MR Vijayabhaskar Arrest:100 கோடி நில மோசடி வழக்கு! கேரளாவில் பதுங்கி இருந்த முன்னாள் அமைச்சர் எம்.ஆர்.விஜயபாஸ்கர் கைது!

தனது அப்பாவின் உடல்நிலையை கருத்தில் கொண்டு, இடைக்கால முன் ஜாமீனை தர வேண்டும் என்று முன்னாள் அமைச்சர் எம்.ஆர்.விஜயபாஸ்கர் கோரிக்கை வைத்து இருந்தார். ஆனால் விஜயபாஸ்கரின் முன் ஜாமீன் மனுவை நீதிமன்றம் தள்ளுபடி செய்தது. இதனால் கடந்த மூன்று வாரங்களுக்கும் மேலாக விஜயபாஸ்கர் தலைமறைவாக இருந்து வந்தார்.

சிபிசிஐடி ரெய்டு 

இதனிடையே கரூர் நீதிமன்றத்தில் மீண்டும் தாக்கல் செய்த முன் ஜாமின் மனுவை விசாரித்த நிலையில், கடந்த ஜூலை 2ஆம் தேதி முதல் உத்தரவை தள்ளி வைத்து இருந்தனர். இதனிடையே கடந்த ஜூலை 5ஆம் தேதி முன்னாள் அமைச்சர் எம்.ஆர்.விஜய்பாஸ்கர் மற்றும் அவருக்கு தொடர்பு உடையவர்களின் அலுவலகங்கள் மற்றும் வீடுகளில் சிபிசிஐடி போலீசார் சோதனை நடத்தினர்.

கரூர் வேலாயுதம்பாளையம் பகுதியில் உள்ள எம்.ஆர்.விஜயபாஸ்கரின் ஆதரவாளர் செல்வராஜ், கவுண்டம்பாளையம் பகுதியில் உள்ள ரகு ஆகியோர் வீடுகளில் போலீசார் சோதனை நடத்தினர்.

கேரளாவில் கைது 

கடந்த ஜூலை 6ஆம் தேதி அன்று எம்.ஆர்.விஜயபாஸ்கரின் முன் ஜாமீன் மனுவை விசாரணை செய்த கரூர் முதன்மை அமர்வு நீதிமன்றம், முன் ஜாமீன் மனுவை தள்ளுபடி செய்தது. மேலும் அவரது சகோதரர் சேகரின் முன் ஜாமீன் மனுவும் தள்ளுபடி செய்யப்பட்டது.

14 தனிப்படைகள் அமைத்து சிபிசிஐடி போலீசார் அவரை தேடி வந்த நிலையில், கரூரில் பதுங்கி இருந்த எம்.ஆர்.விஜயபாஸ்கரை இன்று காலை கைது செய்யப்பட்டார்.

கைதுக்கு எடப்பாடி பழனிசாமி கண்டனம் 

சிபிசிஐடி காவல்துறையால் எம்.ஆர்.விஜயபாஸ்கர் கைது செய்யப்பட்டதற்கு முன்னாள் முதலமைச்சரும், எதிர்க்கட்சித் தலைவருமான எடப்பாடி பழனிசாமி கண்டனம் தெரிவித்து உள்ளார். இது தொடர்பாக தனது எக்ஸ் வலைத்தளத்தில் ட்வீட் செய்துள்ள அவர், “கரூர் மாவட்டக் கழகச் செயலாளர், முன்னாள் அமைச்சர், பல்வேறு நிலைகளில் கழகத்திற்கு பங்காற்றி வரும் சிறந்த களப்பணியாளர் திரு. எம்.ஆர்.விஜயபாஸ்கர் அவர்களை கைது செய்துள்ளதாக ஊடகங்களில் செய்திகள் வந்துள்ளன, இந்த கைதிற்கு விடியா திமுக அரசுக்கு எனது கடும் கண்டனம்.

முன்னாள் விடியா திமுக அமைச்சர், இந்நாள் புழல் சிறைவாசி திரு. செந்தில் பாலாஜிக்காக பழிவாங்க வேண்டும் என்ற ஒரே நோக்கத்துடன், சிவில் வழக்கு ஒன்றை கையில் வைத்துக்கொண்டு அதீத முறையில் சோதனைகளையும் கைது நடவடிக்கையும் மேற்கொள்வது கடும் கண்டனத்திற்குரியது.

அரசியல் காழ்ப்புணர்வோடு விடியா திமுக அரசு ஏவும் பொய் வழக்குகள் யாவையும் சகோதரர் எம்.ஆர்.விஜயபாஸ்கர் சட்டப்பூர்வமாக சந்தித்து வெல்வார்!” என தெரிவித்து உள்ளார்.