மழைக்கு இதமானது; இடித்து வைத்த நாட்டுக்கோழி ரசம்! குளிர் கால தொற்றுக்களில் இருந்து நிவாரணம்!

தேவையான பொருட்கள்

வரமல்லி – அரை ஸ்பூன்

மிளகு – அரை ஸ்பூன்

சீரகம் – அரை ஸ்பூன்

(இந்த மூன்றையும் ஒரு கடாயில் சேர்த்து வறுத்து பொடித்து வைத்துக்கொள்ளவேண்டும்)

சின்ன வெங்காயம் – 15 பல் (இடித்தது)

பூண்டு – 10 பல் (இடித்தது)

இஞ்சி – ஒரு சிறிய துண்டு (இடித்தது)

நாட்டுக்கோழி – 100 கிராம் (இடித்தது)

(இடிக்க கொடுத்துள்ள அனைத்து பொருட்களையும் தனித்தனியாக சிறிய உரலில் சேர்த்து இடித்து எடுத்துக்கொள்ளவேண்டும்)

நல்லெண்ணெய் – ஒரு குழிக்கரண்டி

சீரகம் – கால் ஸ்பூன்

தக்காளி – 1 (பொடியாக நறுக்கியது)

கறிவேப்பிலை – ஒரு கொத்து

பச்சை மிளகாய் – 2

மல்லித்தழை – சிறிதளவு

உப்பு – தேவையான அளவு

செய்முறை

கடாயில் எண்ணெய் சேர்த்து அது சூடானவுடன் சீரகம் சேர்த்து பொரியவிடவேண்டும். அடுத்து இடித்த சின்ன வெங்காய சேர்த்து வதக்கவேண்டும். அடுத்து கறிவேப்பிலை, இடித்த இஞ்சி-பூண்டு விழுது சேர்த்து நன்றாக பச்சை வாசம் போகும் வரை வதக்கவேண்டும்.

அடுத்து பச்சை மிளகாய், தக்காளி, மல்லித்தழை உப்பு சேர்த்து நன்றாக தக்காளி குழைந்து கிரேவி பதத்துக்கு வரும் வரை வதக்கவேண்டும். அடுத்து இடித்த நாட்டுக்கோழி சேர்த்து நன்றாக வதக்கி அரை லிட்டர் தண்ணீர், இடித்து வைத்துள்ள பொடி ஆகியவற்றை சேர்த்து நன்றாக கொதிக்கவிடவேண்டும். அரை லிட்டர் தண்ணீர் கால் லிட்டராக சுண்டும் வரை கொதிக்கவிட்டு, மேலும் சிறிது மல்லித்தழை தூவி இறக்கினால், சூப்பர் சுவையான நாட்டுக்கோழி ரசம் தயார்.

அடிக்கும் மழை மற்றும் குளிருக்கு இந்த ரசத்தை சூடான சாதத்தில் சேர்த்து சாப்பிட சுவை அள்ளம். அதுமட்டுமின்றி வாய் முதல் வயிறு வரை இதமளிக்கும். இந்த மழைக்காலத்தில் மிஸ் செய்துவிடக்கூடாத ரசம் இந்த நாட்டுக்கோழி ரசம்.

இதை அப்படியே குக்கரிலும் வைத்துக்கொள்ளலாம். சிலர் கோழி வேகாது என்று நினைத்தால் குக்கரில் வைத்துவிட்டால் போதும். தேவையான அளவு விசில்கள் விட்டு இறக்கிக்கொள்ளவேண்டும்.

இதுபோன்ற எண்ணற்ற வித்யாசமான ரெசிபிக்கள், தகவல்கள், பண்டிகைக் கால சிறப்பு உணவுகள், பழக்கங்கள், மரபுகள், அழகு குறிப்புகள் மற்றும் ஆரோக்கிய குறிப்புக்கள் தேர்ந்தெடுத்து வழங்கப்பட்டு வருகிறது. எனவே தகவல்களை தொடர்ந்து பெற்று ஆரோக்கியமான வாழ்வு வாழ வாழ்த்துக்கள்.