தீபாவளிக்கு லேகியம் செய்வது எப்படி பாருங்கள்! பண்டிகை காலங்களில் வயிறு ஆரோக்கியம் காக்கப்படும்!

மிளகு – 50 கிராம்

திப்பிலி – 50 கிராம்

சதகுப்பை – 30 கிராம்

சிறுநாகப்பூ – 50 கிராம்

வாய்விடங்கம் – 50 கிராம்

கருஞ்சீரகம் – 50 கிராம்

சீரகம் – 50 கிராம்

லவங்கப்பட்டை – 50 கிராம்

கோரைக் கிழங்கு – 50 கிராம்

வர கொத்தமல்லி – 30 கிராம்

சித்தரத்தை - 30 கிராம்

ஓமம் - 30 கிராம்

அதிமதுரம் - 20 கிராம்

கிராம்பு - 20 கிராம்

வெல்லம்- 300 கிராம்

தேன் - 100 கிராம்

நெய் - 100 மில்லி

செய்முறை

ஒரு கடாயில் மேலே கொடுக்கப்பட்டுள்ள ஒவ்வொரு பொருளையும் தனித்தனியாக வறுத்து எடுத்துக்கொள்ளவேண்டும். அனைத்தையும் தனித்தனியாக ஆறவைத்து அரைத்து, நன்றாக சலித்து எடுத்துக்கொள்ளவேண்டும்.

ஒரு பாத்திரத்தில் வெல்லத்தை எடுத்து பாகு காய்ச்சிக்கொள்ளவேண்டும். பாகு கம்பி பதம் வந்தவுடன், அரைத்து, சலித்து வைத்துள்ள ஒவ்வொரு பொருளையும், அதில் தனித்தனியாக சேர்த்து கிளறிக்கொண்டே இருக்கவேண்டும். நல்ல திரண்டு வரும்போது லேகிய பதம் கிடைக்கும்.

அப்போது இறக்கி வைத்து நெய் விட்டு நன்றாகக் கிளறி கொஞ்சம் ஆறிய பின் கொஞ்சம், கொஞ்சமாகத் தேன் விட்டுக் கிளறிக்கொண்டே இருக்கவேண்டும். ஆறியவுடன் ஒரு காற்றுப்புகாத டப்பாவில் அடைத்து வைத்துக்கொள்ளவேண்டும்.

தீபாவளி காலங்களில் நாம் அதிகளவில் இனிப்புகள் மற்றும் எண்ணெய் பலாகாரங்களை எடுத்துக்கொள்வோம். எனவே இந்த லேகியத்தையும் சாப்பிடவேண்டும். அப்போதுதான் வழக்கத்துக்கு மாறாக மாறும் நமது உணவு பழக்கத்தால் நமது குடல் ஆரோக்கியம் கெடாமல் இருக்கும்.

ஆறிய பின்னர் வயதுக்கு ஏற்றவாறு 3 - 12 வயது வரை 5 கிராம் காலை மற்றும் இரவு உணவிற்குப் பின்னர் எடுத்து சப்பிச் சாப்பிடவேண்டும். 13 வயதுக்கு மேற்பட்டோர் 10 கிராம் அளவு எடுத்து காலை மற்றும் இரவு உணவிற்குப் பிறகுச் சப்பிச் சாப்பிடவேண்டும். இதை தீபாவளி காலங்கள் மட்டுமல்ல மற்ற நாட்களிலும் வயிறு தொடர்பான உபாதைகள் உள்ளதாக உணர்ந்தால் எடுத்து பலன்பெறலாம்.