Tamilisai: ஆளுநர் பொறுப்பில் இருந்து தமிழிசை சவுந்தராஜன் ராஜினாமா எதிரொலி! சிபி ராதா கிருஷ்ணனுக்கு ஜாக்பாட்!

புதுச்சேரி துணை நிலை ஆளுநர் மற்றும் தெலங்கானா மாநில ஆளுநர் பொறுப்பை ராஜினாமா செய்து அதற்கான கடிதத்தை நேற்றைய தினம் குடியரசுத் தலைவர் திரௌபதி முர்முவுக்கு அனுப்பினார். நாடாளுமன்றத் தேர்தலில் தமிழிசை சவுந்தராஜன் போட்டியிடலாம் என ஏற்கெனவே கூறப்பட்ட நிலையில் தற்போது அவரது பதவியை தமிழிசை ராஜினாமா செய்தார். 

நாடாளுமன்றத் தேர்தல் 2024

தமிழகம் மற்றும் புதுச்சேரியில் வரும் ஏப்ரல் 19ஆம் தேதி அன்று ஒரே கட்டமாக நாடாளுமன்றத் தேர்தல் நடைபெறுகிறது. இதற்கான வேட்புமனுத்தாக்கல் மார்ச் 20ஆம் தேதியான நாளை மறுநாள் தொடங்குகிறது. வேட்புமனு தாக்கல் செய்ய கடைசி நாள் மார்ச் 27 ஆகும்.மார்ச் 28ஆம் தேதி வேட்புமனுக்கள் மீதான பரிசீலனை நடைபெறும் நிலையில், வேட்புமனுக்களை திரும்பப் பெற மார்ச் 30ஆம் தேதி கடைசி நாள் ஆகும். பதிவு செய்யப்பட்ட வாக்குகள் வரும் ஜூன் 4ஆம் தேதி எண்ணப்பட்டு அன்றே முடிவுகள் அறிவிக்கப்படுகின்றன.

புதுச்சேரி, தென்சென்னை, கன்னியாகுமரி ஆகிய மூன்று தொகுதிகளில் ஏதேனும் ஒரு தொகுதியில் தமிழிசை சவுந்தராஜன் போட்டியிட வாய்ப்புகள் உள்ளதாக கூறப்படுகிறது.

தென் சென்னை தொகுதி!

20 ஆண்டுகளுக்கும் மேலாக ஆக்டிவ் அரசியலில் இருக்கும் தமிழிசை சவுந்தரராஜன் இதுவரை போட்டியிட்ட ஒரு தேர்தலில் கூட வெற்றி பெற்றது இல்லை.

கடந்த நாடாளுமன்றத் தேர்தலில் தென் சென்னை தொகுதியை குறி வைத்த நிலையில் அது கூட்டணியில் இருந்த அதிமுகவின் ஜெயவர்தனுக்கு சென்றதால் வேறு வழியின்றி தூத்துக்குடி தொகுதியில் போட்டியிட்டு தோல்வி அடைந்திருந்தார். தூத்துக்குடி துப்பாக்கிச்சூடு உள்ளிட்ட பல்வேறு காரணங்கள் அவரது தோல்விக்கு காரணங்களாக சொல்லப்பட்டது.

இந்த நிலையில் தென் சென்னை மக்களவை தொகுதி அவருக்கு சாதகமானதாக இருக்கும் என கருதப்படுகிறது. ஏற்கெனவே கடந்த 2011ஆம் ஆண்டு வேளச்சேரி சட்டமன்றத் தொகுதியிலும், 2016ஆம் ஆண்டு தனது இல்லம் அமைந்திருக்கும் விருகம்பாக்கம் சட்டமன்றத் தொகுதிலும் போட்டியிட்ட அனுபவம் தமிழிசைக்கு உள்ளது.

அதுமட்டுமின்றி மயிலாப்பூர், தி.நகரில் உள்ள பிராமணர்களில் வாக்குகள் கணிசமாக கிடைக்கும் பட்சத்தில் வெற்றி இலக்கை அடைந்துவிடலாம் என்பது தமிழிசையின் திட்டமாக உள்ளது.

தமிழிசை பேட்டி!

இது தொடர்பாக சென்னை விமான நிலையத்தில் நேற்றைய தினம் செய்தியாளர்களை சந்தித்த தமிழிசை சவுந்தரராஜன், மீண்டும் தீவிர மக்கள் பணிக்கு திரும்புவதற்காக மனம் உவந்து ராஜினாமா செய்துள்ளேன். தெலங்கானா மற்றும் புதுச்சேரி மக்கள் என் மீது காட்டிய அன்பிற்கு நன்றி உடையவளாக இருப்பேன். எனக்கு ஆளுநராக வாய்ப்பு அளித்த குடியரசுத் தலைவர், பிரதமர், உள்துறை அமைச்சருக்கு நன்றி. எனது உள்ளக்கிடக்கை நேரடி மக்கள் பணி ஆற்றுவதற்காக எனது விருப்பத்தின் பேரில் நான் ராஜினாமா செய்துள்ளேன். என்னுடைய ராஜினாமா ஏற்றுக் கொள்ளப்பட்ட உடன் எனது வருங்கால திட்டம் பற்றி விரிவாக சொல்கிறேன். எனது ராஜினாமா குறித்து பிரதமரிடமும், உள்துறை அமைச்சரிடமும் கூறினேன் என கூறி இருந்தார். 

இந்த நிலையில் தமிழிசை சவுந்தராஜனின் ராஜினாமாவை குடியரசுத் தலைவர் திரௌபதி முர்மு ஏற்றுக் கொண்டுள்ளார். அவருக்கு பதிலாக தெலங்கானா மற்றும் புதுச்சேரி மாநிலங்களின் துணை நிலை  ஆளுநர் பொறுப்பை ஜார்க்கண்ட் ஆளுநர் சிபி.ராதாகிருஷ்ணன் கூடுதலாக கவனிப்பார் என கூறப்பட்டுள்ளது.