எடுத்துக்கொண்டால், அது அன்றைய முன்னாள் முதலமைச்சர் ஜெயலலிதா அவர்களுடைய camp அலுவலகமாக இருந்தது. ஆனால் அங்கே தொடர் கொலை, கொள்ளை சம்பவங்கள் திரு. எடப்பாடி பழனிச்சாமி அவர்கள் முதலமைச்சராக இருந்தபோது நடந்திருக்கின்றன. 

அது ஆட்சியாளர்களுடைய திறமையின்மையை காண்பிப்பதாக அமைந்திருக்கிறது அல்லது ஏதோ சதித்திட்டங்கள் அடிப்படையில் அமைந்திருக்கிறது. இன்னும் சொல்லப்போனால், அன்றைக்கு முதலமைச்சராக இருந்த எடப்பாடி பழனிச்சாமி அவர்கள் தூத்துக்குடி துப்பாக்கி சூடு சம்பவம் கூட எனக்கு தெரியாது; நான் டிவியில் பார்த்து தான் தெரிந்து கொண்டேன் என்று 13 உயிர்கள் பலியான சம்பவம் கூட முதலமைச்சராக இருந்து தனக்கு தெரியாது என்று தான் சொல்லியிருக்கிறாரே தவிர ஒப்புக்கொள்ளவில்லை. அப்போதுதான் தெரியும் என்று சொன்னார். 26, 27, 28-ஆம் தேதிகளில் அவர் 5 சம்பவங்களை சொல்லுகிறார். அதில் ஒன்று புதுச்சேரியில் நடந்தது. அதையும் நம்முடைய தமிழ்நாட்டு கணக்கிற்கு மாண்புமிகு எடப்பாடி பழனிச்சாமி அவர்கள் கொண்டு வந்திருக்கிறார்கள். ஆனால், அது புதுச்சேரியில் நடந்தது. மீதமுள்ள 4 சம்பவங்களும் அரசாங்கத்திற்கு தொடர்புடையவை அல்ல. 

இதற்கெல்லாம் அரசாங்கம் பொறுப்பாக முடியாது

எல்லாமே சொந்த காரணங்களுக்காக அல்லது அவர்களுக்குள்ளே இருக்கக்கூடிய முன் விரோதத்தின் அடிப்படையில், பகைமை அடிப்படையில், ஒருவருக்கொருவர் முன்விரோதம் காரணமாக தான் இந்த சம்பவங்கள் நடந்து இருக்கின்றனவே தவிர, இதில் எதுவுமே இன்றைக்கு சட்டம் ஒழுங்கு சீர் கெடுக்கும் அளவுக்கு எந்த சம்பவங்களும் கிடையாது. இன்று மக்கள் தொகை பல மடங்கு உயர்ந்திருக்கிறது. அதே நேரத்தில் இது போன்ற தற்செயலான சம்பவங்கள் எண்ணிக்கை ஒருசில அதிகமாக இருக்கும், குறைவாக இருக்கும். ஆனால், அதற்கு அரசாங்கம் எந்த வகையிலும் பொறுப்பாக முடியாது. 

தொடர்ந்து நடவடிக்கை எடுக்கப்படுகின்றது

நாங்கள் எந்த வகையிலும் அதற்கு பொறுப்பாக இருந்தால், எங்கள் மீது குற்றம் சுமத்தலாம். ஆனால் அதே நேரத்தில் யார், யாருக்கு முன் விரோதம் இருக்கின்றது என்றெல்லாம் இப்போது கண்டுபிடித்து நடவடிக்கை எடுத்துக் கொண்டுதான் இருக்கிறோம். காவல்துறையினர் ரவுடிகளின் பட்டியலை வைத்து அவர்களுக்குள் motive இருக்கிறதா? முன் பகைமை இருக்கிறதா? விரோதம் இருக்கிறதா? என்று அவற்றையெல்லாம் கண்டறிந்து தீர்த்து வைக்கவேண்டும் என்றும், இதுபோன்ற சம்பவங்கள் நடைபெறக்கூடாது என்றும் முன்நடவடிக்கை எடுக்கின்ற முதலமைச்சராக நமது மாண்புமிகு தமிழ்நாடு முதலமைச்சர் அவர்கள் இருக்கிறார் என்பதை நான் இங்கே தெரிவித்துக் கொள்ள விரும்புகிறேன். 

இந்தியாவிலேயே முதன்மை மாநிலம் 

எனவே, சட்டம் ஒழுங்கை இன்றைக்கு இந்த அரசு சிறப்பாக பேணிப்பாதுகாப்பதால்தான் இந்தியாவிலேயே முதன்மையான மாநிலமாக நம்முடைய தமிழ்நாடு இன்றைக்கும் இருக்கிறது என்பதை யாரும் மறந்துவிட முடியாது, மறுக்கவும் முடியாது. அனைத்து தொழிலதிபர்களும் தமிழ்நாட்டை நாடி வருகிறார்கள். ஆனால், எடப்பாடி பழனிச்சாமி போன்றவர்கள் இதை வேறு கோணத்தில் மாற்றிவிட்டு தமிழ்நாடு பின்னோக்கிச் சென்றுவிடுமா? என்று கனவு காண்கிறார். அவருடைய கனவு ஒரு காலத்திலும் பலிக்காது.

நிச்சயமாக மாண்புமிகு தமிழ்நாடு முதலமைச்சர் அவர்கள் எல்லாவற்றையும் வென்று காண்பிப்பார். தமிழ்நாடு தான் இந்தியாவிலேயே முதன்மை மாநிலமாக, சிறந்த அமைதிப் பூங்கா என்பதை நிலைநிறுத்துவார்.