Varasudu: தெலுங்கில் கவிழ்ந்த வாரிசு: மாஸ்டர் வசூலை நெருங்க திணறல்!
தெலுங்கில் வாரிசு திரைப்படம் தோல்வியை சந்தித்து இருக்கிறது.
நடிகர் விஜய் நடிப்பில் இயக்குநர் வம்சி பைடிப்பள்ளி இயக்கத்தில் பொங்கலுக்கு வெளியான திரைப்படம் ‘வாரிசு’. விஜய்க்கு ஜோடியாக ராஷ்மிகா மந்தனா நடித்திருந்த நிலையில், இவர்களுடன் பிரகாஷ்ராஜ், பிரபு, சரத்குமார், ஷ்யாம் உள்ளிட்ட பல நடிகர்கள் நடித்திருந்தனர். தமிழில் படத்திற்கு கலவையான விமர்சனங்கள் வந்த போதிலும், பெரும்பான்மையான ரசிகர்களுக்கு படம் பிடிக்கவே செய்திருந்தது. அண்மையில் இந்த படம் தொடர்பான வசூல் 210 கோடியை எட்டியிருப்பதாக அந்தப்படத்தின் தயாரிப்பு நிறுவனம் அறிவித்தது. இந்த நிலையில் தற்போது தெலுங்கில் வாரிசு படம் சரியாக போகவில்லை என்ற தகவல்கள் வந்து கொண்டிருக்கின்றன. தெலுங்கில் ‘வாரசுடு’ என்ற பெயரில் வெளியான இந்தப்படம் ஜனவரி 14 ஆம் தேதி வெளியிடப்பட்டது.
ட்ரெண்டிங் செய்திகள்
இது குறித்து பிரபல ஊடகம் வெளியிட்ட செய்தியின் படி, “ வாரிசு படத்திற்கு தமிழில் கிடைத்த வெற்றி தெலுங்கில் கிடைக்க வில்லை. வாரசுடு படத்தை திரையிடும் பெரும்பான்மையான திரையரங்குகள் காலியாகவே இருக்கின்றன. தெலுங்கில் வாரசுடு படமானது ரிலீஸூக்கு முன்னதாக 20 கோடிக்கு பேரம் பேசப்பட்டது. பின்னர் அந்த தொகை சிறிது குறைக்கப்பட்டதாக சொல்லப்பட்டது. ஆனால் தற்போது வரை வாரசுடு திரைப்படம் தெலுங்கில் 12 கோடி ஷேரை மட்டுமே வசூலித்து இருக்கிறது. இந்த தொகையில் ஜிஎஸ்டி மற்றும் தமிழில் படம் பார்த்தவர்களின் வசூல் தொகையும் அடங்கும்.
ஆக தெலுங்கு பதிப்பின் வாரசுடு ஷேர் 10 கோடியாக இருக்கும் என தெரிகிறது. அதன்படி பார்க்கும் போது வாரசுடு படம் தெலுங்கில் தோல்வியை சந்தித்து இருக்கிறது; முன்னதாக தெலுங்கில் வெளியான மாஸ்டர் திரைப்படம் 15 கோடி வரை ஷேரை பெற்றது.” என்று குறிப்பிடப்பட்டுள்ளது; ஆக, வாரசுடு படத்தின் வாயிலாக தெலுங்கில் விஜயின் மார்க்கெட் உயரவில்லை என்பது கண் கூடாக தெரிந்து விட்டது என்பது திரைவிமர்சகர்களின் கருத்தாக இருக்கிறது.
டாபிக்ஸ்